පාතාල කල්ලි සාමාජිකයෙකු යැයි පැවසෙන නඳුන් චින්තක වික්‍රමරත්න හෙවත් ‘හරක් කටා’ ඇතුළු විත්තිකරුවන් තිදෙනෙකු වෙනුවෙන් ඉදිරිපත් කළ ඇප ඉල්ලීම් කොළඹ මහාධිකරණය අද (29) ප්‍රතික්ෂේප කර ඇති බව වාර්තා වේ.
වැලිසර බන්ධනාගාරයේ රඳවා සිටින ‘හරක් කටා’ වෙනුවෙන් ඉදිරිපත් කළ ඇප ඉල්ලීමට අමතරව තවත් විත්තිකරුවන් දෙදෙනෙකු වෙනුවෙන් ඔවුන්ගේ නීතිඥවරුන් ඉදිරිපත් කළ ඇප ඉල්ලීම් ද අධිකරණය ප්‍රතික්ෂේප කර ඇති අතර කොළඹ මහාධිකරණ විනිසුරු බුද්ධික සී. රාගල මහතා විසින් මෙම නියෝගය ලබා දී ඇත.
මීට පෙර මහාධිකරණය විසින් නිකුත් කරන ලද නියෝගයකට එරෙහිව නීතිපතිවරයා අභියාචනාධිකරණය හමුවේ අභියාචනයක් ගොනු කර ඇති බැවින්, මෙම අවස්ථාවේදී ඇප ඉල්ලීම් සලකා බැලිය නොහැකි බව විනිසුරුවරයා නියෝගය ප්‍රකාශයට පත් කරමින් සඳහන් කර ඇත.
