අපේ ජාතික පෙරමුණ නම් වූ ලියාපදිංචි පක්ෂයේ අයිතිය සජිත් පේ‍්‍රමදාස පාර්ශ්වය ලබාගෙන ඇති අතර දැන් එහි නම වන්නේ සමගි ජාතික බලවේගයයි. එම පක්ෂයේ නම මාරුවට අමතරව පක්ෂයේ සභාපතිවරයා ලෙස සජිත් පේ‍්‍රමදාස මහතාගේ නමත් ලේකම් ලෙස රංජිත් මද්දුමබණ්ඩාර මහතාගේ නමත් මැතිවරණ කොමිසම පිළිගෙන තිබේ. එම පක්ෂයේ ලකුණ ලෙස හදවත ලකුණ ඉල්ලා ඇතැයි මාධ්‍ය වාර්තා කළද ඊට තවම මැතිවරණ කාර්යාලයෙන් අනුමැතිය ලැබී නැත.
මේ අතර වෙනසක් කරන ලද මෙම පක්ෂයේ නම ලියාපදිංචියට අවසර නොදෙන ලෙස එක්සත් ජාතික පක්ෂයේ නීති උපදේශකයා මැතිවරණ කොමිසමෙන් ඉල්ලීමක් කර ඇත. ඊට හේතුවී ඇත්තේ මෙම නව පක්ෂය ඉංග‍්‍රීසි භාෂාවෙන් කෙටියෙන් ව්‍යවහාර කිරීමේදී එක්සත් ජාතික පක්ෂයද කෙටියෙන් ව්‍යවහාර කිරීමේදී යොදන යූඑන්පී යන්න යෙදීමය. එයින් එක්සත් ජාතික පක්ෂයට අගතියක් සිදුවන බව මැතිවරණ කොමිසමට යවා ඇති ඉල්ලීමේ දැක්වේ.
ඉදිරි මහා මැතිවරණයට එක්සත් ජාතික පක්ෂය හෝ එක්සත් ජාතික පක්ෂ සන්ධානය තරග කළ යුත්තේ අලියා ලකුණෙන් බව එජාප මහලේකම් අකිල විරාජ් කාරියවසම් මෙන්ම තව පිරිසක්ද ප‍්‍රකාශ කර තිබේ. ඊට පිළිතුරු දෙමින් සජිත් පේ‍්‍රමදාස පාර්ශ්වයේ ප‍්‍රධාන භූමිකාවක් රඟදක්වන අජිත් පී. පෙරේරා මන්ත‍්‍රීවරයා ප‍්‍රකාශ කර ඇත්තේ එජාපය අලියා ලකුණ අතහැර එම ලකුණ නව පක්ෂයට ලබාදෙන්නේ නම් එම ලකුණින් තරග කිරීමට සූදානම් බවයි.
ඩමි අපේක්ෂකයන් ඉදිරිපත් කිරීම, ප‍්‍රතික්ෂේපිත නාමයෝජනා සඳහා විකල්ප ලැයිස්තුවක් ලෙස ක‍්‍රියාකිරීම, ඡුන්ද පොළ හා ඡුන්ද ගණන් කිරීමේ මධ්‍යස්ථානවලට නිරීක්ෂණ පුද්ගලයන් පත්කිරීම ආදි අවශේෂ වැඩ සඳහා ලියාපදිංචි කර ඇති අපේ ජාතික පෙරමුණ වැනි පක්ෂයකට එම පක්ෂයේ ලියාපදිංචි නම, ලකුණ හා අවශ්‍ය නම් නිලධාරීන්ගේ නම් වෙනස් කිරීමත් මහා කජ්ජක් නොවේ. මන්ද සැබෑ ලෙසම එවැනි පක්ෂ හෝ ඒවාහි සාමාජිකයන්ද නැති නිසාය. මැතිවරණ කාර්යාලයට එවැනි පක්ෂ වාර්ෂිකව යවන ගිණුම් හා අනෙකුත් රැුස්වීම් වාර්තා යනු එම පක්ෂ ලියාපදිංචි කළ පුද්ගලයන් දෙතුන් දෙනෙකුගේ වැඩ පමණය.
එහෙත් ඉතිහාසයක් ඇති, ජන විඥානය තුළ කිඳා බැස ඇති, ඡන්ද පදනමක් ඇති, පාක්ෂිකයන් හා සාමාජිකත්වයක්ද ඇති එක්සත් ජාතික පක්ෂය, ශ‍්‍රී ලංකා නිදහස් පක්ෂය, ද්‍රවිඩ එක්සත් විමුක්ති පෙරමුණ, ශ‍්‍රී ලංකා පොදුජන පෙරමුණ (පොහොට්ටු පක්ෂය, ජනතා විමුක්ති පෙරමුණ වැනි පක්ෂවලට එසේ පක්ෂයේ නම මාරු කිරීමේ හෝ ලකුණු මාරුකිරීමේ පහසු අවස්ථාවක් නැත. පසුගිය ජනාධිපතිවරණ තුනටම එක්සත් ජාතික පක්ෂය ප‍්‍රමුඛත්වය ගත් දේශපාලන සන්ධානය සිය පොදු හෝ පොදු නොවන අපේක්ෂකයා ඉදිරිපත් කරනු ලැබුයේ හංසයා ලකුණෙනි.
විශේෂයෙන්ම එම අවස්ථාවල සජිත් පේ‍්‍රමදාස මහතාගේ පැහැදිලිි ස්ථාවරය වූයේ එජාපය අලියා ලකුණ අත්නොහැරිය යුතු බවය. ගමට හුරුපුරුදු අලියා ලකුණින් එජාපය ගමට යායුතු බවය. එසේ කියූ සජිත් පේ‍්‍රමදාස මහතා දැන් එක්වරම තිබූ දේශපාලන පක්ෂයක නම වෙනස් කර එහි සභාපතිත්වය තමා යටතට ගෙන නිල වශයෙන් අලූත් දේශපාලන පක්ෂයක නායකයා වී තිබේ. (අලූතින් දේශපාලන පක්ෂ සන්ධානයක් ලියාපදිංචි කළද එය මැතිවරණ කාර්යාලයට අනුව තවත් එක් ලියාපදිංචි දේශපාලන පක්ෂයක් පමණය. දේශපාලන පක්ෂ සම්බන්ධ අවම විනය අනුව එහි සාමාජිකයෙකු පවා වෙනත් දේශපාලන පක්ෂයක සාමාජිකත්වය ගත් විට පළමු පක්ෂයේ ඔහුගේ හෝ ඇයගේ සාමාජිකත්වය අහෝසි වේ. සාමාජිකත්වය අහෝසි වූ විට ඉබේම ඔහු හෝ ඇය දරන තනතුරුද අහෝසි වේ. කෙසේද යත් වත්මන් පාර්ලිමේන්තු මැතිවරණ ක‍්‍රමය අනුව යම් දේශපාලන පක්ෂයක් නියෝජනය කරමින් පාර්ලිමේන්තුවට තේරී පත්වන මන්ත‍්‍රීවරයෙකුගේ එම මන්ත‍්‍රී ධුරය එකී දේශපාලන පක්ෂයේ ඔහුගේ සාමාජිකත්වය අහෝසි වීමෙන් නැතිව යයි.
ඒ අනුව සජිත් පේ‍්‍රමදාස මහතා දැන් සිටින්නේ එක්සත් ජාතික පක්ෂයේ ඔහුගේ නියෝජ්‍ය නායක තනතුරු මෙන්ම සාමාජිකත්වයද අහෝසියට ලක්වන අවස්ථාවකය.
මැතිවරණවලට ඉදිරිපත්වීම සඳහා දේශපාලන පක්ෂ කිහිපයක් එකතු වී හදාගන්නා සන්ධාන තිබේ. ඒවා මැතිවරණ කාර්යාලයේ ලියාපදිංචි නිල සන්ධාන ලෙස හෝ එසේ නොවන බාහිරව ඇති කරගන්නා එකඟතා මත කටයුතු කරන සන්ධාන ලෙසද ක‍්‍රියා කරයි. මේ බාහිර එකඟතා මත මැතිවරණවලට තරග කරන සන්ධානයකට හොඳම උදාහරණය ද්‍රවිඩ ජාතික සන්ධානයය. එනමින් දේශපාලන පක්ෂයක් ලියාපදිංචි කර නැත. එනම භාවිත කළද ඔවුන් ඡුන්දයට ඉදිරිපත් වන්නේ ද්‍රවිඩ එක්සත් විමුක්ති පෙරමුණ ලෙසය. එක්සත් ජාතික පක්ෂය ප‍්‍රමුඛ එක්සත් ජාතික පෙරමුණද එලෙසය. පසුගිය මැතිවරණවලට පෙරමුණක් ලෙස ඔවුන් තරග කළේ එක්සත් ජාතික පක්ෂය යටතේය.
එසේ නොවී මැතිවරණ කාර්යාලයේ දේශපාලන පක්ෂ ලෙස ලියාපදිංචි කළ සන්ධානද මැතිවරණවලට ඉදිරිපත් වී තිබේ. එම සන්ධාන එම දේශපාලන පක්ෂවල පොදු එකඟතාවෙන් ඇති කරගෙන ලියාපදිංචි කරන ලද ඒවාය. වත්මන් ආණ්ඩු බලය හොබවන බුලත් කොලය ලකුණෙන් යුතු එක්සත් ජනතා නිදහස් සන්ධානයද එවැන්නකි. එහි ප‍්‍රමුඛ බලය තිබුණේ ශ‍්‍රී ලංකා නිදහස් පක්ෂයටය. මීට පෙර ආණ්ඩු බලය හොබවා තිබූ පුටුව ලකුණෙන් යුතු පොදුජන පොදුජන එක්සත් පෙරමුණද එවැන්නකි. ලංකා සමසමාජ පක්ෂය, ශ‍්‍රී ලංකාවේ කොමියුනිස්ට් පක්ෂය, ශ‍්‍රී ලංකා මහජන පක්ෂය හා නව සමසමාජ පක්ෂය එක්ව පිහිටුවාගත් එක්සත් සමාජවාදී පෙරමුණද එවැන්නකි.
ඒ සියල්ලම ඊට එක්වූ පක්ෂවල කැමැත්ත මත පිහිටුවූ දේශපාලන පක්ෂ සන්ධානය. තමා නියෝජනය කරන එක්සත් ජාතික පක්ෂයේ පූර්ණ එකඟතාවෙන් තොරව සජිත් පේ‍්‍රමදාස මහතා මේ ඇතිකරගෙන ඇති දේශපාලන පක්ෂ සන්ධානය යැයි කියන සන්ධානයද ඊට බොහෝ වෙනස්ය. ඒ වෙනස හෙට දින සජිත් පේ‍්‍රමදාස මහතාගේ දේශපාලන ගමනද තීරණාත්මක මංසන්ධියකට ගෙන එනු ඇත.
පුරවැසියා
