ශ්‍රී ලංකාවේ පුද්ගලික ටී.වී. චැනල යනු මුඛ්‍යාර්ථයෙන් ගත්කල පුරවැසියාගේ බුද්ධිය, දැනුම, විනෝදය හෝ රසිකත්වය ඉහල නැංවීම වෙනුවෙන් මාධ්‍ය හසුරුවන ආයතන නොවේ. ඒවා තම සිල්ලර මාධ්‍යකරණය සමග ලාභය උදෙසා වසල වෙළඳාමකද නියැලෙන ව්‍යාපාරික ආයතන වෙයි. ලාභය උදෙසා පහසු මවත් සොයාගෙන ඇති මේ චැනල ජනප්‍රිය රියැලිටි වැඩසටහන් මෙන්ම ඉතා ග්‍රාම්‍ය ටෙලිනාට්‍ය විකාශය කරයි. එහෙත් වඩාත් හානිකර හා කැතම උපක්‍රමය වන්නේ සමාජය මිථ්‍යා අන්ධකාරයේ ගිල්වා දමමින් නොයෙක් වර්ගයේ කට්ටඩින් හා එක්ව කරන්නාවූ ජාවාරමයි. සමාජයේ පවතින අවිචාරය හා මුග්ධත්වය දෙපාර්ශ්වයටම ලාභ ගෙනදුන් ධන උල්පතකි. ඒ අතින් ගත්කල කේරල ගංජා ජාවාරම එතරම්ම නරක එකක් නොවන බැව් තුලනාත්මකව පෙන්වා දිය හැකිය.
මෙලෙස එවන් එක් ටී.වී. චැනලයක් කාලයක් පුරා විවිධ තක්කඩින් හා මානසික රෝගීන් ටෙලිවිෂන් තිරය ඉදිරියට කැඳවා ඔවුන්ගෙන් ඊට මුදල් අයකර ප්‍රචාරණ වැඩසටහන් විකාශය කළේය. සමාජය අවිචාරී මුග්ධත්වය වෙත දක්කාගෙන යමින් කරදරයකින් තොරව වසල ව්‍යාපාරය සාර්ථකව ඉදිරියට යමින් සිටි මොහොතක පසු ගියදා අහම්බයෙන් හෙණයක් කඩා පාත් වුණි. බෙලි කටුවකින් වාසනාව ප්‍රාදුර්භූත කරමින් සිටි වාලම්පුරි කට්ටඩියෙකු මෙම ටී.වී. චැනලය හා සමග හවුලේ කරගෙන ගිය ජාවාරම නිරාවරණය වුයෙන් පොලිස් අත්අඩංගුවට පත්ව දැනට ඇප පිට නිදහස්ව ඇත. ඔහු ලක්ෂ ගණනකට අලෙවි කල මුහුදු බෙලි කටුව, ඇමෙරිකාවේ වෙරළ තීරයෙන් සුලභව සොයා ගතහැකි නොවටිනා එකක් බැව් (‘නාරා’ ආයතනයේ විනිශ්චය මත) දැන් ප්‍රසිද්ධියට පත්ව ඇත. මොහුට එරෙහිව තවත් මෙවැනි පැමිණිලි පොලිසිය වෙත ලැබී ඇති බව දැන් පොලිසියද ප්‍රකාශ කරයි.
මීට සති කිහිපයකට පෙර මෙහි තීරු ලිපියක් (“වාලම්පුරි වාසනාව”) මගින්ද පෙන්වා දුන්නේ එලෙස ඇමෙරිකා එක්සත් ජනපදයේ (මුහුදු ආහාර/ ීැ් දෙදාි වලට ගෙන) ඉවතලන මුහුදු බෙලිකටු තොග පිටින් ඉන්දියාව වැනි රටවලට අපනයනය කරන කාරණයයි. එලෙස ඉතා ලාභයට ගෙන්වාගන්නා බෙලි කටු, මහත් අනුහස් ඇති, වාසනාව උදාකරන වාලම්පුරි ලෙස ලක්ෂ ගණනකට අපේ හුදී ජනයාට අලෙවි කරනු ලබයි.
එකී බෙලිකටු වේවා නිසැක බෙලිකටු/වාලම්පුරි වේවා ඒවා හුදෙක් කැල්සියම් කාබනේට් සංයුතියක් හැරුණුවිට වෙනත් කිසි වාසනා බල මහිමයක් ඇති ඒවා නොවන වග පැහැදිලි කර දුන්නද ඉන් අපේ සමාජයේ ගුප්ත ලෝලී ව්‍යාධිය සුවපත් නොවන බැව් අප සක්සුදක් සේ ප්‍රත්‍යක්ෂ කොට ඇත.
එලෙස අපට ක්ෂණිකව හා පහසුවෙන් වාසනාව හා සමෘද්ධිය උදා කළ හැකිනම් මේ අසරණ හක් බෙල්ලන් මිනිස් සංහතිය වෙනුවෙන් කරන ලද ඉමහත් පරිත්‍යාගයට අපි සදා ණයගැති විය යුතු වෙමු.
අපේ සමාජයේ බහුතරයක් ප්‍රාර්ථනා කරන්නේ මහන්සි නොවී වාසනාව උදාකර ගැනීමේ කෙටි මාර්ගයක් පිළිබඳවයි. මේ මෝඩ උත්සාහය කෙතරම් බරපතළ මානසික රෝගයක් දක්වා උත්සන්නවී ඇති ව්‍යසනයක්ද යත් එකී උමතුව මෙවන් කට්ටඩින් හට නම් මහත් වාසනාවක් උදාකර ඇත.
ඊට අමතරව ජිප්සම් ආදියෙන් මෙවන් වාලම්පුරි කෘත්‍රිමව නිපදවන ව්‍යාපාර ද මෙතුළින් වාසනාව උදාකරගෙන ඇත.
කෙසේමුත් මේ වාලම්පුරි කට්ටඩියාට වූ ඇබැද්දිය අපේ බොහෝ ජාතික (ගොසිප්) පුවත්පත් (ප්‍රවෘත්තිමය වශයෙන් හෝ) රසවත් ප්‍රවෘත්තියක් කරගතේ නැත; බුද්ධිමය ප්‍රතිලාභයක් කරගත්තේද නැත. විවිධ ජාවාරම් නීතියේ රැහැනට හසුවූ විට ඒ පිළිබඳව මහත් උදාරම්ව පුවත් මවන මේ ජාතික පුවත්පත් මේ අරබයා මුනිවත රැක්කේය. මක්නිසාද මේ එක් ආකාරයකින් හෝ තවත් ආකාරයකින් මෙකී පුවත්පත්ද අඩුවැඩි වශයෙන් මේ වසල ව්‍යාපාරයෙන් මුදල් උපයා ගන්නා බැවිනි; තමන්ද සුජාත මධ්‍යකරණයක නියැලෙන්නේ නැති බැව් මෙයින් යම් තරමකට නිරාවරණය බැවිනි.
එහෙත් අපේ හුදී ජනයා මින් පාඩමක් උගෙන මේ මිථ්‍යා අන්ධකාරයෙන් හා ජාවාරම්කාරයන්ගෙන් අත්-නොමිදෙනු සහතිකය;
එපමණටම මේ ටෙලිවිෂන් නාලිකා ඉන් ලැජ්ජාවට පත්ව තම වසල ජාවාරම පිළිබඳව යළි සලකා නො-බලනු සහතිකය.
එනිසා හෙට සිට ඔවුනට මේ චැනලය තුළින් අලුත් හොරෙක් අවශ්‍ය වනු ඇත. ටී.වී. චැනලවලටද වෙනස් අලුත් හොරෙක් අවශ්‍ය වනු ඇත.
අපේ හුදී ජන සමාජයද දේශපාලන සමාජයද ඉල්ලා සිටින්නේ අලුත් මිනිසුන් නොව අලුත් හොරුන්ය.
එනිසා මේ වැදගත් පාඩම, පවතින අන්ධකාරයට එදිරි ප්‍රයෝජනවත් යමක් නොවී අපතේ ගිය එකක්වී, අලුත් හොරෙකුට අලුත් අවස්ථාවක උදාවීමක් පමණක් වන වග කෙටි කලකින්ම අපට සනාත කරනු ඇත.■
■ තාරක වරාපිටිය
