කෘෂිකර්ම අමාත්‍යාංශය ඉහළ කුලියක් ගෙවමින් පවත්වාගෙන ගිය රාජගිරියේ පිහිටි ගොඩනැගිල්ලට පොලිස් දෙපාර්තමේන්තුවට අයත් අංශ කිහිපයක් ගෙනයාමට තීරණය කර ඇතැයි වාර්තා වේ.
මේ පිළිබඳව විමසීමේදී පොලිස් මාධ්‍ය ප‍්‍රකාශක පොලිස් අධිකාරි ජාලිය සේනාරත්න පැවසුවේ එම ගොඩනැගිල්ලෙන් කෘෂිකර්ම දෙපාර්තමේන්තුව ඉවත් කර ගත්තද එම ගොඩනැගිල්ල සඳහා වසර දෙකක කාලයකට කුලී මුදල් ගෙවා ඇති බැවින් ඉදිරි වසරේදී එය පාවිච්චි කළ හැකි බවය. ඒ අනුව පොලිස් දෙපාර්තමේන්තුවේ ඒකක කිහිපයක් එම ගොඩනැගිල්ලට ගෙන යෑම සදහා මේ දිනවල සාකච්ජා පවත්වන බව ඔහු කීය.
දැනට අපරාධ පරීක්ෂණ දෙපාර්තමේන්තුව ඇතුළු පොලිසියේ අංශ කිහිපයක් පවත්වාගෙන යන කොළඔ, කොටුවේ නව ලේකම් කාර්යාලයේ ගොඩනැගිල්ලේ අලූත්වැඩියා කිරීමට සිදු වී ඇති බැවින් මෙසේ රාජගිරියේ ගොඩනැගිල්ලට යෑමට තීරණය කළ බව මාධ්‍ය ප‍්‍රකාශකවරයා වැඩිදුරටත් කීය.
ඒ අනුව පොලිස් මත්ද්‍රව්‍ය නාශක කාර්යාංශය, පොලිස් මාධ්‍ය ඒකකය, පොලිස් විශේෂ විමර්ශන අංශය ඇතුළු අංශ කිහිපයක් රාජගිරියේ ගොඩනැගිල්ලට ගෙන ඒමට සැලසුම් කර ඇත.
