- මන්ත්රී වෙනකොටත් සමාගමේ අධ්යක්ෂ
- ඇමති වුණාට පසු සමාගමට රජයේ බිස්නස් ලැබිලා
- එක් සමාගමක් ගැන වත්කම් ප්රකාශයේ කියලා නෑ
ඩිජිටල් ආර්ථික නියෝජ්ය ඇමති එරංග වීරරත්න පාර්ලිමේන්තු මන්ත්රීවරයකු ලෙස කටයුතු කිරීම සම්බන්ධයෙන් නුසුදුස්සෙකු බවට පත්වී ඇති බව නොවැම්බර් 26 වැනිදා පැවති අයවැය කාරක සභා විවාදයේදී චෝදනා එල්ල විය.
ඒ එම විවාද අවස්ථාවේදී සමගි ජන බලවේග පාර්ලිමේන්තතු මන්ත්රී අමිල ප්රදීප් සිරිවර්ධන නියෝජ්ය ඇමති එරංග වීරරත්න ප්රධාන විධායක නිලධාරි ලෙස කටයුතු කරන Omobio (pvt) Ltd හා Eimsky Business Solutions (pvt) Ltd යන සමාගම් දෙක මාර්ග සංවර්ධන අධිකාරිය විසින් පාලනය කරනු ලබන අධිවේගී මාර්ග ව්යාපෘතිවල නිරතවන බවට චෝදනා කළේය.
එහිදී නියෝජ්ය ඇමති එරංග වීරරත්න එම චෝදනාවලට පිළිතුරු ලබාදෙමින් ප්රකාශ කළේ ඔහු නියෝජ්ය ඇමති ධුරයේ දිව්රුම් දීමට පෙර දිනයේ Omobio (pvt) Ltd හා Eimsky Business Solutions (pvt) Ltd යන සමාගම්වල ප්රධාන විධායක නිලධාරි ධුරයෙන් ඉවත් වූ බවයි. එසේම එම සමාගම්වල ඔහුට කොටස් අයිතිය තිබෙන බවද ඔහු පිළිගත්තේය.
ඒ අනුව නියෝජ්ය ඇමති එරංග වීරරත්න පාර්ලිමේන්තු මන්ත්රීවරයකු ලෙස තේරී පත්වන අවස්ථාව වනවිටත්, මන්ත්රීවරයකු ලෙස තේරී පත්වීමට නාම යෝජනා ලබාදෙන අවස්ථාව වනවිටත් එම සමාගම්වල ප්රධාන විධායක නිලධාරි ධුර දැරූ බව තහවුරු වේ.
එම විවාදයේදී මෙම කරුණ සම්බන්ධයෙන් අදහස් දක්වමින් පාර්ලිමේන්තු මන්ත්රී අජිත් පී පෙරේරා පැවසුවේ නාම යෝජනා ලබාදෙන අවස්ථාවේදී රජය සමඟ යම් ගිවිසුමක් ඇත්නම් එය පාර්ලිමේන්තු මන්ත්රීවරයකු ලෙස පත්වීමට නුසුදුසුකමක් බවත්, මීට පෙර රාජිත සේනාරත්න හා ඇල්බට් සිල්වා යන මන්ත්රීවරුන්ට ඒ හේතුවෙන් පාර්ලිමේන්තු මන්ත්රී ධුරය අහිමි වූ බවත්ය.
ආණ්ඩුක්රම ව්යවස්ථාවේ පාර්ලිමේන්තු මන්ත්රීවරයකු වීම සඳහා නුසුදුසුකම් යටතේ 91 ව්යවස්ථාවේ (ඉ) හි එය දැක්වෙන්නේ මේ ආකාරයටය. ‘රජය විසින් නැතහොත් රජය වෙනුවෙන් එළඹ ඇත්තා වූ යම්කිසි ගිවිසුමකට තැනැත්තකුගේ සම්බන්ධතාවක් තිබීම නිසා පාර්ලිමේන්තුවේ මන්ත්රීවරයකු වශයෙන් තෝරා පත් කර ගනු ලැබීමට හෝ පාර්ලිමේන්තුවේ අසුන් ගැනීමට සහ පාර්ලිමේන්තුවේදී ඡන්දය දීමට හෝ සුදුස්සෙක් නොවන්නේය.’
හිටපු ඇමතිවරයකු වූ රාජිත සේනාරත්නට ඔහුගේ මන්ත්රීධුරය අහිමි වූයේ ඔහු අධ්යක්ෂවරයකු වශයෙන් කටයුතු කළ සමාගමක් සැපයුම්කරුවකු ලෙස රාජ්ය ආයතනයකට දන්ත වෛද්ය උපකරණ සපයා ඇති බවට එල්ල වූ චෝදනාව නිසායි. ඒ අනුව එවක පාර්ලිමේන්තු මන්ත්රී ඩිලාන් පෙරේරා රාජිත සේනාරත්නගේ පාර්ලිමේන්තු මන්ත්රී ධුරයට එරෙහිව අභියාචනාධිකරණයට පෙත්සමක් ඉදිරිපත් කරමින් ඔහු පාර්ලිමේන්තු මන්ත්රීවරයකු ලෙස අසුන් ගැනීමට නුසුදුස්සකු වන බවට නියෝගයක් නිකුත් කරන ලෙස ඉල්ලීමක් කළ අතර ඉදිරිපත් වූ කරුණු මත අභියාචනාධිකරණය රාජිත සේනාරත්න පාර්ලිමේන්තුවේ අසුන් ගැනීමට නුසුදුස්සකු බවට තීරණය කළේය. ඒ අනුව රාජිත සේනාරත්න මහතාට ඔහුගේ පාර්ලිමේන්තු අසුන අහිමි විය. පසුව රනිල් වික්රමසිංහ මහතා ඔහුව ජාතික ලැයිස්තුවෙන් යළි පාර්ලිමේන්තුවට පත්කළේය.
එරංග වීරරත්න නියෝජ්ය ඇමතිවරයා මෙම වසරේ මාර්තු 31 දිනට අදාළව ජුනි 30 වැනි දින අත්සන් කර ලබාදී ඇති ඔහුගේ වත්කම් හා බැරකම් ප්රකාශය අනුව ඔහු Omobio (pvt) Ltd අධ්යක්ෂවරයකු වශයෙන් කටයුතු කරන බව සඳහන් කර තිබේ. ඊට අමතරව Spiceyaya (pvt) Ltd, Spice Fortress (pvt) Ltd, Textware (pvt) Ltd yd OmobioNG LLC-UAE යන සමාගම්වල අධ්යක්ෂ ධුර දරන බව සඳහන් කර ඇත. එමෙන්ම එම සමාගම්වල ඔහුට කොටස් අයිතිය ඇති බවද සඳහන් කර තිබේ. එහෙත් ඔහු පාර්ලිමේන්තුවේදී පිළිගත්Eimsky Business Solutions (pvt) Ltd ආයතනයේ කොටස් අයිතිය තිබෙන බවක් හෝ එහි අධ්යක්ෂවරයෙකු ලෙස කටයුතු කරන බවක් වත්කම් හා බැරකම් ප්රකාශයේ සඳහන් කර නැත. ඒ අනුව නියෝජ්ය ඇමතිවරයා Eimsky Business Solutions (pvt) Ltd සමාගමේ ඔහුට ඇති කොටස් අයිතිය පිළිබඳ තොරතුරු හා එහි අධ්යක්ෂවරයකු බවට කටයුතු කරන බවට වූ තොරතුරු සිය වත්කම් හා බැරකම් ප්රකාශයේදී සඟවා තිබේ.
එහෙත් ඔහු එම සමාගම්වල කොටස් අයිතියට අමතරව, දක්ෂිණ අධිවේගී මාර්ගයේ හා කොළඹ පිටත වටරවුම් මාර්ගයේ ව්යාපෘති සිදුකරන Omobio (pvt) Ltd හි මෙම වසරේ මාර්තු 31 දින වනවිටද අධ්යක්ෂවරයකු ලෙස කටයුතු කරන බව සිය වත්කම් හා බැරකම් ප්රකාශය මගින් පිළිගෙන තිබේ. නියෝජ්ය ඇමති ධුරය ලබා ගනිද්දී ඔහු එම සමාගම්වලින් ඉවත් වූ බවට ඔහු පාර්ලිමේන්තුවට කීවද නියෝජ්ය ඇමතිවරයකු ලෙස කටයුතු කරන සමයේද ඔහු එම සමාගම්වල අධ්යක්ෂවරයකු ලෙස කටයුතු කර තිබෙන බව ඒ අනුව අනාවරණය වේ. ඔහු විසින් කථානායකවරයාට ලබාදී එම වත්කම් හා බැරකම් ප්රකාශයම ඔහු පාර්ලිමේන්තු මන්ත්රීවරයකු ලෙස පාර්ලිමේන්තුවේ අසුන් ගැනීමට නුසුදුස්සකු බව සනාථ කර තිබේ. ඒ සඳහා අමුතුවෙන් වෙනත් සාධක අවශ්ය නොවන තත්වයක් ඔහුම උදාකර දී තිබේ.
පාර්ලිමේන්තු මන්ත්රී අමිල ප්රදීප් සිරිවර්ධන සඳහන් කරන සමාගම් දෙක අධිවේගී මාර්ග සම්බන්ධයෙන් වූ ව්යාපෘති ලබාගත්තේ 2019 වර්ෂයේදී බවත්, එම මෘදුකාංගවල නඩත්තු කටයුතු පමණක් මේ වනවිට සිදුකරමින් පවතින බවත්, තමාට කොටස් අයිතිය ඇති එම සමාගම් දෙක මෙම ආණ්ඩුව බලයට පත්වීමෙන් පසු රජයේ කිසිදු ව්යාපෘතියක් ලබාගෙන නැති බවත්, ඔහු ආණ්ඩුවේ තනතුරුවල කටයුතු කරන තෙක් රජයේ කිසිදු ව්යාපෘතියක් ලබා ගැනීමට ඉල්ලුම් නොකරන ලෙසත් දැනුම් දී ඇති බව නියෝජ්ය ඇමති එරංග වීරරත්න පාර්ලිමේන්තුව හමුවේ වැඩිදුරටත් පැවසීය.
එහෙත් අමිල ප්රදීප් මන්ත්රීවරයා එයට පිළිතුරු වශයෙන් පාර්ලිමේන්තුවේදී පැවසුවේ දක්ෂිණ අධිවේග මාර්ගයේ හා පිටත වටරවුම් මාර්ගයේ ආදායම් කළමනාකරණයත්, පද්ධති පාලනයත් නියෝජ්ය ඇමතිවරයාට අයත් සමාගමක්, එම ඇමතිවරයාට අයත් අමාත්යාංශය යටතේ සිදුකිරීම ළබැඳියාවන් අතර ගැටුමක් ඇතිකරන බව හා එය ආණ්ඩුවේ දූෂණ විරෝධී ප්රතිපත්තිය ව්යාජ දූෂණ විරෝධයක් බවට පත්කරන බවයි.
ඒ කෙසේ වෙතත්Eimsky Business Solutions (pvt) ආයතනය සිය ෆේස්බුක් පිටුවේ මෙම වසරේ නොවැම්බර් 24 දින සහිතව සඳහන් කරන්නේ ප්රවාහන අමාත්යාංශයට, ඩිජිටල් ආර්ථික අමාත්යාංශයට, ජාතික ප්රවාහන මණ්ඩලයට (එය ජාතික ගමනාගමන කොමිසම ලෙස නිවැරදි විය යුතුය) හා සියලුම අන්තර් පළාත් හා පළාත් පෞද්ගලික බස් හිමිකරුවන්ට සිය සුභ පැතුම් එක් කරන බවයි.
ඔවුන් එසේ සුභ පැතුම් එක් කරන්නේ පෞද්ගලික බස් රථවලවල බැංකු කාඩ් පත් මගින් ටිකට් ලබා ගැනීමේ පහසුකම නිල වශයෙන් හඳුන්වාදීම හා එම පෞද්ගලික බස් ටිකට් ඩිජිටල්කරණ ව්යාපෘතිය එම සමාගම කිරීම හේතුවෙනි.
ඒ සම්බන්ධයෙන් වැඩිදුරටත් සඳහන් කරන්නේ එම මුලපිරීම පිටුපස තාක්ෂණ සක්රිය කරන්නා වීම ගැන එම සමාගම ආඩම්බර වන බවයි. කෙටි කාලයක් තුළ මාර්ග 25ක් සහ බස්රථ 20ක් ඔවුන් සාර්ථකව සම්බන්ධ කළ බවයි. එමෙන්ම ඉදිරියට එහි තවත් කටයුතු පෙළ ගැසී තිබෙන බවයි.
ඒ අනුව පැහැදිලි වන කරුණ වන්නේ මෙම ආණ්ඩුව බලයට පත්වීමෙන් පසු නියෝජ්ය ඇමති එරංග වීරරත්නට කොටස් අයිතිය ඇති සමාගමක් රජයේ කොන්ත්රාත්තුවක් ලබාගෙන ඇති බවයි. එම කොන්ත්රාත්තුව නියෝජ්ය ඇමතිවරයා ප්රසිද්ධ දේශපාලනයට ඒමට පෙර ඔහුගේ සමාගම් දක්ෂිණ අධිවේගී මාර්ගයේ හා කොළඹ පිටත වටරවුම් මාර්ගයේ ලබාගත් පෙර සඳහන් කළ කොන්ත්රාත් නොවේ. එම කොන්ත්රාත් සඳහා ඔවුන් සමඟ සම්බන්ධ වූයේ එම මාර්ග කළමනාකරණය කරනු ලබන මාර්ග සංවර්ධන අධිකාරියයි. එහෙත් මෙම බස් ටිකට් ඩිජිටල්කරණය කිරීමට අදාළ කටයුත්ත මාර්ග සංවර්ධන අධිකාරියට අයත් එකක් නොවේ. එය අදාළ වන්නේ ජාතික ගමනාගමන කොමිෂන් සභාවට හා පළාත් මාර්ගස්ථ මගී ප්රවාහන අධිකාරිවලටය. ඉහත සඳහන් ඔවුන්ගේ ෆේස්බුක් සුබපැතුමේ පවා මාර්ග සංවර්ධන අධිකාරියක් ගැන සඳහන් නොවන්නේ ඒ නිසාය.
ඒ අනුව මෙම ඩිජිටල්කරණ කටයුත්ත නියෝජ්ය ඇමතිවරයා පාර්ලිමේන්තුවේ කියූ ආකාරයට ඔහු ප්රසිද්ධ දේශපාලනයට ඒමට පෙර ඔහුගේ සමාගම් අධිවේගී මාර්ග සම්බන්ධයෙන් වන මෘදුකාංගය නඩත්තු කිරීමේ කටයුත්තක් නොවේ. මෙම ආණ්ඩුව යටතේ ඔහුගේ සමාගමට අලුතින්ම ලබාගත් වෙනත් කොන්ත්රාත්තුවකි.
මෙම කොන්ත්රාත්තුව සම්බන්ධයෙන් අවධානය යොමු කිරීමේදී තවත් දෙයක්ද අනාවරණය වේ. ඒ මෙම කොන්ත්රාත්තුව ලබාදීම සම්බන්ධයෙන් ප්රවාහන අමාත්යාංශය හෝ ජාතික ගමනාගමන කොමිසම හෝ ප්රසම්පාදනයක් කැඳවා නැති බවය. රජයේ මුද්රිත හා විද්යුත් ප්රසම්පාදනයන් ගැන තොරතුරු ඇතුළත් https://www.promise.lk අනුව මෙම කටයුත්ත සඳහා කැඳවූ ප්රසම්පාදනයක් හෝ එවැනි ප්රසම්පාදනයක් මත ලබාදුන් කොන්ත්රාත්තුවක් ගැන සඳහන් වන්නේ නැත.
එරංග වීරරත්න නියෝජ්ය ඇමතිවරයා පාර්ලිමේන්තුවට එන්නේ ජාතික ජන බලවේග ජාතික ලැයිස්තුවෙනි. 2024 පැවති පාර්ලිමේන්තු මැතිවරණය සඳහා ජාතික ජන බලවේගය සිය ජාතික ලැයිස්තුව ප්රකාශයට පත්කරන්නේ එම වසරේ ඔක්තෝබර් 11 වැනිදාය. ඒ අනුව ඔහු එම දිනයට පෙර මාර්ග සංවර්ධන අධිකාරිය සමඟ ගිවිසුම්ගතව ඇති ඔහු අධ්යක්ෂ ධුර දරන එම සමාගම්වලින් ඉවත් වී තිබිය යුතුය. පාර්ලිමේන්තු මැතිවරණයෙන් පසු ඔහු නියෝජ්ය ඇමති ධුරයේ දිව්රුම් දෙන්නේ එම වසරේ නොවැම්බර් 21 වැනිදාය. එම දිනයට පෙර ඔහු එම සමාගම්වල අධ්යක්ෂ ධුරයෙන් ඉවත් වුවද, එයද මන්ත්රී ධුරය දැරීම සඳහා ඔහු නුසුදුස්සකු බවට පත්කරයි.
කෙසේ වෙතත් ඉහත අප සඳහන් කළ ආකාරයට ඔහුගේ වත්කම් හා බැරකම් ප්රකාශය අනුව නම් ඔහු මෙම වසරේ මාර්තු 31 දින වනවිටත් ප්රශ්නගත සමාගම්වල අධ්යක්ෂ ධුරවල කටයුතු කර ඇති බව පිළිගනියි. ඒ මගින්ම ඔහු පාර්ලිමේන්තු මන්ත්රීවරයකු ලෙස අසුන් ගැනීමට නුසුදුස්සකු වී තිබේ. ඊට අමතරව ඔහු මේ වනවිටත් එම සමාගම්වල අධ්යක්ෂ ධුරවලින් ඉවත් වී තිබුණද මෙම ආණ්ඩුව බලයට පත්වීමෙන් පසු ඔහුට කොටස් අයිතිය ඇති සමාගමකට බස් ටිකට් ඩිජිටල්කරණය සම්බන්ධයෙන් අලුත් කොන්ත්රාත්තුවක් ලබාගෙන තිබේ. එහි ඇති තවත් ප්රශ්නගත දෙයක් වන්නේ ඔහු නියෝජ්ය ඇමතිවරයා වශයෙන් කටයුතු කරන ඩිජිටල් ආර්ථික කටයුතු අමාත්යාංශය එම කටයුත්තට සම්බන්ධ වී තිබීමයි. මීට අමතරව අධිවේගී මාර්ගවල බැංකු කාඩ්පත් මගින් ගෙවීම් කිරීමේ පහසුකම ඇතිකරන ලද්දේද මෙම ආණ්ඩුව බලයට පත්වීමෙන් පසු මෙම වසරේ අප්රේල් මාසයේදී බවද අප අමතක කළ යුතු නැත. එය සිදුකළේද නියෝජ්ය ඇමතිවරයාට අයත් සමාගම්ය. නිදහසට කරුණක් ලෙස අවශ්ය නම් එම කාඩ් මගින් ගාස්තු ගෙවීමේ පහසුකම ඔවුන්ගේ මුල් කොන්ත්රාත්තුවේ නඩත්තු දිගුවක් බවද කිව හැකිය.
ඒ කෙසේ වෙතත් අනෙක් තොරතුරු මත හෝ නීතියේ පාලනය පිළිබඳ උනන්දුවක් දක්වන අයකු අධිකරණය ඉදිරියට ගොස් එරංග වීරරත්න නියෝජ්ය ඇමතිවරයා මන්ත්රීවරයකු ලෙස කටයුතු කිරීමට නුසුදුස්සකු බවට තීන්දුවක් ලබා ගතහොත් ඔහුද මන්ත්රීකම දැරීමට නුසුදුස්සකු බවට පත්වනු ඇත.
