No menu items!
20.9 C
Sri Lanka
28 March,2024

සේවක වැටුප් කපන්න හාම්පුතුන් අවසර ඉල්ලලා – වෘත්තිය සමිති ඇමතිට ලියයි

Must read

කොවිඞ්-19 වසංගතයෙන් නැවත නැගී සිටීමට වැටුප් හා දීමනා කප්පාදුව, ඊපීඑෆ් ගෙවීම මඟහැරීම, වැඩ කාලය වැඩි කිරීම ඇතුළු සේවක අයිතිවාසිකම් දුර්වල කරන යෝජනා හාම්පුතුන් ඉදිරිපත් කර ඇති බව පොදු දේපල හා මානව හිමිකම් සුරැකීමේ මධ්‍යස්ථානය ලිපියක් මගින් පෙන්වාදී තිබේ.

රජය මෙම කරුණු පිළිබඳව වෘත්තිය සමිති සමඟ සාකච්ඡා කළ යුතු බවද එහි සඳහන් කර තිබේ.

වෘත්තිය සමිති 24ක සාමාජිකත්වයෙන් යුතු පොදු දේපල හා මානව හිමිකම් සුරැකීමේ මධ්‍යස්ථානය අපේ‍්‍රල් 22 දා විදේශ කටයුතු සංවර්ධන හා සේව්‍ය සහ කම්කරු සබඳතා අමාත්‍ය දිනේශ් ගුණවර්ධන වෙත එම ලිපිය යොමුකර ඇත.

එම සම්පූර්ණ ලිපිය මෙසේය.

‘කොරෝනා වසංගතය නිසා ලක්‍ෂ 84 ක් වු වැඩකරන ජනතාව පත්වී ඇති අපහසුතාවය පිළිබඳ කම්කරු ඇමතිවරයා ලෙස ඔබතුමා දැනුවත් කරන්නේ ඔබතුමා මෙන්ම කැබිනට් මණ්ඩලයත් ඒ හරහා ආණ්ඩුවත් දැනුවත් කිරීම හරහා වැඩකරන ජනයා ආරක්‍ෂා කිරීමේ තීන්දු තීරණ ගැනීම අරමුණු කරගනිමින්ය.

කොවිඞ් 19 වෛරස් ව්‍යාප්තිය පාලනය උදෙසා රජය ගත් ආරක්ෂණවාදී උපායන් හේතුවෙන් වෛරස් ආසාදනයෙන් ජනතාව ආරක්‍ෂා කරගැනීමට හැකියාව ලැබීම ගැන සතුටු වන්නෙමු. එමෙන්ම ආරක්ෂණවාදී පියවරයන් වූ රට වසා දැමීමේ කාලසීමාවේදී අත්‍යාවශ්‍ය ආහාර, බෙහෙත් සහ අනෙකුත් සේවාවන් ලබාදීමට නොයෙකුත් පහසුකම් සහ සහන රැසක් ලබාදීමද වැඩකරන සමස්ත ජනතාවටම විශාල පිටුබලයක් විය. කෙතරම් අඩුපාඩු පැවතියත් රාජ්‍ය අංශයක වැදගත්කම යළි යළිත් අවධාරණය කළ කොරෝනා වසංගතය සහ ඉන්පසු පශ්චාත් කොරෝනා සමය තුළද රජය ගනුලබන තීන්දු තීරණ වැඩකරන ජනතාව ආරක්ෂා කිරීමට බෙහෙවින්ම ඉවහල් වනු ඇත.

ජනතාවට සහන සලසන අතරම ව්‍යවසායන්ද පවත්වාගෙන යෑමට කම්කරු ඇමතිවරයා ලෙස ඔබතුමන්ගේ වගකීම සහ මැදිහත්වීම ඉතා වැදගත් බව අප වෘත්තීය සමිති ලෙස සළකන්නෙමු. ඒ සඳහා සියලූ පාර්ශවයන්ගෙන් සැදුම්ලත් කාර්ය සාධක බලකායක් කැඳවීමට ඔබතුමන් ගත් උත්සාහය ඉතා වැදගත්වේ. මෙම කාර්යසාධක බලකායට ජාතික කම්කරු උපදේශක සභාව නියෝජනය කරන වෘත්තීය සමිති සියල්ල කැඳවා නොමැති අතර, ඉදිරි රැස්වීම් සඳහා ජාතික කම්කරු උපදේශක සභාවේ සියලූ පාර්ශව කැඳවීමට කටයුතු කරන මෙන් ඔබතුමාගෙන් කාරුණිකව ඉල්ලා සිටිමු.

කාර්යසාධක බලකායේ තීන්දු පිළිබඳව අවම වශයෙන් ජාතික කම්කරු උපදේශක සභාවේ වෘත්තීය සමිති හෝ දැනුවත් කරන මෙන් ඉල්ලා සිටිමු. එතෙක් එම තීන්දු ක‍්‍රියාවට නැඟීමෙන් වළකින ලෙසද ඔබතුමාගෙන් ඉල්ලා සිටිමු.

මෙවන් ව්‍යසනකාරී මොහොතක සියලූදෙනාගේ අදහස් ලබාගැනීම මෙන්ම සියලූ කටයුතු පූර්ණ විනිවිධභාවයෙන් යුතුව සිදු කළයුතු බව අප අදහස් කරමු.

කොරෝනා වසංගතය හරහා රටේ සියලූම පාර්ශව විවිධාකාරයෙන් සහ විවිධ මට්ටම් වලින් අපදාවට පත්ව ඇති මොහොතක සියලූදෙනා එක්ව මෙම ආපදා තත්වයෙන් පසුව ගොඩනැගිය යුතු බවට අප අදහස් කරන්නෙමු. මෙහිදී ඇතැම් පාර්ශව ඔවුන්ගේ පැත්තෙන් පමණක් නැඟීසිටීම ගැන සිතා ඉදිරිපත් කරන යෝජනා ගැන අප සංවිධානය ඇතුළු සියලූ වෘත්තීය සමිති අවධානයෙන් සිටින බව ඔබතුමන්ට දන්වනු කැමැත්තෙමු.

කොරෝනා වසංගතය යනු ඉදිරි මාස කිහිපය තුළ පහව යන තත්වයකි. මේ කෙටිකාලීන ගැටළුව සඳහා හාම්පුතුන්ගේ පාර්ශවයෙන් ඉදිරිපත්වෙන ඇතැම් කරුණු බහුතර වැඩකරන ජනතාව දීර්ඝකාලීනව පීඩාවට පත්කරන ඒවා බවට අප නිරික්‍ෂණය කර ඇත.

අපගේ නිරීක්‍ෂණයන් අතර වැඩකරන කාලය දිගු කිරීම (පැය 8 වැඩමුරය දිගු කිරීම.), සේවා අවසාන පනත සංශෝධනය කිරීම, පසුගිය රජය විසින් ගෙන ආ වෘත්තීය සමිති සියල්ල ප‍්‍රතික්ෂේප කළ ඊනියා ඒකීය කම්කරු නීතිය යළි රැගෙන ඒම, ඊපීඑෆ් ගෙවීම මඟහැරීමට සහනයක් ලබාගැනීම, සාමූහික ගිවිසුම්, අවබෝධතා ගිවිසුම් සහ සේවා ගිවිසුම් යළි සළකා බැලීම (වැටුප් සහ දීමනා කප්පාදුවට) යන උත්සාහයන් දක්නට ඇත.

කම්කරු නීති සංශෝධනයන් හරහා ප‍්‍රධාන නිෂ්පාදන සාධක 4 වන භූමිය, ශ‍්‍රමය, ප‍්‍රාග්ධනය, ව්‍යවසාය යන 4 න් ශ‍්‍රම කොන්දේසි පමණක් ලිහිල් කිරීම නිසා සහනයක් හාම්පුතුන්ට හිමිවේ.

ශ‍්‍රම කොන්දේසි ලිහිල් කර සහන හාම්පුතුන්ට ලබාදීම කළහොත් එමගින් වැඩකරන ජනතාව ලක්‍ෂ 84 ක් මේ මොහොතේ පමණක් නොව දීර්ඝකාලීනව පීඩාවට පත්වනු ඇත.

එසේනම් ශ‍්‍රම කොන්දේසි කප්පාදු නොකොට ඉතිරි නිෂ්පාදන සාධක හරහා හාම්පුතුන්ට සහන ලබාදීමට කටයුතු කලහොත් වැඩකරන ජනතාවත් හාම්පුතුනුත් යන දෙපාර්ශවයම රැකබලා ගැනීමේ රජයේ වගකීම ඉටුකරගත හැකිය.

හාම්පුතුන් පවසා ඇත්තේ ලංකාව, සේවකයෙකු විනය නොවන හේතුවකට සේවයෙන් පහකිරීමේදී පවතින රෙගුලාසි දැඩි රටක් වන බවයි. එය සම්පූර්ණයෙන්ම අසත්‍යකි. වියට්නාමය, ඉන්දුනීසියාව, කාම්බෝඩියාව, චීනය, මියන්මාරය, පකිස්ථානය, බංගලාදේශය, ඉන්දියාව, නේපාලය යන කලාපීය රටවල්වල දත්ත අනුසාරයෙන් ලෝක බැංකුව විසින් සම්පාදිත සංඛ්‍යා ලේඛන සළකා බැලූවිට ලංකාවේ සේවකයෙකු විනය නොවන හේතුවකට සේවයෙන් පහකිරීමේදී පවතින රෙගුලාසි ඉතා ලිහිල් බව අප නිරීක්‍ෂණය කර ඇත. මෙලෙස හාම්පුතුන් ඔවුන් පමණක් මෙම අර්බුදයෙන් පියමං කිරීමට අසත්‍ය තොරතුරු රජයට සපයමින් දරණ උත්සාහය පිළිබඳවත් ඔබතුමාගේ අවධානය යොමුකරමු.

හාම්පුතුන් යෝජනාකර ඇති ආණ්ඩුක‍්‍රම ව්‍යවස්ථාව (14 වන වගන්තිය) අනූව ව්‍යාපාර උපායශීලිව පවත්වාගෙන යෑමේ නිදහස ඉල්ලා සිටීම ලබාදුනහොත් කම්කරුවන්ගේ ජීවත්වීමේ නිදහස පවා අහිමි වන්නේ නම් එවන් නිදහසක ඇති ඵලය කුමක්දැයි ඔබතුමන්ට පැහැදිලි වනු ඇත.

මෙහිදී අවධානය යොමු කළයුතු ප‍්‍රධාන කරුණ නම් කම්කරු නීති සංශෝධනය කිරීමට අධිකාරීමය බලයක් ඇත්තේ කුමන ව්‍යූහයකටද යන්නයි. කම්කරු නීති සංශෝධනයකට අවශ්‍ය අධිකාරීමය බලය ඇත්තේ පාර්ලිමේන්තුවට පමණක් බව ඔබතුමා හොඳින්ම දන්නවා ඇත.

ජාතික කම්කරු උපදේශක සභාවට හෝ එමඟින් ව්‍යුත්පන්න කළ කමිටුවකට හෝ කැබිනට් මණ්ඩලයට එවැනි බලයක් නොමැති බව ඔබතුමා හොඳින්ම දන්නවා ඇත.

එක් පාර්ශවයක පමණක් යෝජනා සැළකිල්ලට ගනිමින් කම්කරු හිමිකම් කප්පාදුව නිසා ඇතිවන වර්ජන රැළි හේතුවෙන් බිඳ වැටුනු ආර්ථිකය යළි ගොඩ නැඟීමට බාධාවක් වනු ඇති බව ඔබතුමා හොඳින්ම අවබෝධ කරගෙන ඇතැයි සිතමු.

එබැවින් ආර්ථිකය නඟාසිටුවන්නැයි පවසමින් කම්කරු නීති සංශෝධනයට යම් පාර්ශවයක් බලපෑම් කරන්නේ නම් එය,

පාර්ලිමේන්තුවට හැර වෙන කිසිදු ව්‍යූහයකට බලයක් නොමැති, සමාජයේ බහුතර ජනතාවක් පීඩාවට පත්වන, කොරෝනා නිසා බිඳවැටුනු ආර්ථිකය යළි ගොඩනැගීමට බාධාවක් වෙන, ජනතා අප‍්‍රසාදයට පත්වන ලක්‍ෂ 84 ක් වු වැඩකරන ජනතාවට දීර්ඝකාලීන ව්‍යවසනයක් වන ක‍්‍රියාවක් බව ඔබතුමන්ගේ අවධානයට යොමු කරමු.

රජය පාර්ශයෙන් මෙම කම්කරු නීති සංශෝධනය වෘත්තීය සමිතිවල අදහස් විමසීමකින් තොරව ගෙන එන්නේ නම් එයට අපගේ සම්පූර්ණ විරෝධය පළකරන අතරම ඊට එරෙහිව වැඩකරන ජනතාව පෙළ ගැස්වීමටද කටයුතු කිරීමට සිදුවෙනු ඇත.

මේ කොරෝනා වසංගතය නිසා බිඳවැටුන ආර්ථිකය යළි ගොඩනැඟීමට සියලූ පාර්ශවවල එකඟතාවය ඇති ගැටුම්වලින් තොර වැඩපිළිවෙලක් සැකසීම අප සැමගේ වගකීම බැවින් ඒ වෙනුවෙන් අපගේ දායකත්වය ලබාදීමට සූදානම් බව වැඩිදුරටත් දන්වා සිටිමු.

තවද කම්කරු අමාත්‍යවරයා ලෙස ඔබතුමා සමඟ මෙම කරුණු පිළිබඳ වැඩි විස්තර සාකච්ඡා කිරීමට අවස්ථාවක්ද ඉල්ලා සිටිමු. මේ සඳහා පහත නම් සඳහන් අප සංවිධානයේ අනුබද්ධ වෘත්තීය සමිති නියෝජිතයින් සිව්දෙනෙකු සම්බන්ධවීමටද අපේක්ෂා කරමු.

පොදු දේපල හා මානව හිමිකම් සුරැකීමේ මධ්‍යස්ථානයේ සාමාජික සංවිධාන මෙසේය.

ලංකා බැංකු සේවක සංගමය, ලංකා වෙළඳ, කාර්මික හා පොදු කම්කරු සංගමය, ලංකා වතු සේවා සංගමය, එක්සත් කම්කරු සම්මේලනය, තැපැල් හා විදුලි සංදේශ නිලධාරීන්ගේ සංගමය, ලංකා ගුරු සංගමය, තොරතුරු හා විදුලි සංදේශ සියලූ සේවක සංගමය, ස්වාධීන තටාක සේවක සංගමය, මාධ්‍ය සේවක වෘත්තීය සමිති සම්මේලනය, ශ‍්‍රී ලංකා වෘත්තීය ජනමාධ්‍ය වේදීන්ගේ සංගමය, එක්සත් පොදු සේවක සංගමය, රජයේ මුද්‍රණ ශිල්පීන්ගේ සංගමය, දුම්රිය ශ්‍රේණිගත වෘත්තීය සමිති එකමුතුව, ආහාර, බීම සහ දුම්කොළ කර්මාන්ත සේවක සමිතිය, කාන්තා කම්කරු සහයෝගිතා සංගමය, වාණිජ හා කාර්මික සේවක සංගමය, රක්‍ෂණ සේවක සංගමය, සමස්ත ලංකා විදුලි සංදේශ සේවක සංගමය, ටෙලිකොම් ඉංජිනේරුමය ඩිප්ලෝමාධාරීන්ගේ සංගමය, ආණ්ඩුවේ එක්සත් කම්කරු සම්මේලනය, ඉඩම් හා කෘෂිකර්ම ප‍්‍රතිසංස්කරණ ව්‍යාපාරය, ජාතික ධීවර සහයෝගීතා ව්‍යාපාරය, ජාතික ධීවර වෘත්තිය සංගමය,සමස්ත ලංකා ධිවර ජනතා වෘත්තීය සංගමය.

අනුරංග ජයසිංහ

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි