ශ්රී ලංකා හිටපු ක්රිකට් ක්රීඩක අරවින්ද ද සිල්වා මහතා සහ ඔහුගේ බිරිඳ වන ප්රියංගා අනුෂ්කා විජේනායක මහත්මිය අත්අඩංගුවට ගැනීම සඳහා කොළඹ කොටුව මහේස්ත්රාත් පසන් අමරසේන මහතා සැප්තැම්බර් 16 දින වරෙන්තු නිකුත් කර ඇත.
ඒ කපිල චන්ද්රසේන මහතා සහ ඔහුගේ බිරිඳ සම්බන්ධ එයාර්බස් ගනුදෙනුවට අදාළ නඩුව අද පෙරවරුවේ කොළඹ කොටුව මහේස්ත්රාත් අධිකරණය හමුවේ කැඳවූ අවස්ථාවේදීය.
අදාළ නඩුව සම්බන්ධයෙන් සැකකරුවකු ලෙස නම් කර සිටි කපිල චන්ද්රසේන මහතා මේ වනවිට මියගොස් ඇති අතර මෙම නඩුව සම්බන්ධයෙන් ඇප මත මුදාහැර ඇති ඔහුගේ බිරිඳ මේ වනවිට විදේශගතව සිටින බව අධිකරණයට අපරාධ පරීක්ෂණ දෙපාර්තුමේන්තුවේ නිලධාරීන් දැනුම් දී ඇත.
නියෝමාලි චන්ද්රසේන මහත්මියට ඇප ලබාදීමේ ක්රියාවලියේදී අරවින්ද ද සිල්වා මහතා සහ ඔහුගේ බිරිඳ ප්රියංගා අනුෂ්කා විජේනායක මහත්මිය ඇපකරුවන් ලෙස ඉදිරිපත් වී තිබුණි. නඩුව අද කැඳවූ අවස්ථාවේදී නියෝමාලි චන්ද්රසේන මහත්මිය අධිකරණය හමුවේ පෙනී නොසිට ඇති අතර ඇපකරුවන් වන අරවින්ද ද සිල්වා මහතා සහ ඔහුගේ බිරිඳද අධිකරණය හමුවේ පෙනී නොසිටීම හේතුවෙන් ඔවුන්ට එරෙහිව අත්අඩංගුවට ගැනීමේ වරෙන්තු නිකුත් කිරීමට මහේස්ත්රාත්වරයා නියෝග කර ඇත.
කෙසේ වෙතත් ඇපකරුවන් වෙනුවෙන් පෙනී සිටි නීතිඥවරයා අධිකරණයට දැනුම් දී ඇත්තේ අරවින්ද ද සිල්වා මහතාගේ මව මියගොස් ඇති බවත් ඇයගේ අවසන් කටයුතු අද පැවැත්වෙන බැවින් ඔවුන්ට අධිකරණය හමුවේ පෙනී සිටීමට නොහැකි වූ බවය. ඒ සම්බන්ධයෙන් අදාළ ලේඛන තිබේ නම් ඒවා අධිකරණයට ඉදිරිපත් කරන ලෙස මහේස්ත්රාත්වරයා නියෝග කර ඇත.
එමෙන්ම නිකුත් කළ වරෙන්තු යළි කැඳවීම සඳහා අධිකරණයට කරුණු ඉදිරිපත් කරන අවස්ථාවේදී මෙම තත්ත්වය පිළිබඳවද අධිකරණයේ අවධානයට යොමු කරන ලෙස මහේස්ත්රාත්වරයා වැඩිදුරටත් දැනුම් දී තිබේ.
