No menu items!
26.2 C
Sri Lanka
28 March,2024

දේශපාලන පළිගැනීම් අපරාධවලට අලූත් අර්ථකථනයක්

Must read



දේශපාලන පළිගැනීම් ලෙස සාමාන්‍යයෙන් හඳුනාගැනීම වූයේ යම්කිසි ආණ්ඩු පාලන කාලයකදී එම ආණ්ඩුවට විරුද්ධ දේශපාලන බලවේගවලට සම්බන්ධ හෝ හිතැති රාජ්‍ය අංශයේ සාමාජිකයන්ගෙන් දේශපාලන වශයෙන් පළිගැනීමය.


ස්ථානමාරු, උසස්වීම් නොදීම, තනතුරු නොදීම, තනතුරේ පහළ හෙළීම, වැටුප් වර්ධක නොදීම, අනිවාර්ය නිවාඩු යැවීම, සේවයෙන් පහකිරීම ආදිය රාජ්‍ය අංශයේ දේශපාලන පළිගැනීම් යන්නට ඇතුළත් විය.


මේ ආකාරයේ දේශපාලන පළිගැනීම් පසුගිය යහපාලනයට පෙර රාජ්‍ය පාලනයට පත්වූ එජාප ප‍්‍රමුඛ හා ශ‍්‍රීලනිප ප‍්‍රමුඛ සෑම ආණ්ඩුවක්ම පාහේ කර තිබූ අතර ඒ හැම ආණ්ඩුවක්ම කළේ ඊට පෙර ආණ්ඩු කාලයේදී ඔවුන්ගේ පාක්ෂිකයන්ට හා හිතෛෂීන්ට කර තිබූ එවැනි දේශපාලන පළිගැනීම් සඳහා සහන සැලසීමය.


සේවයේ යළි පිහිටුවීම, තනතුරු ලබාදීම, උසස්වීම් ලබාදීම හා වන්දි ලබාදීම ආදිය ඒ යටතේ සිදුවිය. දේශපාලන පළිගැනීම් සිදුවීද යන්න සොයාබැලීම සඳහා බොහෝ විට පත්කරනු ලැබුයේ කමිටුය.


පසුගිය යහපාලන ආණ්ඩුව පිහිටුවීමෙන් පසු එය එජාප, ශ‍්‍රීලනිප ආණ්ඩුවක් බවට පත්වූ අතර ඒ නිසාම ඊට පෙර ආණ්ඩුවල මෙන් දේශපාලන පළිගැනීම් අසන්නට දකින්නට ලැබුණේ නැත.
ඒ නිසාම වත්මන් ආණ්ඩුවට පසුගිය යහපාලන ආණ්ඩු කාලයට අදාළව දේශපාලන පළිගැනීම් වශයෙන් බරපතළ ගණයේ සිදුවීම් මෙන්ම, සංඛ්‍යාත්මකව වැඩි සිදුවීම් ගණනක්ද සොයාගැනීමට තිබෙනවාද යන්න සැක සහිතය.


එම කරුණු කෙසේ වෙතත් අගමැති මහින්ද රාජපක්ෂ පසුගිය යහපාලන කාලයේ දේශපාලන පළිගැනීම් සිදුවූයේදැයි සොයාබැලීම සඳහා කමිටුවක් පත්කර ඇත. එය මෙතෙක් පැවති ක‍්‍රමයම අනුගමනය කිරීමකි.


එහෙත් ඊට එහා යමින් ඉතිහාසයේ පළමුවරට ජනාධිපති ගෝඨාභය රාජපක්ෂ දේශපාලන පළිගැනීම් සොයාබැලීම සඳහා කොමිසමක් පත්කර තිබේ. ජනවාරි මස 09 දිනෙන් ආරම්භ වූ එම ජනාධිපති කොමිසම සොයාබලන දේශපාලන පළිගැනීම් මෙතෙක් අප දැන සිටි පෙර සඳහන් කළ දේශපාලන පළිගැනීම්වලට වඩා වෙනස්ය. මෙම කොමිසම දේශපාලන පළිගැනීම් ලෙස සොයන්නේ අල්ලස් හෝ ¥ෂණ චෝදනා විමර්ශන කොමිෂන් සභාව, ශ‍්‍රී ලංකා පොලීසියේ මූල්‍ය අපරාධ කොට්ඨාසය, ශ‍්‍රී ලංකා පොලීසියේ පොලිස් විශේෂ විමර්ශන ඒකකය හා අපරාධ පරීක්ෂණ දෙපාර්තමේන්තුව පසුගිය යහපාලන ආණ්ඩු සමයේදී සිදුකරනු ලැබූ විමර්ශනයන්ය. යහපාලන ආණ්ඩු සමයේ අගමැතිවරයා යටතේ ක‍්‍රියාත්මක වූ ¥ෂණ විරෝධී ඒකකය ඇතුළු තෙවන පාර්ශ්වයක් ඉහත සඳහන් විමර්ශන ආයතනවලට අයුතු බලපෑමක් කර ඇතිද යන්නද ඒ යටතේ සොයාබලනු ඇත.


යහපාලන ආණ්ඩු සමයේ අගමැතිවරයා යටතේ තිබු ¥ෂණ විරෝධී ඒකකය යොමුකර හෝ අල්ලස් හෝ ¥ෂණ විමර්ශන කොමිසම පැවැත්වූ විමර්ශන හෝ නඩු පැවරීම් අපට සැලකිය හැක්කේ හුදු දේශපාලන පළිගැනීම් ලෙස පමණද? රජයේ හමුදා ක‍්‍රියාත්මක කළ අධික ආදායමක් ලැබෙන ව්‍යාපෘති තරගකාරි ලංසු කැඳවීමකින් තොරව පෞද්ගලික ව්‍යවසායකයෙකුට ලබාදීම, ඒ සඳහා අනුමැතියක් ලබාදීම හා රාජ්‍ය ආයතනයක් සතු ගිනි අවි නීති විරෝධීව ලබාදීම අප සැලකිය යුත්තේ හුදු රාජකාරිය ඉටු කිරීමක් ලෙසද? එවැනි අනුමැතිය දුන් රාජ්‍ය ආයතන නිලධාරියෙකුගේ ගිණුමට අනුමැතිය ගත් සමාගමෙන් රුපියල් මිලියන ගණනක මුදල් ලැබී ඇත්නම් එය අප සැලකිය යුත්තේ පරිත්‍යාගයක් හෝ මිතුරුකමක් ලෙසටද?


එසේම රාජ්‍ය ආයතනයක මුදල් භාවිත කරමින් සිය පෞද්ගලික ඉදිකිරීමක් යම් ඉහළ නිළධාරියෙකු සිදු කළහොත් එය අප සැලකිය යුත්තේ අඩු ආදායම්ලාභියෙකුට රජය ඉදිකිරීම් සහනයක් ලබාදුන් අවස්ථාවක් වශයෙන්ද?


පොලිස් මූල්‍ය අපරාධ කොට්ඨාසය වේවා, පොලිස් විශේෂ විමර්ශන ඒකකය වේවා ඒ ආකෘතියට පරීක්ෂණ හෝ නඩු පැවරීම් කරනු ලැබුයේ රාජ්‍ය මුදල් සාවද්‍ය පරිහරණය හෝ රාජ්‍ය මුදල් සම්බන්ධ වෙනත් මූල්‍ය වැරදි හා අල්ලස් සම්බන්ධයෙන්ය. එම චෝදනා බොරු නම් ඔවුන්ට අධිකරණයෙන් තම නිර්දෝෂීභාවය ඔප්පු කර නිදහස් විය හැකිය. නිදහසෙන් පසු ව්‍යාජ චෝදනා එල්ලකර අයිතිවාසිකම් කඩ කිරීම සම්බන්ධයෙන් වන්දි ඇතුළු අනෙකුත් සහන ලබා ගැනීමට ශ්‍රේෂ්ඨාධිකරණයේ පිහිට පැතිය හැකිය.


අපරාධ පරීක්ෂණ දෙපාර්තමේන්තුව ගතහොත් ඔවුන් යහපාලන ආණ්ඩු සමයේදී කළේ ඊට පෙර මහින්ද රාජපක්ෂ ආණ්ඩු සමයේ කළ එහෙත් නිසි පරීක්ෂණ සිදු නොවූ මිනිස් ඝාතන, පැහැරගෙන යෑම්, අතුරුදහන් කිරීම් ඇතුළු සුවිශේෂ අපරාධ පිළිබඳව පරීක්ෂණ සිදුකිරීමය. එහිදී ඍජුවම අපරාධය කළවුන්ද, අපරාධකරුවන්ට ආධාර අනුබල දුන් අයද, අපරාධකරුවන්ට රැුකවරණ දුන් අයද, අපරාධ තොරතුරු දැනගෙන සැඟවූ අයද විත්තිකරුවන් වීම වැළැක්විය නොහැක.


දේශපාලන පළිගැනීම් සිදුවී ඇතැයි මේ අපරාධකරුවන් සම්බන්ධයෙන් කියන්නේ කෙසේද?
ඒ නිසාම ජනාධිපතිවරයාගේ මෙම කොමිසම රාජ්‍ය අංශයේ අල්ලස, ¥ෂණය, හොරකම, රාජ්‍ය මුදල් සාවද්‍ය පරිහරණය වැනි මූල්‍ය අපරාධවල යෙදුණ අයත් මිනිස් ඝාතන, අතුරුදහන් කිරීම් ආදි අපරාධවල යෙදුණ අයත් දේශපාලන පළිගැනීම් සළුව පොරවා බේරාගැනීම සඳහා ගෙන එන ලද්දක් බව පැහැදිලිය. එය දේශපාලන පළිගැනීම් යන අරුතට අලූත් අර්ථකථනයක් එක්කර තිබේ.

පුරවැසියා

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි