වෛද්‍යවරුන්ට සහ මෙරට සෞඛ්‍ය පද්ධතියට බලපා ඇති ගැටලු කිහිපයකට විසඳුම් ලබාදෙන ලෙස ඉල්ලා රජයේ වෛද්‍ය නිලධාරීන්ගේ සංගමය හෙට (10) කොළඹ ජාතික රෝහල ඉදිරිපිටදී විරෝධතාවක් පැවැත්වීමට නියමිතය.
අද (9) පැවැති මාධ්‍ය හමුවකදී එම සංගමයේ සහකාර ලේකම් වෛද්‍ය චමිල් විජේසිංහ මහතා මේ බව ප්‍රකාශ කළේය. ඒ සඳහා දිවයින පුරා පිහිටි සංගමයේ දිස්ත්‍රික් ශාඛා නියෝජනය කරමින් වෛද්‍යවරුන් කොළඹට පැමිණීමට නියමිත බව ද ඔහු සඳහන් කළේය.
මෙම විරෝධතාව වැඩ වර්ජනයක් නොවන බවත්, සියලුම රෝහල්වල සාමාන්‍ය වෛද්‍ය සේවා බාධාවකින් තොරව පවත්වාගෙන යන බවත් වෛද්‍ය විජේසිංහ මහතා පැහැදිලි කළේය. වෛද්‍යවරුන්ගේ වැටුප් සහ දීමනා කප්පාදු කිරීම සම්බන්ධයෙන් මතුව ඇති ගැටලු, නිල නිවාස සම්බන්ධයෙන් මෙතෙක් විසඳී නොමැති ගැටලු සහ වෛද්‍ය වෘත්තිකයන්ගේ ආරක්ෂාව සම්බන්ධයෙන් පවතින ගැටලු පිළිබඳව රජයේ වෛද්‍ය නිලධාරීන්ගේ සංගමය මෙහිදී අවධානය යොමු කර ඇති බවත් මෙම ගැටලුවලට ඉදිරි අයවැය මගින් විසඳුම් ලබාදෙනු ඇතැයි සංගමය අපේක්ෂා කරන බව ද ඔහු පැවසීය.
පසුගිය වසර දෙකහමාරක කාලය පුරා වෛද්‍යවරුන් මෙම ගැටලුවලට විසඳුම් අපේක්ෂාවෙන් සිටි බව සඳහන් කළ ඔහු, ඒවාට විසඳුම් නොලැබුණහොත් හෙට පැවැත්වෙන විරෝධතාව ඉදිරි වෘත්තීය සමිති ක්‍රියාමාර්ගවල පළමු පියවර වනු ඇති බවට අනතුරු ඇඟවීය.
වෘත්තීය ආරක්ෂාව සහ සුබසාධනය සම්බන්ධයෙන් මතුව ඇති ගැටලු වෛද්‍ය ප්‍රජාව තුළ පවතින අසතුට තවදුරටත් ඉහළ නංවා ඇති බවත් වෛද්‍යවරුන්ගේ සහ විශේෂඥ වෛද්‍යවරුන්ගේ ගැටලුවලට විසඳුම් ලබාදීමට රජය අපොහොසත් වුවහොත්, මෙරට නිදහස් සෞඛ්‍ය සේවාව පවත්වාගෙන යාම සම්බන්ධයෙන් රජයේ කැපවීම පිළිබඳව ද ප්‍රශ්න මතුවනු ඇති බවත් ඒ මහතා පවසා තිබිණි.
ජාතික ජන බලවේග ආණ්ඩුවේ තෙවැනි අයවැය මගින් වෛද්‍ය ප්‍රජාව ඉදිරිපත් කර ඇති ගැටලුවලට නිශ්චිත විසඳුම් ලැබෙනු ඇතැයි අපේක්ෂා කරන බව ද වෛද්‍ය චමිල් විජේසිංහ මහතා වැඩිදුරටත් ප්‍රකාශ කළේය.
