හෝමාගම පොලිස් ස්ථානයේ පොලිස් අත්අඩංගුවේ සිටි සැකකරුවෙකු මියයාමේ සිද්ධිය සම්බන්ධයෙන් රාජකාරි පැහැර හැරීමේ චෝදනා මත එම පොලිස් ස්ථානයේ ප්‍රධාන පොලිස් පරීක්ෂකවරයාගේ (HQI) සේවය අත්හිටුවා තිබේ.
මේ අතර, සිද්ධියට අදාළව අත්අඩංගුවට ගත් හෝමාගම පොලිසියේ අපරාධ විමර්ශන අංශයේ හිටපු ස්ථානාධිපතිවරයා අද (29) හෝමාගම මහේස්ත්‍රාත් අධිකරණයට ඉදිරිපත් කිරීමට නියමිතය.
බස්නාහිර පළාත් දකුණ දිසාව භාර අපරාධ විමර්ශන කොට්ඨාසයේ නිලධාරීන් විසින් ඊයේ (28) පස්වරුවේ මෙම නිලධාරියා අත්අඩංගුවට ගෙන තිබේ. 32 හැවිරිදි ඔහු හොරණ, බල්ලපිටිය ප්‍රදේශයේ පදිංචිකරුවෙකි.
මෙම සිද්ධියට අදාළව ඔක්තෝබර් 26 වැනිදා සිට ක්‍රියාත්මක වන පරිදි හෝමාගම කොට්ඨාසය භාර පොලිස් අධිකාරීවරයා විසින් පොලිස් නිලධාරීන් තිදෙනෙකුගේ සේවය අත්හිටුවීමට ද පියවර ගෙන ඇත. ඒ අතර හෝමාගම පොලිසියේ අපරාධ විමර්ශන අංශයේ ස්ථානාධිපතිවරයා ලෙස කටයුතු කළ උප පොලිස් පරීක්ෂකවරයෙකු, දූෂණ මර්දන වැටලීම් ඒකකයේ ස්ථානාධිපතිවරයා ලෙස කටයුතු කළ උප පොලිස් පරීක්ෂකවරයෙකු සහ සිද්ධිය වූ අවස්ථාවේ රාජකාරියේ නිරතව සිටි පොලිස් කොස්තාපල්වරයෙකු ද සිටිති.
මියගොස් ඇත්තේ කිරிவත්තුඩුව ප්‍රදේශයේ පදිංචි 29 හැවිරිදි දෙදරු පියෙකි. මත්ද්‍රව්‍ය සන්තකයේ තබාගෙන සිටි බවට සැකපිට ඔක්තෝබර් 25 වැනිදා පිටිපන හන්දියේදී හෝමාගම පොලිස් නිලධාරීන් විසින් ඔහු අත්අඩංගුවට ගෙන තිබිණි.
පොලිසිය සඳහන් කරන පරිදි, සැකකරු හෝමාගම පොලිස් ස්ථානයට රැගෙන යාමෙන් පසු හදිසියේ රෝගාතුර වී තිබේ. අනතුරුව ප්‍රතිකාර සඳහා හෝමාගම මූලික රෝහලට ඇතුළත් කර ඇති අතර, එහිදී ඔහු මියගොස් ඇත.
මරණය සම්බන්ධයෙන් හෝමාගම මහේස්ත්‍රාත් අධිකරණයට කරුණු වාර්තා කිරීමෙන් පසු වැඩබලන මහේස්ත්‍රාත්වරයා සිද්ධිය වූ ස්ථානය පරීක්ෂා කර තිබේ. එසේම, හෝමාගම මූලික රෝහලේදී මෘත දේහය සම්බන්ධයෙන් මහේස්ත්‍රාත් පරීක්ෂණයක් ද පවත්වා ඇත.
පසුව කොළඹ දකුණ ශික්ෂණ රෝහලේදී අධිකරණ වෛද්‍ය නිලධාරියෙකු විසින් පශ්චාත් මරණ පරීක්ෂණය සිදුකර තිබේ.
සිද්ධිය සම්බන්ධයෙන් බස්නාහිර පළාත් දකුණ දිසාව භාර අපරාධ විමර්ශන කොට්ඨාසය විසින් හෝමාගම කොට්ඨාසය භාර ජ්‍යෙෂ්ඨ පොලිස් අධිකාරීවරයාගේ සෘජු අධීක්ෂණය යටතේ විමර්ශන සිදුකරනු ලබයි. ඒ සඳහා හෝමාගම දිස්ත්‍රික් II භාර සහකාර පොලිස් අධිකාරීවරයාගේ සහාය ද ලබාදෙන බව පොලිසිය සඳහන් කරයි.
පොලිස්පතිවරයාගේ උපදෙස් මත බස්නාහිර පළාත් දකුණ දිසාව භාර අපරාධ විමර්ශන කොට්ඨාසය සහ පොලිස් විශේෂ විමර්ශන ඒකකය විසින් ද සිද්ධිය සම්බන්ධයෙන් වෙන වෙනම විමර්ශන ආරම්භ කර තිබේ.
