එල්නිනෝ දේශගුණික බලපෑම හේතුවෙන් ඉදිරි මාස දෙක තුළ ඇති විය හැකි වැසි සහිත කාලගුණික තත්ත්වයන්ට මුහුණදීම සඳහා ජනතාව දැනුවත් කිරීමේ සහ ආපදා පෙරහුරු වැඩමුළු පැවැත්වීමට රජය තීරණය කර ඇති බව ජනාධිපති මාධ්ය අංශය පවසයි.
එල්නිනෝ දේශගුණික බලපෑමට මුහුණදීම සඳහා අවශ්ය පියවර ගැනීමට පරිසර අමාත්ය වෛද්ය ධම්මික පටබැඳි මහතාගේ සභාපතිත්වයෙන් පත් කර ඇති විශේෂ අමාත්ය මණ්ඩල අනුකමිටුව සහ නිලධාරී කමිටුව පස්වැනි වරටත් ඊයේ (14) පස්වරුවේ ජනාධිපති කාර්යාලයේදී රැස්වූ අවස්ථාවේදී මෙම තීරණ ගෙන තිබේ.
එල්නිනෝ තත්ත්වය මේ වනවිට පවතින නියං කාලගුණයෙන් වැසි සහිත කාලගුණික තත්ත්වයකට ඉදිරි මාස දෙක තුළ පරිවර්තනය විය හැකි බැවින් ඊට මුහුණදීම සඳහා ගත යුතු ක්රියාමාර්ග සම්බන්ධයෙන් එහිදී දීර්ඝ ලෙස සාකච්ඡා කර ඇත. ඒ අනුව වැසි හේතුවෙන් ඇති විය හැකි ගංවතුර සහ නායයෑම් ඇතුළු ආපදා තත්ත්වයන්ට මුහුණදීම සඳහා ජනතාව දැනුවත් කිරීමට තීරණය කර ඇති අතර එවැනි අවස්ථාවකදී ක්රියා කළ යුතු ආකාරය පිළිබඳ ආපදා පෙරහුරු වැඩමුළු පැවැත්වීමටද අවධානය යොමු වී තිබේ.
නායයෑම් අවදානම සහිත මහනුවර, බදුල්ල, මාතලේ සහ නුවරඑළිය යන දිස්ත්රික්ක කේන්ද්ර කරගනිමින් මූලික පෙරහුරු වැඩමුළු පැවැත්වීමටත් ඒ සඳහා අවශ්ය කටයුතු කඩිනමින් සිදුකරන ලෙස අදාළ නිලධාරීන්ට උපදෙස් ලබාදීමටත් තීරණය කර තිබේ. එමෙන්ම විද්යුත් සහ මුද්රිත මාධ්ය ඔස්සේ ජනතාව දැනුවත් කිරීමේ වැඩපිළිවෙළක් ක්රියාත්මක කිරීමටත් ප්රාදේශීය ලේකම් කොට්ඨාස මට්ටමින් මෙහෙයුම් මැදිරි ක්රියාත්මක කරමින් ජනතාව ආපදා සඳහා පූර්ව සූදානම් කිරීමටත් කමිටුවේ අවධානය යොමුව තිබේ.
මේ අතර එල්නිනෝ තත්ත්වය හමුවේ දැනටමත් පීඩාවට පත්ව සිටින ජනතාව වෙනුවෙන් ක්රියාත්මක කර ඇති සහන වැඩසටහන් සහ ඉදිරි ක්රියාමාර්ගවල ප්රගතියද රැස්වීමේදී සමාලෝචනය කර ඇත. රැස්වීමට නිවාස, ඉදිකිරීම් සහ ජලසම්පාදන අමාත්ය වෛද්ය සුසිල් රණසිංහ, වැවිලි සහ ප්රජා යටිතල පහසුකම් අමාත්ය සමන්ත විද්යාරත්න ඇතුළු අමාත්යාංශ ලේකම්වරුන්, කාලගුණ විද්යා දෙපාර්තමේන්තුව, ආපදා කළමනාකරණ මධ්යස්ථානය, ජාතික ගොඩනැගිලි පර්යේෂණ ආයතනය සහ ජාතික ජලසම්පාදන හා ජලාපවහන මණ්ඩලයේ නිලධාරීන් ඇතුළු පිරිසක් සහභාගි වී තිබේ.
