කොවිඞ්-19 වසංගතය ගෝලීය අර්බුදයක් බැවින් එයට මුහුණදීම සඳහා ජාතිවාදී සහ ආගම්වාදී අගතීන් සමනය කොට පවතින ගෝලීය වසංගතයට සාමූහිකව මුහුණදිය හැකි පොදුජන විඥානයක් ගොඩනැගීමට මැදිහත් වන ලෙස මෙරට සියලූ ආගමික, ජාතික හා දේශපාලන නායකත්වයන්ගෙන්, ජනමාධ්‍ය ආයතනවලින්, ජනමාධ්‍යවේදීන්ගෙන් සහ සමාජ මාධ්‍ය පරිශීලක පුරවැසියන්ගෙන් නිදහස් මාධ්‍ය ව්‍යාපාරය ඉල්ලා ඇත.
අපේ‍්‍රල් 09 වැනිදා මාධ්‍ය නිවේදනයක් නිකුත් කරමින් ඔවුන් ඒ බව පවසා ඇත.
කොව්ඞ් 19 වසංගත උවදුරට මුහුණ දීම සඳහා ප‍්‍රබල සාමූහික සමාජ ප‍්‍රයත්නයක් අවශ්‍යව තිබෙන මොහොතක විවිධ මුහුණුවරින් පැනනගින වාර්ගික හා ආගමික අන්තවාදී බලපෑම් එම සාමූහික සමාජ ප‍්‍රයත්නයට බරපතළ අභියෝගයක් හා තර්ජනයක් වී ඇති බව එම නිවේදනයෙන් අවධාරණය කර ඇත.
ප‍්‍රධාන ධාරාවේ මාධ්‍ය සහ සමාජ මාධ්‍ය ජාලා ඔස්සේ ජාති හා ආගම්වාදී අගතිදායක වාර්තාකරණයන් සිදුවන අයුරු නිරීක්ෂණය කරන බවත්. එබඳු අවස්ථාවන්හිදී කිසිදු වාර්ගික, ආගමික හෝ දේශපාලන පක්ෂ භේදයකින් තොරව සාධාරණ ලෙස නීතිමය පියවර ගත යුතු බවත් එම නිවේදනයෙහි සඳහන් කර ඇත.
මේ වන විට ශ‍්‍රී ලංකා මානව හිමිකම් කොමිසම හා විශ්වවිද්‍යාල වෛද්‍ය පීඨාධිපතිවරුන් නිකුත් කර ඇති නිවේදන මගින්ද ඉහත කරුණු කෙරෙහි අවධානය යොමුකර ඇතැයි එම නිවේදනයෙන් සිහිපත් කර ඇත. විශේෂයෙන් සමාජ මාධ්‍ය සහ ප‍්‍රධාන ධාරාවේ මාධ්‍ය තුළින් අසමගිය පැතිරවීමේ ප‍්‍රකාශ වැඩි වැඩියෙන් වාර්තා වන බවත් එතුළින් ජනිත වන යම් මතවාදයක් නිසා රෝග තත්ත්වයන් වසන් කිරීමට මිනිසුන් යොමු විය හැකැයි අනතුරු හඟවා ඇති බවත් වැඩිදුරටත් එහි සඳහන් කර ඇත.
- අනුරංග ජයසිංහ
