වයස අවුරුදු 18ට වැඩි ශ්‍රී ලාංකිකයන්ගෙන් මිලියන 4ක පමණ පිරිසක් තවමත් බදු ගෙවන්නන් හඳුනාගැනීමේ අංකය (TIN) ලබාගෙන දේශීය ආදායම් දෙපාර්තමේන්තුවේ ලියාපදිංචි වී නොමැති බව එම දෙපාර්තමේන්තුවේ කොමසාරිස් නන්දන කුමාර මහතා පවසා ඇත.
රූපවාහිනී නාගිකාවක වැඩසටහනට එක්වෙමින් ඔහු මේ බව සඳහන් කළේය.
කොමසාරිස්වරයාගේ ප්‍රකාශය අනුව මේ වන විට පුද්ගලයන් මිලියන 13ක් පමණ TIN අංක ලබාගැනීම සඳහා දේශීය ආදායම් දෙපාර්තමේන්තුවේ ලියාපදිංචි වී ඇති අතර ශ්‍රී ලංකාවේ වයස අවුරුදු 18ට වැඩි ජනගහනය මිලියන 17ක් පමණ වන බැවින් තවත් මිලියන 4ක පමණ පිරිසක් ලියාපදිංචි විය යුතු බවට දෙපාර්තමේන්තුව හඳුනාගෙන ඇති බව ඔහු වැඩසටහනේදී පවසා ඇත.
මීට පෙර නිශ්චිත අවශ්‍යතා කිහිපයක් සඳහා පමණක් TIN අංක ලබාගැනීම අනිවාර්ය කර තිබුණ ද, නීතිය අනුව වයස අවුරුදු 18 සම්පූර්ණ කළ සෑම පුද්ගලයකුම TIN අංකයක් ලබාගත යුතු බව නන්දන කුමාර මහතා එම සාකච්ඡාවේදී පවසා ඇති අතර දේශීය ආදායම් දෙපාර්තමේන්තුවේ ලියාපදිංචි වන සෑම පුද්ගලයකුම බදු ගෙවිය යුතු බවට නීතිමය අවශ්‍යතාවක් නොමැති බව ද ඔහු අවධාරණය කර ඇත.
TIN අංකය ලබාගැනීම සම්බන්ධයෙන් මහජනතාව අතර අනවශ්‍ය බියක් සහ වැරදි අවබෝධයක් පවතින බව සඳහන් කළ කොමසාරිස්වරයා, මෙම නීතිමය අවශ්‍යතාව හඳුන්වා දී ඇත්තේ රටේ බදු ක්‍රමය වඩාත් විධිමත් කිරීම සහ විධිමත් බදු පරිපාලන පද්ධතියක් ඇති කිරීම සඳහා බව වැඩිදුරටත් පැහැදිලි කර ඇත.
