No menu items!
23.4 C
Sri Lanka
26 May,2024

හරීන් රොෂාන්ගේ ගැසට්ටුව ඉවත් කිරීමේ දිශාවට

Must read

රොෂාන් ඉවත් කිරීමට ජනාධිපතිගෙන් යළි බොරු
ක්‍රිකට් අත්හිටුවූයේ කැබිනට් තීරණයට පෙර
ඇමති කමිටුව දැම්මේ අයිසීසී තහනමට පෙර

ක්‍රීඩා හා වාරිමාර්ග ඇමති රොෂාන් රණසිංහ ජනාධිපතිවරයා එම අමාත්‍ය ධුරවලින් ඉවත් කරන්නේ ඉතිහාසයේ මෙතෙක් ඇමතිවරයෙකු ධුරයෙන් ඉවත් නොකළ ආකාරයකිනි. ඒ නොවැම්බර් 27 වැනිදා පැවති කැබිනට් මණ්ඩල රැස්වීමට රොෂාන් රණසිංහ ඇමතිවරයා සහභාගි වූ අවස්ථාවේදී ඔහු ඇමති ධුරයෙන් ඉවත් කළ බවට ජනාධිපතිවරයා ලිපියක් ලබාදීම මගින්ය.

මෙම ඉවත් කිරීමට හේතුව වශයෙන් රොෂාන් රණසිංහ මහතා පාර්ලිමේන්තුවට කීවේ කැබිනට් මණ්ඩලය ගත් තීරණයකට එරෙහිව කටයුතු කිරීම නිසා තමා ඉවත් කළ බව දැනුම් දුන් බවයි. එම හේතුව වශයෙන් ඔහු කීවේ ශ්‍රී ලංකා ක්‍රිකට් ආයතනය සඳහා අතුරු පාලක මණ්ඩලයක් පත් කරනවා නම් ඒ සඳහා කැබිනට් මණ්ඩලයේ අවසරය ලබාගත යුතු බවට ලබාගත් කැබිනට් මණ්ඩල තීරණයක් උල්ලංඝනය කිරීම නිසා ඔහු ධුරයෙන් ඉවත් කරන බව දැනුම් දුන් බවයි. රොෂාන් රණසිංහ මහතා පාර්ලිමේන්තුවේදී ඒ ගැන වැඩිදුරටත් කීවේ එසේ කැබිනට් මණ්ඩලය තීරණයක් ගත්තේ යැයි කියන රැස්වීමට ඔහු සහභාගි නොවූ බවත්, එදින එම කැබිනට් මණ්ඩල රැස්වීමට සහභාගි වූ සාමාජිකයන්ගෙන් ඒ ගැන විමසීමේදී එවැනි තීන්දුවක් ගත්තේ නැති බව පැවසූ බවයි.

මෙම ප්‍රශ්නගත කැබිනට් මණ්ඩල තීන්දුව ගැන ප්‍රචාරය කරනු ලැබුයේ ජනාධිපති මාධ්‍ය අංශය වන අතර ඊට අත්තටු දෙනු ලැබුයේ විශේෂයෙන් ජනාධිපතිවරයාගේ මාමාගේ පුවත් ආයතනය වන විජය නිව්ස් පේපර්ස් ආයතනයේ පුවත්පත් හා ශ්‍රී ලංකා ක්‍රිකට් ආයතනය සමඟ සම්බන්ධකම් ඇතැයි මේ වනවිට සිය මාධ්‍ය වාර්තාකරණයන් මගින් පෙන්නුම් කරමින් සිටින මාධ්‍යවේදීන් යැයි කියා ගන්නා පිරිස විසිනි.

අප පසුගිය කලාපයක පෙන්වා දුන් පරිදි කැබිනට් මණ්ඩලය තීරණයක් ගත්තේ යැයි කියන දිනයේ එනම් නොවැම්බර් 13ට අදාළ කැබිනට් මණ්ඩල තීරණ අදටත් රජයේ නිල වෙබ් අඩවිය වන www.news.lk හෝ කැබිනට් මණ්ඩල වෙබ් අඩවිය වන www.cabinetoffice.gov.lk වෙබ් අඩවියේද දක්නට නැත.

ඒ නිසාම මෙහිදී මතකයට නැඟෙන්නේ කෙරවලපිටිය යුග දනවි බලාගාරය සම්බන්ධයෙන් හා ශ්‍රී ලංකාවට ද්‍රවිකෘත ගෑස් සැපයීම සම්බන්ධයෙන් ඇමරිකානු නිව් ෆෝට්රස් සමාගම සමඟ ඇතිකරගත් ගිවිසුම අභියෝගයට ලක්වූ අවස්ථාවේදී එය කැබිනට් මණ්ඩලයට ඉදිරිපත් කර අනුමැතිය ලබාගත් බවට එවක මුදල් ඇමති බැසිල් රාජපක්ෂ වෙනුවෙන් අධිකරණයට කරුණු දැක්වූ අවස්ථාවය. එවක කැබිනට් මණ්ඩල සාමාජිකයන් වූ වාසුදේව නානායක්කාර, විමල් වීරවංශ හා උදය ගම්මන්පිල අධිකරණයට අතරමැදි පෙත්සම් ඉදිරිපත් කරමින් ප්‍රකාශ කළේ ඔවුන්ද සහභාගි වූ එම කැබිනට් මණ්ඩල රැස්වීමේදී එවැනි තීරණයක් නොගත් බව හා ඒ සම්බන්ධයෙන් සාකච්ඡාද නොවූ බවය. එම නඩුවේ වගඋත්තරකරුවන් වූ කැබිනට් මණ්ඩල සාමාජිකයන් වෙනුවෙන් නීතිපතිවරයා පෙනී සිටි අතර ඉහත සඳහන් කැබිනට් මණ්ඩල සාමාජිකයන් වෙනුවෙන් වෙනත් නීතිඥයෝ පෙනී සිටියහ. ඒ ඔවුන් වෙනත් ස්ථාවරයක් දැරීම හේතුවෙනි. අවසානයේ සිදුවූයේ කුමක්ද? බහුතර කැබිනට් මණ්ඩල සාමාජිකයන් වෙනුවෙන් පෙනී සිටි නීතිපතිවරයා එවැනි කැබිනට් මණ්ඩල තීරණයක් ගත් බවට අධිකරණය හමුවේ කළ දැනුම්දීම අධිකරණය පිළිගනිමින් වාසුදේව, විමල් හා ගම්මන්පිලගේ කරුණු දැක්වීම් ඉවත දැමීමය.

ඉන් සිදුවූයේ කැබිනට් මණ්ඩල අනුමැතියට තබා සාකච්ඡාවට වත් ඉදිරිපත් නොකරන ලද යෝජනාවක් නීතිය හමුවේ කැබිනට් මණ්ඩලයට ඉදිරිපත් කළ බවට සනාථ වීමය. ක්‍රිකට් සඳහා අතුරු කමිටු පත් කිරීමට පෙර එය කැබිනට් මණ්ඩලයට ඉදිරිපත් කර සම්මත කරගත යුතු බවට සම්මත කළේ යැයි කියන ජනාධිපති රනිල් වික්‍රමසිංහගේ යෝජනාවත් එබඳුය. රොෂාන් රණසිංහට පෞද්ගලිකව කීවද, අඩුම තරමේ වාසුදේව, විමල් හා ගම්මන්පිල තරම්වත් එවැනි යෝජනාවක් කැබිනට් මණ්ඩලයට නොආ බවට හා එවැන්නක් සම්මත නොකළ බවට ප්‍රසිද්ධියේ කීමට කිසිවකු මෙම කැබිනට් මණ්ඩලයේ නැත. ඒ මගින් මෙම කැබිනට් මණ්ඩල සාමාජිකයන්ගේ කොඳුවල තත්වය ගැන අදහසක් ලබාගත හැකිය.

හිටපු ක්‍රීඩා ඇමති රොෂාන් රණසිංහ ශ්‍රී ලංකා ක්‍රිකට් ආයතනයේ ලියාපදිංචිය අත්හිටුවා අතුරු පාලක මණ්ඩලයක් පත්කිරීම සඳහා අති විශේෂ ගැසට් නිවේදනයක් නිකුත් කරන්නේ නොවැම්බර් 05 වැනිදාය. ඒ අංක 2356/43 අති විශේෂ ගැසට් පත්‍රය මගින් 1973 අංක 25 දරන ක්‍රීඩා පනතෙන් ඔහුට ලැබී ඇති බලතල අනුවය. දැනට ප්‍රකාශයට පත්කර නැති ගත්තේ යැයි කියන ක්‍රිකට් සඳහා අතුරු කමිටු පත් කිරීමේදී කැබිනට් මණ්ඩලයෙන් අනුමැතිය ගත යුතු බවට වන කැබිනට් මණ්ඩල තීරණය ගෙන ඇත්තේ නොවැම්බර් 13 වැනිදාය. ඒ අනුව හිටපු ක්‍රීඩා ඇමති රොෂාන් රණසිංහගේ තීරණය ගෙන ඇත්තේ කැබිනට් මණ්ඩල තීරණයට පෙරය. ඒ නිසාම රොෂාන් රණසිංහව ඇමති ධුරයෙන් ඉවත් කිරීම සඳහා ජනාධිපතිවරයා හේතු වශයෙන් සඳහන් කළා යැයි මාධ්‍ය වාර්තා කරන කැබිනට් තීරණයකට එරෙහිව යෑමක් හෙවත් කැබිනට් මණ්ඩල සාමුහිකත්වය කඩ කිරීමක් එහිදී සිදුවී නැත.

ඒ සම්බන්ධයෙන්ම කියවෙන අනෙක් කාරණය වන්නේ ශ්‍රී ලංකා ක්‍රිකට් ජාත්‍යන්තර ක්‍රිකට් කවුන්සිලය හෙවත් අයිසීසී තහනම ඉවත් කිරීම සම්බන්ධයෙන් කටයුතු කිරීම සඳහා අලි සබ්රි ඇමතිවරයාගේ ප්‍රධානත්වයෙන් කැබිනට් උප කමිටුවක් පත්කර තිබියදී විපක්ෂ නායක සජිත් ප්‍රේමදාස සමඟ එක්වී රොෂාන් රණසිංහ ඉන්දියානු මහා කොමසාරිස්වරයා මගින් ඉන්දියාවට කතා කිරීමට ගත් උත්සාහය කැබිනට් මණ්ඩල සාමූහිකත්වය බිඳ දමා ඇති බවයි.

ඒ සම්බන්ධයෙන් නොවැම්බර් 28 දින පාර්ලිමේන්තුව අමතමින් රොෂාන් රණසිංහ පවසා තිබුණේ විපක්ෂ නායක කාර්යාලයට ඔහු ගියේ විපක්ෂ නායකවරයාගේ ආරාධනයකට අනුව බවත්, එහි යන විට ඉන්දීය මහා කොමසාරිස්වරයා එහි සිටි බවත්, විපක්ෂ නායක කාර්යාලයට යන ඕනෑ තරම් ඇමතිවරු සිටිනා බවත්, එමෙන්ම ජනාධිපතිවරයාගේ කැබිනට් කමිටුව පත්කර තිබුණේ ක්‍රීඩා නීතිය සකස් කිරීමට බවත්, අයිසීසී තහනම ඉවත් කිරීමට නොවන බවත්ය.

ඒ සම්බන්ධයෙන් මාධ්‍ය වාර්තා කළේ රොෂාන් රණසිංහගේ ගැසට් නිවේදනය ගැන සොයා බලන්නට එම කමිටුව පත්කළ බවයි. එහිදී හිටපු ක්‍රීඩා ඇමතිවරයා නොකියූ කතාවක්ද තිබේ. ඒ අයිසීසිය ශ්‍රී ලංකා ක්‍රිකට් තහනම් කරනු ලැබුයේ ඇමති කමිටුව පත් කිරීමෙන් පසුව බවයි. ජනාධිපතිවරයා අලි සබ්රි ඇමතිවරයාගේ ප්‍රධානත්වයෙන් කැබිනට් මණ්ඩල කමිටුවක් පත් කරන්නේ නොවැම්බර් 06 වැනිදාය. අයිසීසීය ශ්‍රී ලංකා ක්‍රිකට් තහනම් කරන්නේ නොවැම්බර් 10 වැනිදාය. ඒ අනුව අයිසීසී තහනම ඉවත් කිරීම සඳහා තහනමට පෙර ඇමති කමිටුවක් පත්කළා යැයි කීම තරම් තවත් විහිළුවක් නැත. ජනාධිපතිවරයා ක්‍රීඩා ඇමතිකමෙන් රොෂාන් රණසිංහ ඉවත් කිරීම සඳහා ඉදිරිපත් කර ඇති එම හේතු දැක්වීම සඳහාද පදනමක් නැත.

එසේම රොෂාන් රණසිංහ ඉවත් කිරීමේ ලිපිය ලබාදුන් කැබිනට් මණ්ඩල රැස්වීමේදී ජනාධිපතිවරයා ඔහුට එල්ල කරන ලද චෝදනාවලට පිළිතුරු නොදී සිටි බවට පළකර ඇති මාධ්‍ය වාර්තා සම්බන්ධයෙන් ඔහු නොවැම්බර් 28 වැනිදා පාර්ලිමේන්තුවේ ප්‍රතිචාර දක්වමින් පැවසුවේ මහවැලි ඉඩම් බෙදා දීම් සම්බන්ධ අදාළ පැහැදිලි කිරීම් ඔහු එහිදී කළ බවත්, එම කරුණ 2022 වර්ෂයට අදාළ එකක් බවත් හා ඉඩම් බෙදා දීමේ බලය ඇත්තේ ඔහුට නොව ජනාධිපතිවරයාට බවත්ය.

ශ්‍රී ලංකා ක්‍රිකට් ආයතනය සම්බන්ධයෙන් හිටපු ක්‍රීඩා ඇමති රොෂාන් රණසිංහ ප්‍රකාශයට පත්කළේ ක්‍රීඩා පනත යටතේ ඔහුට බලය පැවරී තිබුණ නියෝගයකි. ක්‍රීඩා ඇමතිවරයා පමණක් නොව අනෙකුත් ඇමතිවරුන්ද ඔවුන්ට පැවරී ඇති බලය අනුව නියෝග හා රෙගුලාසි පැනවීම සිදුකරයි. දැනුදු සිදුකරමින් පවතී. අනෙකුත් ක්‍රීඩා සම්බන්ධයෙන් හිටපු ක්‍රීඩා ඇමති රොෂාන් රණසිංහ පසුගිය කාලයේ මේ ආකාරයට අතුරු කමිටු පත්කර තිබේ. එහෙත් ඒ කිසිවක් ගැන ජනාධිපතිවරයාටවත් ඔහුගේ ජ්‍යෙෂ්ඨ උපදේශක හා කාර්ය මණ්ඩල ප්‍රධානී වන සාගල රත්නායකටවත් කිසිදු ප්‍රශ්නයක් පැන නැඟුණේ නැත. ප්‍රශ්නයක් ඇති වූයේ ක්‍රිකට් සම්බන්ධයෙන් රෙගුලාසි පැනවීමේදී පමණය.

ක්‍රීඩා ඇමතිකමෙන් රොෂාන් රණසිංහව ඉවත් කිරීමෙන් ජනාධිපතිවරයා තවදුරටත් පෙන්නුම් කළේ සාගල රත්නායක නිසා හෝ වෙනත් හේතුවක් නිසා හෝ ශ්‍රී ලංකා ක්‍රිකට් ආයතනයේ වත්මන් පරිපාලනය සම්බන්ධයෙන් ඔහුට ඇති ළැදියාවයි. කැබිනට් සාමූහිකත්වය පිළිබඳ මේ වනවිට කියා ඇති බොරු හේතු නිසා හෝ ඔහුව ඉවත් කරනවා නම් ඉවත් කළ යුතුව තිබුණේ මීට පෙරය. එහෙත් මේ අවස්ථාවේ ඔහුව හදිසියේම ඉවත් කරන්නේ වෙන කිසිවක් නිසා නොව ශ්‍රී ලංකා ක්‍රිකට් ආයතනයේ ලියාපදිංචිය අත්හිටුවා අතුරු කමිටුවක් පත් කිරීම සම්බන්ධයෙන් පැවැත්වෙන අභියාචනාධිකරණ විභාගය නිසාය. එම නඩුවට රොෂාන් රණසිංහ නීතිපතිවරයාගේ සහයෝගය ලබා නොගනිමින් පෞද්ගලික නීතිඥයින් යොදවා ඇත. පාර්ලිමේන්තුවේදී පවා ඔහු කීමේ එම නඩුව සම්බන්ධයෙන් නීතිපතිවරයා පවා මඟහැරි බවයි. අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සම්බන්ධයෙන් කරුණු හෙළිදරව් කිරීමෙන් පසු ඔහු එම නඩු විභාගයෙන් ඉවත් වී ඇති අතර රොෂාන් රණසිංහගේ ගැසට් නිවේදනයට එරෙහිව මුලින් ලබාදී තිබූ තහනම් නියෝගයද ඉවත් කර තිබේ.

තවදුරටත් තහනම් නියෝගයක් ලබාදෙනවාද නැද්ද යන්න ගැන තීරණය කිරීම සඳහා දෙපාර්ශ්වයේ නීතිඥයන්ගේ තර්ක විතර්ක මේ දිනවල අධිකරණය විමසමින් සිටී. තහනම් නියෝගයක් යළි ලබා නොදුන්නොත් ක්‍රිකට් අතුරු කමිටුව වලංගු වන අතර ෂම්මි සිල්වා ඇතුළු ශ්‍රී ලංකා ක්‍රිකට් නඩයට ගෙදර යෑමට සිදුවනු ඇත.

ඒ නිසා කළ යුතුව තිබුණේ රොෂාන් රණසිංහ ක්‍රීඩා ඇමති ධුරයේ නැති තත්වයක් උදා කිරීමය. ජනාධිපතිවරයා ඔහුට ඇති බලතල යටතේ දැන් එය සිදුකර ඇත. ජනාධිපතිවරයාගේ වුවමනාව අනුව එම ගැසට් පත්‍රයේ වලංගුභාවය අහෝසි කිරීමට නම් නව ක්‍රීඩා ඇමති හරීන් ප්‍රනාන්දු කළ යුත්තේ එය අහෝසි කිරීමය. සිදු කිරීමට නියමිතව ඇත්තේ එය බව පෙනේ. ඒ අභියාචනාධිකරණ නඩුවට සම්බන්ධ වෙමින් නව ක්‍රීඩා ඇමතිවරයාගේ නීතිඥයන් එම ගැසට් පත්‍රය සම්බන්ධයෙන් ඉදිරියට කටයුතු නොකරන බවට පැවසීමය. එමෙන්ම ඒ සම්බන්ධයෙන් නව ක්‍රීඩා ඇමතිවරයාගේ ස්ථාවරය ගැන කියන්නටද අවස්ථාවක් ඉල්ලා ඇති අතර ඒ සඳහාද අධිකරණයේ අවසරය ලැබී තිබේ.

ඒ අනුව දෙසැම්බර් 05 වැනිදා නැවත කැඳවීමට නියමිතව ඇති ශ්‍රී ලංකා ක්‍රිකට් ආයතනය අත්හිටුවීමේ ගැසට් පත්‍රයට එරෙහි නඩුවේදී රොෂාන් රණසිංහගේ ගැසට් පත්‍රය ඉල්ලා අස්කර ගැනීමේ ස්ථාවරයක් නව ක්‍රීඩා ඇමති හරීන් ප්‍රනාන්දු ප්‍රකාශයට පත්කළහොත් එය පුදුමයට කරුණක් නොවනු ඇත. පාස්කු ඉරුදින ප්‍රහාරය සම්බන්ධයෙන් රාජපක්ෂවරුන්ට එරෙහිව මෙන්ම වෙනත් කරුණු සම්බන්ධයෙන් රනිල් වික්‍රමසිංහට ද එරෙහිව බරපතළ ප්‍රකාශ කර දැන් ඔවුන් තුරුලේම සිටින ඔහුට එය බරපතළ ප්‍රශ්නයක් නොවනු ඇත. එම ගැසට් නිවේදනය ආපස්සට ගත්තොත් ජනාධිපති රනිල් වික්‍රමසිංහ, සාගල රත්නායක ඇතුළු ශ්‍රී ලංකා ක්‍රිකට් වත්මන් බලධාරීන් තාවකාලිකව හෝ ජයග්‍රාහකයින් වනු ඇත. ශ්‍රී ලංකා ක්‍රිකට් සම්බන්ධයෙන් පාර්ලිමේන්තුවේ ඒකමතිකව සම්මත කරගත් යෝජනාව පුස්සක් වනු ඇත.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි