2012 වසරේ ග්රීක බැඳුම්කර සිද්ධිය සම්බන්ධයෙන් අල්ලස් හෝ දූෂණ විමර්ශන කොමිෂන් සභාව විසින් තමන්ට එරෙහිව ගොනුකර ඇති නඩුව අභියෝගයට ලක් කරමින් හිටපු මහ බැංකු අධිපති අජිත් නිවාඩ් කබ්රාල් මහතා ශ්රේෂ්ඨාධිකරණයට අභියාචනයක් සැප්තැම්බර් 11 වන දින ඉදිරිපත් කර තිබේ.
අදාළ අභියාචනය ශ්රේෂ්ඨාධිකරණය හමුවේ කැඳවීමෙන් අනතුරුව එය කරුණු තහවුරු කිරීම සඳහා ඔක්තෝබර් 09 වැනිදා යළි කැඳවීමට අධිකරණය නියම කර ඇත.
ග්රීසිය දැඩි ආර්ථික අර්බුදයකට ලක්වෙමින් පවතින බව දැන සිටියදී ශ්රී ලංකා රජයට අයත් මුදල් ග්රීක බැඳුම්කරවල ආයෝජනය කිරීමෙන් රජයට පාඩුවක් සිදු කළ බවට චෝදනා කරමින් අල්ලස් කොමිසම විසින් අජිත් නිවාඩ් කබ්රාල් මහතා ඇතුළු විත්තිකරුවන් පිරිසකට එරෙහිව කොළඹ ත්රිපුද්ගල මහාධිකරණ විනිසුරු මඩුල්ලක් හමුවේ නඩු පවරා තිබිණි.
