කාලගුණයේ සිදු වී ඇති විපර්යාසය මෙ වනවිට ඇඟට දැනෙන සංසිද්ධියක් බවට පත් වී තිබේ. වර්ෂාපතන රටාවේ ඉතා පැහැදිලි වෙනස් වීම් සිදු වී ඇති බැවින් ඒ වෙනස්කම්වලට අනුගත වෙමින් ජීවත් වීමට ජනයාට සිදු වී තිබේ. දේශපාලන හා ආර්ථික තලයේ ද ඇති වී ඇති වෙනස්කම් ද මේ ආකාර වේ. අපේ සමාජය මේ මොහොතේ දී ඉතාම තියුණු ආර්ථික හා දේශපාලන අවිනිශ්චිත තත්වයකට මුහුණ දී ඇත. ආර්ථික වශයෙන් ඇති වී අවිනිශ්චිතභාවය ගෝලීය ආර්ථිකය ම මුහුණ දී සිටින තියුණු අර්බුදකාරී තත්වය සමඟ ඍජු ලෙස සම්බන්ධ වී ඇත. එය කිසිසේත්ම තාවකාලික පැලැස්තර දමා සමනය කළ නොහැකි අර්බුදයක ප්රකාශනයක් ලෙස පවතී. කෙසේ වෙතත් උත්සාහ දැරෙමින් තිබෙන්නේ වෙන කළ නොහැකි දෙයක් නොමැති බැවින් කෙටිකාලීන හෝ සමහරවිට මධ්‍යකාලීන වශයෙන් යම් මට්ටමකින් සාර්ථක වීමට ඉඩ තිබේ යැයි විශ්වාස කෙරෙන කෙළවරක් නැති අත්හදාබැලීම්වල නිරත වීමටයි. මේ අත්හදාබැලීම් සිදු කෙරෙන්නේ බොහෝවිට සමාජයේ සිටින් අවවරප‍්‍රසාදිත ජනකොටස්වල ජීවිත පරදුවට තබමින් වීම ද සුවිශේෂ තත්වයකි. කෙසේ වෙතත් කිසිදු බලාපොරොත්තුවකින් තොරව සිදුකෙරෙන මේ අත්හදාබැලීම්, අන් විකල්පයක් නොමැත්තේ ය යන සාධාරණීකරණය යටතේ ඉවසා සිටීමට ජනයාට සිදු වී ඇත.
දේශපාලන ක‍්‍රමය තුළ ද මෙවැනි ම වූ බරපතළ අවිනිශ්චිත තත්වයක් දක්නට ලැබේ. ඇත්ත වශයෙන් ම, ආර්ථිකය පිළිබඳ තත්වයටත් වඩා, දේශපාලනය තුළ අවිනිශ්චිතභාවය ම පැවැත්මේ කොන්දේසිය ද වී තිබේ.
අද ඇති වී තිබෙන තියුණු දේශපාලන අවිනිශ්චිතභාවය පැතිමාන කීපයකින් සංයුක්ත වී ඇති එකකි. එක් අතකින් ආණ්ඩුව තුළම බරපතළ අභ්‍යන්තර ගැටුමක් මෝරා තිබේ. එසේ ම ආණ්ඩුවට විරුද්ධ දේශපාලන කඳවුරු අතර ද තියුණු බෙදීමක් දක්නට ලැබේ. රාජපක්ෂ කඳවුර තුළම පවා අභ්‍යන්තර ආතතියක් දක්නට පුළුවන. රාජපක්ෂ කඳවුර තුළ දක්නට ලැබෙන සුවිශේෂ තත්වය වන්නේ, මහින්ද රාජපක්ෂ කේන්ද්‍රකරගෙන ගොඩනැංවී ඇති ජනතා පෙළගැස්ම බොහෝ දුරට ශක්තිමත් ලෙස බලමුළු ගැන්විය හැකි ආකාරයෙන් තිබෙන්නේ වී නමුදු ප‍්‍රභූ නායකත්ව මට්ටමේ ඇති පරස්පර අභිලාෂ නිසා රාජපක්ෂ කඳවුරට ද කලින් සිතූ ආකාරයේ ශක්තිමත් දේශපාලන ගමනක් සඳහා ඇති හැකියාව සීමා වන බවකි.
ඇත්ත වශයෙන්ම මෙම අවිනිශ්චිත වාතාවරණය සමාජයේ ප‍්‍රජාතන්ත‍්‍රීය අවකාශය යම් දුරකට පුළුල් කර තිබෙන්නේ වී නමුදු, රාජ්‍ය යන්ත‍්‍රය මත මහජනයාට වගනොකියන පොදු මහජනයාගෙන් බෙහෙවින් දුරස්ථ වූ ප‍්‍රභූ කල්ලියකගේ ආධිපත්‍යය ශක්තිමත් කර ඇති බව පෙනේ. මෙම ප‍්‍රභූ කල්ලියේ කේන්ද්‍රය අරා වැජඹෙන රනිල් වික‍්‍රමසිංහ මහතා මේ තත්වය උපරිම වශයෙන් තමන්ට වාසිදායක ලෙස සලකා කටයුතු කරන බව පෙනේ. විශේෂයෙන් ම ඔහු සහ ජනාධිපති මෛත‍්‍රීපාල සිරිසේන මහතා අතර ඇති විරසකය සම්බන්ධයෙන් රනිල් වික‍්‍රමසිංහ මහතා ක‍්‍රියාකරන ආකාරය ඉතාම සිත්ගන්නාසුලූ එකකි. ජනාධිපතිවරයා කොයිතරම් රනිල් වික‍්‍රමසිංහ කඳවුර විවේචනයට භාජනය කළ ද රනිල් වික‍්‍රමසිංහ මහතා ජනාධිපතිවරයාට එරෙහිව වචනයකින් හෝ දොස් කියනු දක්නට නොලැබේ. එය වික‍්‍රමසිංහ මහතා හිතාමතා කළ ද නොකළ ද, ඒ ප‍්‍රවේශය වික‍්‍රමසිංහ මහතාට මහත්ඵල මහත් ආනිශංස ගෙන දෙන ප‍්‍රවේශයක් බව පෙනී යයි.
වික‍්‍රමසිංහ මහතාගේ දෘෂ්ටිකෝණයෙන් ගත් කල පවත්නා මෙම දේශපාලන අවිනිශ්චිතභාවය ඔහුට බෙහෙවින් වාසිදායක එකකි. මක් නිසාද යත් තමන්ට විරුද්ධ බලවේග ශක්තිමත් දේශපාලන බලවේගයක් බවට පත්වෙන්නේ මේ අවිනිශ්චිතභාවය නිසාවෙන් වීමයි. එක් අතකින් මේ දේශපාලන අවිනිශ්චිතභාවය වික‍්‍රමසිංහ මහතාට තම පක්ෂය තුළ මෙන්ම රාජ්‍ය යන්ත‍්‍රය තුළ ද සිය අණසක පවත්වාගෙන යාමට ඉඩකඩ ලබා දී තිබේ. අනෙක් අතට සිය සිය ආර්ථික තුළ සම්බන්ධයෙන් වූ තම මෙහෙයුම බාධාවකින් තොරව කරගෙන යාමට ද මෙම අවිනිශ්චිත වාතාවරණය ඉවහල් වී ඇත. මේ නිසා පවත්නා අවිනිශ්චිතභාවය විසින් ම අධිපති තුලනය බිඳ වැටීම තාවකාලික වශයෙන් සමනය කර තිබේ.
නිර්මාල් රංජිත් දේවසිරි
