2021 වසරේ කොළඹ නෙළුම් පොකුණ රඟහලේ පැවති ශ්රී ලංකා විවාහක රූ රැජින තරගයේදී කිරුළ පැළඳ සිටි පුෂ්පිකා ද සිල්වා මහත්මියගේ හිසෙන් කිරුළ බලහත්කාරයෙන් ඉවත් කිරීම සහ ඇයට පහරදීම සම්බන්ධයෙන් චෝදනා ලැබ සිටි කැරොලයින් ජූරි සහ චූලා පද්මේන්ද්ර යන විත්තිකරුවන් දෙදෙනා නිදොස් කොට නිදහස් කිරීමට කොළඹ මහේස්ත්රාත් අධිකරණය සැප්තැම්බර් 14 දින නියෝග කර තිබේ.
දීර්ඝ නඩු විභාගයකින් අනතුරුව කොළඹ ප්රධාන මහේස්ත්රාත් අසංග එස්. බෝදරගම මහතා විසින් අද අදාළ නියෝගය නිකුත් කර ඇත. අදාල තීන්දුව ප්රකාශයට පත් කරමින් ප්රධාන මහේස්ත්රාත්වරයා සඳහන් කර ඇත්තේ විත්තිකරුවන්ට එරෙහිව ඉදිරිපත් කර තිබූ චෝදනා සාධාරණ සැකයකින් ඔබ්බට ඔප්පු කිරීමට පැමිණිල්ල අසමත් වී ඇති බවයි.
ඒ අනුව කැරොලයින් ජූරි සහ චූලා පද්මේන්ද්ර යන දෙදෙනාට එරෙහි චෝදනාවලින් ඔවුන් නිදොස් කොට නිදහස් කිරීමට අධිකරණය නියෝග කර තිබුණු අතර නඩුව විභාග වෙමින් පවතින අතරතුර විත්තිකරුවකු වූ චූලා පද්මේන්ද්ර මහත්මිය මියගොස් ඇති බවද අධිකරණයට දැනුම් දී තිබේ.
