No menu items!
27.5 C
Sri Lanka
29 March,2024

ශවේන්ද්‍ර හමුදාපතිකමේ ඉන්නේ නීත්‍යනුකූලවද?

Must read

සේවා දිගුවකට අදාළ නිවේදන හෝ ගැසට් නැත

ජනපතිගේ ආවතේවකාර ඔහුටත් ඉල්ලා අස්වන ලෙස බලකළ යුතුය

ජනාධිපතිවරයා ඇතුළු ආණ්ඩුවට ඉල්ලා අස්වන ලෙස බලකරමින් පාර්ලිමේන්තු මංසන්ධිය අසල අප්‍රේල් 05 වැනිදා පැවති විරෝධතාවයේදී අංක තහඩු නොමැති යතුරු පැදිවලින් එම ස්ථානයට පැමිණ මහජන ප්‍රකෝපය අවුස්සන විලාශයෙන් හැසිරුණු හමුදා සෙබළුන් ගැන පොලීසිය කටයුතු කළ ආකාරය සම්බන්ධයෙන් පරීක්ෂණයක් සිදුකරන ලෙස යුද හමුදාපති ශවේන්ද්‍ර සිල්වා පොලිස්පතිවරයාගෙන් ඉල්ලීමක් කර තිබේ. ඒ සම්බන්ධයෙන් පොලිස්පතිවරයා පරීක්ෂණයක් සිදුකරන බවට දැනුම්දීමක් කර ඇතැයි යුද හමුදා මාධ්‍ය ප්‍රකාශවරයා නිවේදනය කර තිබේ.


මෙම ඉල්ලීම හා පරීක්ෂණවල තත්වය කෙසේ වෙතත් යුද හමුදාපති ශවේන්ද්‍ර සිල්වාට අපට කීමට ඇත්තේ මේ රටේ යුද හමුදා සාමාජිකයින්ට අංක තහඩු රහිතව යතුරු පැදිවල යා හැකි වෙනම නීතියක් නැති බවය. අංක තහඩු නොමැතිව මහමඟ ගමන් කරන්නන් සම්බන්ධයෙන් කටයුතු කිරීමේ බලය පොලීසියට ඇති බවය.


යුද හමුදාපතිවරයා වර්තමානයේ රටේ ඇති වී ඇති මහජන නොසන්සුන්තාව සම්බන්ධයෙන් මීට දින කිහිපයකට පෙර තානාපති කාර්යාලවල ආරක්ෂක උපදේශකයින් හා ආරක්ෂක නියෝජිතයින් කැඳවා කරුණු පැහැදිලි කිරීමක් කර තිබුණි. එහිදී ඔහු තානාපති කාර්යාල නිලධාරීන්ට කියා තිබුණේ රටේ හමුදාව ආණ්ඩුක්‍රම ව්‍යවස්ථාව අනුව කටයුතු කරන බවකි. වෘත්තීමය හැකියාවෙන් යුක්ත යුද හමුදාව ඇතුළු ත්‍රිවිධ හමුදා රටේ ආරක්ෂාව වෙනුවෙන් කටයුතු කරන බවකි.


මේ ආකාරයට විදේශ තානාපති කාර්යාල නියෝජිතයින් ගෙන්වා පැනලා දීමේ අමාරුවක් යුද හමුදාපතිවරයාට ඇතිවීම අප පුදුමයට පත් කරන්නේ නැත. එහෙත් එවැන්නක් කිරීමේ අවශ්‍යතාවක් රජයට තිබුණේ නම් එය කළ යුතුය තිබුණේ යුද හමුදාපතිවරයා නොවේ. එක්කෝ ආරක්ෂක ඇමතිවරයාය. ආරක්ෂක ඇමතිවරයා ජනාධිපතිවරයා නිසා එවැන්නක් කිරීමේ අපහසුතාවක් තිබේනම් ආරක්ෂක අමාත්‍යාංශ ලේකම්වරයාය. එසේත් නැත්නම් විදේශ කටයුතු ඇමතිවරයා හෝ එම අමාත්‍යාංශ ලේකම්වරයාය. එහෙත් එය එසේ වී නැත්තේ ජනාධිපතිවරයාගේ විශ්වාසවන්තම ආවතේවකාරයා මේ මොහොතේ ඔහු වන නිසා හා හමුදා ධුරාවලි ප්‍රොටෝකෝලය අනුව කටයුතු කිරීමේ විනයක් ඔහුට ඉතිහාසයේ තිබී නැති බව අප දන්නා නිසාය. උතුරේ යුද්ධය පවතින කාලයේ පවා ඔහු එම හමුදා ධුරාවලි නීති ප්‍රොටෝකෝලය කඩකරමින් එවක ආරක්ෂක අමාත්‍යාංශ ලේකම්වරයා ලෙස කටයුතු කළ ගෝඨාභය රාජපක්ෂ සමඟ ගනුදෙනු කළ බව රහසක් නොවේ. හමුදාපතිවරයකුට නොවන අන්දමේ ජනාධිපති කාර්ය සාධක බලකාවල හා වෙනත් ක්‍රියාන්විතයන්වල තනතුරු හා ප්‍රධානත්වයන් ඔහුට ලැබෙන්නේ ඒ නිසාය. එමෙන්ම මෙතෙක් විශ්‍රාම යන ත්‍රිවිධ හමුදා ප්‍රධානීන්ට ලබාදුන් ආරක්ෂක මාණ්ඩලික ප්‍රධානී තනතුර යුද හමුදාපති තනතුර සමඟ දිගු කාලයක් ඔහුට ලබාදී ඇත්තේ ජනාධිපතිවරයා සමඟ ඇති මේ සම්බන්ධය නිසාය. මේ අතර කාලයේ ගුවන් හා නාවික හමුදාපතිවරුන් විශ්‍රාම ගියද ඒ කිසිවකුට එම තනතුර ලබා දුන්නේ නැත.


රටේ දැන් ඇතිවී ඇති මහජන නොසන්සුන්තාව යනු ජනාධිපතිවරයා ඇතුළු ආණ්ඩුවේ අසාර්ථකභාවය හේතුවෙන් ඇති වී ඇති එකක් මිස ජාතික ආරක්ෂාව පිළිබඳ කරුණක් නොවේ. තමන් බලයට පත්කළ පාලකයින්ට විරෝධය පළකිරීම මහජන අයිතිවාසිකමකි. සිය වෘත්තික යැයි කියන හමුදාවට යුද හමුදාපතිවරයා කියා දිය යුත්තේ රටේ නීතියට අනුව කටයුතු කරන ලෙසය. එසේ වූවා නම් අංක තහඩු නැති යතුරු පැදි රැගෙන හමුදා සාමාජිකයින්ට මහමඟ සරන්නට සිදු වන්නේ නැත. විශේෂයෙන්ම කිසිදු රාජකාරියක් නැතිව මහජන නොසන්සුන්තාවක් පවතින ස්ථානයකට සෝබනකාරයන් ලෙස එසේ ඔවුන් කඩා පනින්නේ නැත. මහජන බලය හමුවේ තුවක්කු අත දරාගත් මේ සෝබන හරියන්නේ නැති බව තවමත් සිය රාජකාරියෙන් ඔබ්බට ගොස් පාලක රාජපක්ෂවරුන් වෙනුවෙන් අනීතිකව පෙනී සිටින යුද හමුදාපතිවරයා ඇතුළු හමුදා සාමාජිකයින් තේරුම් ගෙන නැති හැඩය. මේ සටහන ලියන මොහොතේ දැක ගන්නට ලැබුණේ ඉහත සඳහන් කළ යතුරු පැදි සිදුවීම සම්බන්ධයෙන් විශ්‍රාම ගොස් සිටින මේජර් ජෙනරාල්වරයකු වන චාගි ගාල්ලගේ පොලීසියට එරෙහිව සමාජ මාධ්‍ය ජාලා ඔස්සේ කර ඇති චණ්ඩි සටහනය. රටේ ජනතාව මේ වනවිට පෙන්නුම් කරමින් සිටින්නේ එවැනි ලයිසන් චණ්ඩින්ගේ යුගය අවසන් කරන්නට ඔවුන්ට අවශ්‍ය බවය.


අනීතික හා අසාර්ථක රාජපක්ෂ පාලනය සම්බන්ධයෙන් යුද හමුදාව තුළ පවා කෝපයක් ඇති බව මේ මොහොතේ අපට පෙන්නුම් කර ඇත්තේ යුද හමුදාපතිවරයාමය. වෙනත් සේනාධිපතිවරුන් අණදෙන සේනාංක බස්නාහිර පළාත කේනද්‍රීයව ස්ථානගතව පවතිද්දී තමාගේ සෘජු අණ යටතේ කටයුතු කරන 53 වැනි සේනාංකයේ පිරිස් ඔහු කොළඹට කැඳවන්නේ ඒ නිසාය. එමෙන්ම ඔහු සේවය කළ ගජබා රෙජිමේන්තුවේ ඒකක කොළඹට කැඳවන්නේ ඒ නිසාය.


අනීතිකව සේවා දිගු හා පත්වීම් ලැබූවකු කිසිදා වෘත්තීය ගරුත්වයට පත් වන්නේ නැත. එසේම ගරුත්වයකින් යුතුව සිය රාජකාරිය සිදු කරන්නේත් නැත. ඊළඟ උසස්වීම වන යුද හමුදාපති ධුරය නොලැබී වයස අවුරුදු 55 සම්පූර්ණ වීම හේතුවෙන් විශ්‍රාම යෑමට නියමිතව සිටි ඔහුට සේවා දිගුවක් ලබා දුන්නේ හිටපු ජනාධිපති මෛත්‍රීපාල සිරිසේනය. ඒ සඳහා ඔහු භාවිත කළේ සිය බිරිඳගේ ගම වන පොළොන්නරු සම්බන්ධය මගින් චතුරිකා සිරිසේන සමඟ මිත්‍රත්වයක් සාදා ගැනීමය. ශ්‍රී ලංකා යුද හමුදා ඉතිහාසයේම යුද හමුදාපති ධුරයට පත් නොවී වයස අවුරුදු 55 සම්පූර්ණ වීම හේතුවෙන් සේවා දිගු ලබාදී තිබුණේ කිහිප දෙනෙකුට පමණි. ඒ විශේෂ අවශ්‍යතාවන් හේතුවෙන්ය. ඒත් ශවේන්ද්‍ර සිල්වාට එම අවස්ථාවේදී සේවා දිගුවක් ලබාදීමට තරම් විශේෂ හේතුවක් තිබුණේ නැත. කෙසේ හෝ එම සේවා දිගුවෙන් පසු මහේෂ් සේනානායක හමුදාපති ධුරයෙන් විශ්‍රාම ගැනීමෙන් පසු ශවේන්ද්‍ර සිල්වා හමුදාපති වශයෙන් මෛත්‍රීපාල සිරිසේන පත් කළේය. ඒ වන විටත් ඔහුට තිබුණේ මෛත්‍රීපාල සිරිසේන විසින් ලබාදී තිබූ 2019 ජුනි 22 සිට එම වසරේ දෙසැම්බර් 31 දක්වා ක්‍රියාත්මක වන සේවා දිගුවකි. එම සේවා දිගුව ලබාදුන් අවස්ථාවේදී ඒ බව මාධ්‍ය මගින් ප්‍රකාශයට පත් වූ අතර යුද හමුදා වෙබ් අඩවියේද ඒ බව පළවිය.


යුද, නාවික හා ගුවන් යන ත්‍රිවිධ හමුදාවල අධිකාරි නිලයන්ට පත් කිරීම, උසස් කිරීම, විශ්‍රාම ගැන්වීම හා සේවා දිගු ලබාදීම යන කරුණු අනිවාර්යෙන්ම රජයේ ගැසට් පත්‍රයේ පළකළ යුතුවේ. මේ නිවේදන ජනාධිපතිවරයාගේ නියමය අනුව ආරක්ෂක අමාත්‍යාංශයේ ලේකම්වරයා ප්‍රකාශයට පත්කරයි. ඒ නිසා මෙම සේවා දිගු ලබාදීම් ඇතුළු උසස්වීම් හා අනිකුත් දේ රහසිගත සිදුකරන කටයුතු නොවේ. මේ පැහැදිලි කිරීම අපට කරන්නට සිදු වූයේ වත්මන් හමුදාපති ශවේන්ද්‍ර සිල්වාගේ සේවා දිගුව සම්බන්ධයෙන් සාකච්ඡා කිරීමටය. මෛත්‍රීපාල සිරිසේන ජනාධිපතිවරයා ලබාදුන් සේවා දිගුව අනුව ශවේන්ද්‍ර සිල්වාට හමුදාපති ධුරයේ කටයුතු කළ හැකි වන්නේ ඔහු එම ධුරයට පත්වූ 2019 අගෝස්තු 20 දින සිට එම වසරේ දෙසැම්බර් 31 දින දක්වා පමණය. ඉන්පසුවත් ඔහු හමුදාපති ධුරයේ කටයුතු කරනවා නම් ඒ වනවිට ජනාධිපති ධුරයට පත්වූ ගෝඨාභය රාජපක්ෂ ඔහුට සේවා දිගුවක් ලබාදිය යුතුය. ඒත් මේ වනතෙක් ජනාධිපති ගෝඨාභය රාජපක්ෂ ඔහුට සේවා දිගුවක් ලබාදුන් බවට කිසිදු මාධ්‍ය වාර්තාවක් නැත. යුද හමුදා වෙබ් අඩවියේ පවා එවැනි සඳහනක් නැත.


හමුදාපති ධුරයට පත්වීමෙන් පසු වයස අවුරුදු 55 සම්පූර්ණවීම හේතුවෙන් පසුගිය කාලයේ සිටි සෑම හමුදාපතිවරයකුටම වාගේ සේවා දිගුවක් ලැබුණ අතර ඊට හේතු වූයේ මේ අය අවුරුදු 55 සම්පූර්ණ වීමට ඔන්න මෙන්න කියා තිබියදී හමුදාපති ධුරයට පත්වීමය. ඔවුන්ට යම් කාලයක් හමුදාපති ධුරයේ කටයුතු කිරීමට එම සේවා දිගු ලැබුණි. මේ සේවා දිගුවල එක් වරෙක උපරිමය අවුරුද්දක් වූ අතර එවැනි අවුරුද්දේ සේවා දිගු කිහිපයක් ලැබූ හමුදාපතිවරුද සිටියෝය. ඒත් ඒ හැම අවස්ථාවකම එම අවස්ථාවේ සිටිනා හමුදාපතිවරයාට තවදුරටත් සේවා දිගුවක් ලැබේද යන්න මාධ්‍යයේ සාකච්ඡාවට භාජනය විය. ඒ සිටිනා හමුදාපතිවරයාට සේවා දිගුවක් නොලැබුණහොත් ඊළඟ හමුදාපති කවුද යන්න සාකච්ඡාවට භාජනය වීමටත් සේවා දිගුවක් ලැබුණහොත් හමුදාපති ධුරය නොලැබ විශ්‍රාම යන්නට සිදුවන්නේ කා හටද යන්න පිළිබඳ වාර්තා කිරීමටත්ය. එහෙත් ශවේන්ද්‍ර සිල්වා සම්බන්ධයෙන් එසේ වාර්තා වූයේ නැත. ඔහුගේ සේවා දිගු සම්බන්ධයෙන් අවසන් වාර්තා වීම ජනාධිපති මෛත්‍රීපාල සිරිසේන ඔහුට දුන් සේවා දිගුව පමණී. ඒ සම්බන්ධයෙන් වූ රජයේ ගැසට් පත්‍රයක්ද ඔහුට සේවා දිගුව ලබාදුන් 2019 ජුනි මාසයේ සිට මෛත්‍රීපාල සිරිසේන ජනාධිපති පදවියෙන් සමුගත් එම වසරේ නොවැම්බර් මාසය දක්වාම පළවී නැත. මේ ආකාරයේ ගැසට් නිවේදනයක් එතරම් කාලයක් ප්‍රකාශයට පත්නොවී තිබිය නොහැකි වූවත් එම සේවා දිගුවට අදාළ ජනාධිපතිවරයාගේ අනුමැතියක් සහිත ලියවිල්ලක් තිබී ඇතැයි අපට අනුමාන කළ හැකිය. ඒ, ඒ සම්බන්ධයෙන් යුද හමුදා වෙබ් අඩවිය ඇතුළු මාධ්‍ය පළකිරීම් තිබූ නිසාය. එවක ශවේන්ද්‍ර සිල්වා යුද හමුදාපතිවරයා නොවූ නිසා නිල වශයෙන්ම එම සේවා දිගු දැනුම්දීම හමුදාවට ලැබී තිබූ බව සිතිය හැකිය. නැත්නම් ඔහුට හමුදා ක්‍රමය අනුව අවුරුදු 55 සම්පූර්ණ වීමත් සමඟ විශ්‍රාම යැමට සිදුවන නිසාය.


එහෙත් ප්‍රශ්නය ඇත්තේ ඉන් පසුවය. මෛත්‍රීපාල සිරිසේනගේ සේවා දිගුවෙන් පසු ඔහුට වත්මන් ජනාධිපති ගෝඨාභය රාජපක්ෂ සේවා දිගු ලබාදීමක් පිළිබඳ කිසිදු සඳහනක් නොමැති වීමය. ඔහුට යළි සේවා දිගුවක් ලබාදිය යුත්තේ 2020 ජනවාරි 01 දින සිට ක්‍රියාත්මක වන පරිදිය. එහෙත් ඒ සම්බන්ධයෙන් කිසිදු මාධ්‍ය වාර්තාවක් නැති වුවත්, ඒ ආසන්නම දිනෙක රජයේ ගැසට් පත්‍රයේ නිවේදනයක් පළවිය යුතුමය. එහෙත් ගෝඨාභය රාජපක්ෂගේ පාලන කාලය තුළත්, 2020 මාර්තු මස දක්වාම ඔහුගේ සේවා දිගුව සම්බන්ධයෙන් කිසිදු ගැසට් පත්‍රයක් නැත. ගෝඨාභය රාජපක්ෂ ජනාධිපතිවරයා බවට පත්වීමෙන් පසු ත්‍රිවිධ හමුදා සාමාජිකයින් අධිකාරියේ පිහිටුවීම, ඔවුන්ට උසස්වීම් ප්‍රදානය කිරීම, ඔවුන්ව සේවයෙන් විශ්‍රාම ගැන්වීම හා ස්වෙච්ඡා බල සේනාවලට පත් කිරීම යන සියලු දේට අදාළ නිවේදන එම කාලයේ රජයේ ගැසට් පත්‍රවල තිබේ. නැත්තේ ශවේන්ද්‍ර සිල්වාගේ සේවා දිගුවට අදාළ ගැසට් නිවේදනය පමණය.


සේවා දිගු සම්බන්ධයෙන් කිසිදු නිවේදනයක්ද නැති හා ඒ සම්බන්ධයෙන් රජයේ ගැසට් පත්‍රයේ නිවේදනයන්ද නැති තත්වය තුළ ශවේන්ද්‍ර සිල්වා හමුදාපති ධුරයේ සිටින්නේ නීත්‍යනුකූල නොවන තත්වයකින් බව ඒ අනුව අපට අනුමාන කරන්නට සිදුවේ. එසේ නීත්‍යනුකූල නොවන ආකාරයකින් රටේ හමුදාපති තනතුර දරන පුද්ගලයකු ඒ අනුව රටේ ආණ්ඩුක්‍රම ව්‍යවස්ථාව අනුව කටයුතු කිරීම කෙසේ වෙතත් රටේ නීතිය අනුව කටයුතු කරන බව නිගමනය කළ නොහැකිය. එමෙන්ම එසේ නීත්‍යනුකූල නොවන ආකාරයෙන් යුද හමුදාපතිවරයා ධුරයේ තබාගෙන සිටින ජනාධිපතිවරයකු ආණ්ඩුක්‍රම ව්‍යවස්ථාව ආරක්ෂා කරනවා හා රටේ නීතියට අනුව කටයුතු කරනවා යැයි අපට සිතිය නොහැකිය.


හමුදාපතිවරයා සම්බන්ධයෙන් වන මෙම නීත්‍යනුකූල නොවන තත්වය ඉතා භයානක එකකි. මන්ද මෙම ජනාධිපතිවරයාගෙන් පසු බලයට පත්වන හෝ තනතුරට පත්වෙන ජනාධිපතිවරයකුට උභතෝකෝටික ප්‍රශ්නයකට මුහුණ දෙන්නට සිදුවන නිසාය. මන්ද වත්මන් හමුදාපතිවරයාගේ සේවා දිගුව අවසන් වන්නේ කවදාදැයි නොදැන ඊළඟ හමුදාපතිවරයා වශයෙන් තවත් පුද්ගලයකු පත් කිරීමේ ගැටලුවකට මුහුණ දීමට සිදුවන බැවින්ය.


ඒ අනුව අප යුද හමුදාපති ශවේන්ද්‍ර සිල්වාට හා ජනාධිපති ගෝඨාභය රාජපක්ෂට අභියෝග කරන්නේ ශවේන්ද්‍ර සිල්වාගේ සේවා දිගුවලට අදාල ජනාධිපති අනුමැතීන් හා රජයේ ගැසට් නිවේදන ප්‍රකාශයට පත්කරන ලෙසය. මෙම අභියෝගයෙන් පසු සේවා දිගු සම්බන්ධයෙන් පසු දාතම ලිපි සැකසිය හැකි බව අපි දනිමු. එමෙන්ම එම පසු දාතම ලිපිවලට අදාළ ගැසට් නිවේදනද මේ මොහොතේ පසුගිය දින සහිතව ක්‍රියාත්මක වන බව සඳහන් කරමින් නිකුත් කළ හැකි බවද අපි දනිමු. මන්ද ජනාධිපති ගෝඨාභය රාජපක්ෂ එවැනි පසුදාතම වැඩවලට දක්ෂයෙකු බව මීට පෙර ඔප්පු කර පෙන්වා ඇති බැවින්ය. ඔහුගේ ශ්‍රී ලංකා ද්විත්ව පුරවැසිභාවයද එවැන්නකි. ඒ සඳහා වූ ඉල්ලුම් පත්‍රය ඉදිරිපත් කිරීමද, අනුමැතිය ලබාදීමද සිදුකර ඇත්තේ රාජකාරි දින දෙකක් ඇතුළතය. එමෙන්ම එම දිනයට අදාළව ද්විත්ව පුරවැසියන්ගේ ලේඛනයේ හිස් පේලියක් නොතිබීම නිසා ඔහුගේ නම ඇතුලත් කර ඇත්තේ පිරවූ පේලි දෙකක් අතරටය. ඒ නිසාම එම ලේඛනයේ ඔහුට ඇත්තේ වෙන කිසිවකුටවත් නැති ලෙස පූර්ණ අංකයක් නොව අනු අංකයක්ය. ඒ අනුව ඔහුගේ ද්විත්ව පුරවැසි සහතිකයද පූර්ණ අංකයක් නැති අනු අංකයක් ඇති ඔහු සඳහාම පමණක් විශේෂ වූ එකකි.


ඒ අනුව මෙම අර්බුදකාරී වාතාවරණයේදී ජනවරමට පිටුපා ඇති ජනාධිපතිවරයාට ඉල්ලා අස්වන ලෙස අප බලකරන ලෙසම ජනාධිපතිවරයාගේ ආවතේවකාරයකු බවට පත්වී ඇති (එසේ අප කියන්නේ යුද හමුදාපතිවරයකුට නොවන ලෙස ඔහු ජනාධිපතිවරයා සමඟ නිල ඇඳුමෙන් තොරව ආගමික ස්ථානවලට හා දේවාල ඇතුළු බොහෝ ස්ථානවලට රාජකාරි නොවන කාර්යයන් සඳහා ගමන් කරන බව ප්‍රදර්ශනය කරමින් සිටින නිසාය) නීත්‍යනුකූල නොවන ආකාරයෙන් ධුරයේ සිටින යුද හමුදාපතිවරයාටද ඉල්ලා අස්වන ලෙස අප බලකළ යුතුය. ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි