No menu items!
21.8 C
Sri Lanka
28 March,2024

ඉඳහිට රෝගියෙකු දෙදෙනෙකු නම්? කමක් නෑ ඡන්දය තියමු.

Must read

අද 2020 අපේ‍්‍රල් මස 14 වෙනි දිනය  වේ. උදේ දෙරණ අරුණ වැඩසටහන බලා සිටියෙමි. එහි වරෙක සෞඛ්‍ය ඇමති පවිත‍්‍රා වන්නිආරච්චි කතාකළාය. ඇය සිය ප‍්‍රකාශය අතර, කීවේ කොරොනා රෝගියෙකු දෙදෙනෙකු ඉඳහිට සිටිය හැකි බවය. සජීවීව ඍජුව ලබාගත් ඒ ප‍්‍රකාශය කපා දැමීමට දෙරණට නොහැකිය. ඇය ඇඳ සිටි ඇඳුම්පැළඳුම් අනුව පවා එවැනි ප‍්‍රකාශයක් සඳහා ඇය සූදනම් වී නොසිටියා විය හැකිය. කෙසේ වෙතත් ඇමති පවිත‍්‍රා වන්නිආරච්චි ඒ ප‍්‍රකාශය කළේ රටේ සෞඛ්‍ය ඇමතිවරිය හැටියටය. 

කොරොනා රෝගියෙකු දෙදෙනෙකු ඉඳහිට සිටීම යනු සාමාන්‍ය තත්වයක් ලෙස ඇය කරන තක්සේරුව නිල මට්ටමේ එකකි. රටේ තත්වය එසේ යයි රජය කල්පනා කරයි නම් එය යහපත් නොවේ. එක් උදාහරණයක් දක්වනු කැමැත්තෙමි. නිරුපද්‍රැතව සංසුන්ව සතුටින් කල් ගෙවූ මහනුවර ජනතාව කබලෙන් ළිපට වැටුණේ එක් රෝගියෙකු නිරාවරණය වීම නිසාවෙනි. ඒ එක් රෝගියෙකු නිසා මහනුවර දිස්ත‍්‍රික්කයේ ජීවත්වන ජනතාව ඇදවැටුණ තත්වය අමුතුවෙන් විස්තර කළ යුතු නැත.

ලංකාවේ පළමු කොරෝනා රෝගියා හමුවුණේ 2020 ජනවාරි 27දාය. ඇය සංචාරය පිණිස චීනයේ සිට ලංකාවට පැමිණි චීන ජාතික කාන්තාවකි. ඒ කාන්තාව සුව වී පෙබරවාරි 19 වෙනි සිය රට බලා පිටත් විය. ඒ අතර කාලය දින 25කි. එකී රෝගී කාන්තාව සුව වී නික්මයාම  දේශපාලන සාදයක් විය. තත්වය නිවැරදිව තේරුම් ගත් බොහෝ දෙනා කීවේ වහා රට ලොක්ඩවුන් කරන ලෙසය. ඒ අවස්ථාවේ රාජ්‍ය නායකයා සිනාසෙමින් කළ ප‍්‍රකාශය සත්‍ය ලෙසම රාජ්‍යතාන්ති‍්‍රක හෝ මානුෂික නොවේ. සැබෑ ලෙසම ඒ ප‍්‍රකාශය හරහා දෝංකාර දුන්නේ රාජ්‍ය පාලකයෙකු ලෙස ප‍්‍රශ්න හමුවේ ඉන්ද්‍රඛීලයක් සේ නොසැලී කි‍්‍රයාකිරීමට ඔහු තුළ පවත්නා ආත්ම ශක්තියයි. එහෙත් එසේ නොවී නම් දේශපාලන පක්‍ෂ භේදයකින් තොරව සලකා බලන විට, ඒ හරහා ඔහුට තම රටේ වසංගත තත්වය පාලනය කර ගනීමට නොහැකි විය. ඒ හරහා ඔහු කළ ප‍්‍රකාශය ඔහුගේ අහංකරකම හෝ උද්ධච්ඡකම ලෙස කිසිවෙකුට උපකල්පනය කළ හැකිය.  එහෙත් යථාර්ථය නම්, මෙම බරපතළ වසංගත තත්වය රාජ්‍ය පාලකයාට නීතිය කි‍්‍රයාත්මක කිරීමෙන් පමණක් පාලනය කරගත නොහැකි බවය. එය මධ්‍යස්ථ ජනතාව අවිවාදයෙන් තේරුම්ගන්නා කරුණකි. එක් ජනමත සමීක්‍ෂණයකින් හෙළිවුණේ සියයට 80%ක් ජනතාව ආණ්ඩුව වසංගත තත්වය පාලනය කර ගැනීමට සමත් බව තේරුම්ගෙන සිටි බවය. එය යහපත්ය. යහපත් වුවද අවදානමකදී අප ලැබෙන පණිවිඩ වඩාත් ප‍්‍රවේශමෙන් කියවිය යුතුවේ. සමහරු මේ මාරාන්තික අවදානමෙහිදී පවා පක්‍ෂග‍්‍රාහීව කල්පනා කිරීම සහ හැසිරීමය. මේ වසංතයට ආණ්ඩුව මුහුණ දෙන ආකාරය පිළිබඳ ප‍්‍රශස්ති ගැයීමෙන් සිදුවන්නේ මරණයට අත වැනීමකි. පසුගිය දවසක සුබ අලූත් අවුරුද්දක් වේවා කී හිතවතෙකු ඊළ`ගට කළේ රන්ජන් රාමනායකට බැනගෙන යාමය.  ඔහු විශ‍්‍රාමික පරිපාලපන නිලධාරියෙකි. මට යමක් කිව නොහැකි තැනක සිරවී ඇත. හේතුව තවමත් ඔහු මට පෙරළා සුබ පැතීමට හෝ අවස්ථාවක් නොදී තම මතය ප‍්‍රකාශ කිරීමය.

ඔහු කියන්නේ ජීවිත පරිත්‍යාගයෙන් කි‍්‍රයාකරන පොලිස් නිලධාරීන්ගේ රාජකාරියට බාධා කිරීමක් ගැනය. ඔහු විමසා සිටින්නේ මාදිවෙල නිවාස සංකීර්ණයේ බඩු බෙදුවේ කාටද කියාය. මම තරමක් වෙලා නිහඬව සිටියෙමි. මේ උදාවී ඇත්තේ නීතිය කි‍්‍රයාත්මක කිරීම හරහා බොහෝ තත්වයන් සමනය කරගත හැකි අවස්ථාවකි. එහි දෙකක් නැත.

එහෙත් තමන් කළ කි‍්‍රයාවත් සම්බන්ධව නීතිය සකි‍්‍රය වන අවස්ථාවක ඒ ගැන ප‍්‍රශ්න කිරීම ප‍්‍රජාතන්ත‍්‍රවාදී අයිතියකි. මා විශ්වාස කරන්නේ රන්ජන් රාමනායක නම් චරිතය ගැන කුමන ආකල්ප පැවතියද ඒ අයිතිය වෙනුවෙන් පෙනීසිටිය යුතු බවය. මේ ලියන අවස්ථාව වන විට ඇඳීරි නිතිය කඩ කළා කියන පුද්ගලයා යම් පුද්ගලික ඉඩමක් දේපලක් වෙත ළ`ගාවෙමින් සිටියේය. ඔහු පැමිණියේ රජයේ නිලනිවාස සංකීර්ණයකටය. එහි නිවැසියාට තමන් වෙත පැමිණි කෙනා ගැන යම් වගකීමක් ඇත. එය එක් පැත්තකි. ඒ සමග රන්ජන් රාමනායක කළ බාධාකිරීම සහ විමල් වීිරවංශ එක්සත් ජාතීන්ගේ සංවිධානයේ ලංකා ශාඛාවේ ආරක්‍ෂාව පිණිස පොලිස්පති උපදෙස් මත පොලිස්් කණ්ඩායමක් සමග ඒ ස්ථානයට ගිය නියෝජ්‍ය පොලිස්පති පතිරණට තර්ජනය කර ඔහු එතැනින් පළවාහැරීමට කළ උත්සාහය සිහිපත් කළ යුතුය. භාරත ලක්‍ෂ්මන් ඝාතනය සමග කරළියට ආ මිරිහාන පොලිස් ස්ථානයේ  ගිනිඅවි බැහැර දෙන නැවත භාරගන්නා රෙජිස්ටරය දින තුනක් අස්ථානගත වීම ගැන එකී පොලිස් ස්ථානය භාරව සිටි ජ්‍යෙෂ්ඨ පොලිස් අධිකාරි දේශබන්ධු තෙන්නකෝන් දැරූ වගකීම සිහිපත් කළ යුතුවේ. මෙහිදී රන්ජන් රාමනායක අත්අඩංගුවට ගැනීමේ මෙහෙයුම භාරව සිටියේ දේශබන්ධු තෙන්නකෝන්  බව සිහිපත් කළ යුතුව ඇත.

රන්ජන් රාමනායක අත්අඩංගුවට ගැනීම ගැන දෙරණට පැමිණ ආණ්ඩුව වෙනුවෙන් උත්තර බැන්දේ නියෝජ්‍ය පොලිස්පති අජිත් රෝහණය. ඔහු මේ අවදානම්සහගත අවස්ථාවේ පොලිස් නිලධාරීන්ට  බාධාකිරීමේ අවදානම විස්තර කළේය. එහිදි ඇඳීරි නීතිය කඩකළ පිරිසකට යම් අවිධිමත් දඬුවමක් දීමේ වරදට වැඩ තහනමට ලක්වූ පොලිස් නිලධාරීන් ගැන උත්තර දෙන්ට සිදුවිය. ඔහු වසර සිය ගණනක් පැරණි පොලිස් සේවයේ ගරුත්වය ගැන උදම් ඇනීය. අඩුපාඩු නැති කිසිවෙක් නැත. එහෙත් විශිෂ්ට සේවයක් අපේක්‍ෂා කරයි නම් විවේචන අවශ්‍ය වේ. ඇඹිලිපිටියේ සභාපති එම්කේ අමිල පනාමුරේදී රාජකාරි කරමින් සිටි පොලිස් නිලධාරීන්ට ලේ ගලන තෙක් පහර දුන් ටී56 ගිනි අවිය නඩු භාණ්ඩයක් ලෙස අධිකරණයට ඉදිරිපත් කළේ නැත. එකී සිද්ධිය සිදුවීමෙන් එක් මසක් ගතවන තෙක් ඒ තක්කඩියා අත්අඩංගුවට ගැනීමට පොලිසිය අසමත් විය. පසුව ඔහු නීතිඥ රසික් සරුක් මගින් අධිකරණයට බාරවිය. අජිත් රෝහණ කියන පොලිසියේ ගෞරවය උදෙසා එම්කේ අමිල ආරක්‍ෂා කළාද යන්න ඒ අවධියේද පොලිස් රාජකාරි කළ අජිත් රෝහණ දැනසිටිය යුතුව ඇත.

මේ දිනවල ආර්ථික මධ්‍යස්ථාන සියල්ල වසා ඇත. පසුගිය සති කිහිපයේ තඹුත්තේගම ආර්ථික මධ්‍යස්ථානය විවෘත කර තිබිණ. ඒ දිනවල දඹුල්ල ආර්ථික මධ්‍යස්ථානය වසා දැමුවා පමණක් නොව ප‍්‍රකට දේශපාලනඥයෙකුගේ පුතෙක් එහි විධායක පුටුවේ වාඩිවී මාධ්‍යයට ප‍්‍රකාශ නිකුත් කරමින් සිටියේය. බඩගින්න පාලනය කරගත නොහැකි ජනතාව ඇඳීරි නිතිය කඩමින් පාර දිගේ එළවලූ වික්කාහ. ඒ අතර, තඹුත්තේගම ආර්ථික මධ්‍යස්ථානයට වට්ටි පන්මලූවල දමාගෙන එළවළු ගෙනඑමින් සිටි මහවැලි ගොවීන් ඇඳිරි නීතිය කියා පළවා හැරිය පොලිස් නිලධාරින් ගැන ඇසුණ කතා බොහෝය. මෙවැනි අවදානම් අවස්ථාවක අප විසින් බොහෝ දේ අවස්ථානුකූලව වෙනස් ලෙස යොදාගත යුතුව ඇත. ඒ අතින් අප අසමත්ය. මේ වසංගතය තවමත් පැතිරෙමින් පවතීය යන අපේක්‍ෂාවෙන් ඉවත් විය යුතු නැත.

රටක් එක්තැන් වී ඇත. අප කි‍්‍රයා කළ යුත්තේ සියල්ල කඩා වැටී ඇත යන තැන පටන්ය. සෞඛ්‍ය කළමනාකරණය රෝග නිවාරකයන්ට භාර දුන්නේද? නැත. ගුවන්තොට පාලනය සිවිල් පාලනයක පැවතියේද? උත්තරය නොදනිමි. එසේ වී නම් විදේශතව සිට පැමිණි හැම පුරවැසියාම  ඔහුගේ ප‍්‍රදේශයේ මහජන සෞඛ්‍ය පරීක්‍ෂකට සම්බන්ධ කළ හැකිව තිබිණ. ආහාර හි`ගය භාණ්ඩ බෙදාහැරීම කඩා වැටෙන තෙක් පාලකයන් දැනසිටියේ නැත. පාසල් ආරම්භ කරන නිවේදනය නිකුත් කරන්නේ ජනාධිපති මාධ්‍ය අධ්‍යක්‍ෂ විසිනි. එපමණක් නොවේ. පක්‍ෂ නායක රැුස්වීමක් පැවැත්වීමට විපක්‍ෂ නායක අවසර ඉල්ලා සිටිය යුත්තේ ප‍්‍රවෘත්ති අධ්‍යක්‍ෂගෙන්ය. එහෙත් අපේ විපක්‍ෂ නායක ඒ අවසරය ඉල්ලන්නේ පොලිස්පතිගෙනි. අප මේ අත්විඳින්නේ පොදු කඩාවැටීමක අහුපෑවතය. 

ඉඳහිට කොරොනා රෝගියෙකු දෙදෙනෙකු …… කමක් නෑ  ඡන්දය තියමු. යන ස්ථාවරයේ සිටි ආණ්ඩුව නිදා පිබිදියා මෙන් ගම්මන්පිල වීරවංශ ලවා ඡන්ද හදිසියක් නැති බව කියවති. එයින් නොනැවතී ඔවුන් එවැනි බොරුවක් කීම ගැන විපක්‍ෂ දේශපාලන පක්‍ෂවලට චෝදනා කරනු පෙනේ. දිනපතා ලැබෙන සංඛ්‍යාලේඛන අනුව වසංගත තත්වය යහපත් ආකාරයට ලංකාවේ පාලනය වෙමින් බවත්නා බව පෙනේ. ඒ සඳහා කැපවන සියල්ලන්ටම ස්තුතියි. එහෙත් ඒ හරහා පුද්ගලික න්‍යායපත‍්‍රවලට නැඹුරු නොවන ලෙස ඉල්ලා සිටිය යුතුවේ. අලූවා කැට හැඩයට කපා අවසන් වන විට අයිනේ තීරු ඉතිරිවේ. එනිසා අලූවා කපන කන ආකාරයෙන් කොරෝනා මර්දනය කළමනාකරණය නොකරන ලෙසද මතක් කරමු. ටෙස්ටින් සම්බන්ධව පාලකයන් මොකක්දෝ අකමැත්තක් දක්වති. සත්‍ය ලෙසම ඒ හරහා හෙළිවන සත්‍ය තත්වයට බියෙන් විය හැකිය. මේ වනවිට කළ ටෙස්ටින් හරහා අවම තත්වයක් බවට තහවුරු කිරීමේ උත්සාහයක් පවතින බව පෙනේ. එහෙත් උදාහරණයක් ලෙස 1000ක් පරීක්‍ෂණයට භාජනය කළ විට රෝගීන් හසු වන්නේ 50ක් නම් එය අවමයක් ලෙස සැලකීම යහපත් නොවේ. අප මේ තත්වය තුළ දාහට පනහක් නම් 10000ට 500ක් බව තේරුම් ගැනීමට වෑයම් කළ යුතුවේ. අවදානම තේරුම් ගත යුත්තේ එසේය.

මේ සියල්ල පෙළ ගස්වා අතීතය හාරා අවුස්සා කාගේවත් බෙල්ලේ ඔතනවා නොවේ. මෙවැනි අසීරු සමයක අවදානමෙන් මිදෙන්නට රටක මිනිස්සු භාවනා කරමින් විශ්වාසයන්ට ආමන්ත‍්‍රණය කරමින් සිටිත්. එවැනි චිත්ත සමාධියකට සම වැදුණ මිනිසුන්ට තිත්ත කුණුහරුප මතක් වෙන ලෙස කිසිවෙකු හැසිරිය යුතු නැති බව කිව යුතුවේ.

නීතිඥ චන්ද්‍රසිරි සෙනෙවිරත්න

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි