විපක්ෂය විසින් කථානායකවරයාට එරෙහිව ඉදිරිපත් කර ඇති විශ්වාසභංග යෝජනාව නොවැම්බර් 3 වැනිදා පාර්ලිමේන්තුවේදී විවාදයට නොගන්නා බව සභානායක සහ අමාත්‍ය බිමල් රත්නායක මහතා පවසයි.
පාර්ලිමේන්තුවේ ස්ථාවර නියෝගවලට අනුකූලව සංශෝධනය කර, ඔක්තෝබර් 28 වැනිදාට පෙර යළි ඉදිරිපත් කර නොතිබීම හේතුවෙන් එම යෝජනාව නොවැම්බර් 3 වැනිදා විවාදයට ගැනීමට කාලසටහන්ගත කළ නොහැකි බව අමාත්‍යවරයා සඳහන් කර තිබේ.
ඒ අනුව නොවැම්බර් 3 වැනිදා පාර්ලිමේන්තුවේ කල් තැබීමේ විවාදයක් පැවැත්වීමට වෙන් කර ඇත. කෙසේ වෙතත් පාර්ලිමේන්තු ස්ථාවර නියෝගවලට අනුකූලව විශ්වාසභංග යෝජනාව ඉදිරිපත් කරන්නේ නම්, අයවැය කාලසීමාවට පෙර එය විවාදයට ගැනීමට හැකි බව පාර්ලිමේන්තු කටයුතු පිළිබඳ කාරක සභාවට දැනුම් දී ඇති බවද බිමල් රත්නායක මහතා වැඩිදුරටත් ප්‍රකාශ කර තිබේ.
