විශ්වවිද්යාල පද්ධතිය මුහුණ දී සිටින ගැටලු සම්බන්ධයෙන් අග්රාමාත්ය සහ අධ්යාපන, උසස් අධ්යාපන හා වෘත්තීය අධ්යාපන අමාත්ය ආචාර්ය හරිනි අමරසූරිය මහත්මිය සමඟ පැවති සාකච්ඡාවේදී කිසිදු විසඳුමකට පැමිණීමට නොහැකි වූ බව විශ්වවිද්යාල ආචාර්යවරුන්ගේ සංගම් සම්මේලනය පවසයි.
FUTA නියෝජිතයන් සහ අග්රාමාත්යවරිය අතර මෙම සාකච්ඡාව සැප්තැම්බර් 16 දින බත්තරමුල්ල ඉසුරුපාය අධ්යාපන අමාත්යාංශයේදී පවත්වා තිබුණු අතර එම සාකච්ඡාවෙන් අනතුරුව මාධ්ය වෙත අදහස් දක්වමින් විශ්වවිද්යාල ආචාර්යවරුන්ගේ සංගම් සම්මේලනයේ සභාපති මහාචාර්ය රුචික ප්රනාන්දු මහතා සඳහන් කළේ නවක සිසුන් විශ්වවිද්යාලවලට ඇතුළත් කිරීම, සිසුන් විශ්වවිද්යාල තුළ ගත කරන කාලය දීර්ඝ වීම සහ අධ්යයන කාර්ය මණ්ඩල හිඟය ඇතුළු ප්රධාන කරුණු කිහිපයක් සම්බන්ධයෙන් සාකච්ඡා කළ බවය.
කෙසේ වෙතත් එම ගැටලු සම්බන්ධයෙන් පැවති සාකච්ඡාවෙන් කිසිදු විසඳුමක් ලබා ගැනීමට නොහැකි වූ බවත් නවක සිසුන් බඳවා ගැනීම කඩිනම් කිරීම සම්බන්ධයෙන් මීට පෙර ජනාධිපති අනුර කුමාර දිසානායක මහතා සමඟද විශ්වවිද්යාල ආචාර්යවරුන්ගේ සංගම් සම්මේලනය සාකච්ඡා කර තිබූ බවත් ප්රනාන්දු මහතා සඳහන් කළේය.
එම සාකච්ඡාවලින් අනතුරුව විශ්වවිද්යාල ප්රතිපාදන කොමිෂන් සභාව සහ උපකුලපතිවරුන් හා අධ්යක්ෂවරුන්ගේ කමිටුව විසින් සිසුන් බඳවා ගැනීම කඩිනම් කිරීම සඳහා යෝජනා සකස් කර තිබූ බවත් එම යෝජනා සම්බන්ධයෙන් අප්රේල් මාසයේදී අග්රාමාත්යවරිය සමඟද සාකච්ඡා කළ බවත්, එහෙත් අදාල සාකච්ඡාවේදී එම යෝජනා තවමත් ජනාධිපති ලේකම් කාර්යාලය වෙත ලැබී නොමැති බව දැනගැනීමට ලැබුණු බවත් මහාචාර්යවරයා සඳහන් කළේය.
වසරකට ආසන්න කාලයක් තිස්සේ ක්රියාමාර්ගයක් බලාපොරොත්තුවෙන් සිටි යෝජනා අදාළ බලධාරීන් වෙත පවා ඉදිරිපත් වී නොතිබීම පිළිබඳව තමන් පුදුමයට පත්වූ බවත් ඔහු අදහස් දක්වමින් පැවසීය.
