මඩකලපුව මහේස්ත්රාත් ඒ. දර්ශිනී මහත්මිය විසින් වීඩියෝ තාක්ෂණය ඔස්සේ පැවති නඩු විභාගයකදී මෙම නියෝගය නිකුත් කර තිබේ. 2008 වසරේ මඩකලපුව ප්රදේශයේ සිදුවූ ඝාතන සම්බන්ධයෙන් අපරාධ පරීක්ෂණ දෙපාර්තමේන්තුව විසින් පිල්ලෙයාන් ඇතුළු සැකකරුවන් තිදෙනා අත්අඩංගුවට ගෙන තිබුණි.
අදාළ ඝාතන අතර පොලිස් නිලධාරියකු ඇතුළු පිරිසක් වෙඩි තබා ඝාතනය කිරීම මෙන්ම ව්යාපාරිකයකු පැහැරගෙන ගොස් ඝාතනය කිරීමේ සිද්ධියක්ද ඇතුළත් බව සඳහන් වේ. අද පැවති නඩු විභාගයේදී අපරාධ පරීක්ෂණ දෙපාර්තමේන්තුව විසින් සිදුකරමින් පවතින විමර්ශන සම්බන්ධයෙන් අධිකරණයට කරුණු ඉදිරිපත් කර තිබේ.
එහිදී පිල්ලෙයාන් වෙනුවෙන් පෙනී සිටි නීතිඥවරයා ඔහුට බන්ධනාගාරයෙන් ලබාදෙන ආහාර සම්බන්ධයෙන් ගැටලු මතු කර ඇති අතර, ඔහුට සිය මව සමඟ දුරකථනයෙන් සම්බන්ධ වීමට අවස්ථාව ලබාදෙන ලෙසද ඉල්ලා තිබේ.
ඒ සම්බන්ධයෙන් වාර්තාවක් ලබන සැප්තැම්බර් 22 වැනිදා අධිකරණයට ඉදිරිපත් කරන ලෙස මහේස්ත්රාත්වරිය බන්ධනාගාර බලධාරීන්ට නියෝග කර ඇත. මේ අතර මෙම නඩුවේ තවත් සැකකරුවකු ලන්ඩනයේ සිටින බවට විශ්වාස කෙරෙන බැවින් ඔහු අත්අඩංගුවට ගැනීම සඳහා නිකුත් කර තිබූ වරෙන්තුවද අධිකරණය යළි දීර්ඝ කර තිබේ.එම සැකකරු අත්අඩංගුවට ගැනීම සඳහා සහාය ලබාදෙන ලෙස ජාත්යන්තර පොලිසිය හෙවත් ඉන්ටර්පෝල් වෙත ඉල්ලීමක් යොමු කර ඇති බවද අපරාධ පරීක්ෂණ දෙපාර්තමේන්තුව අධිකරණයට දැනුම් දී තිබේ.
