මේ වර්ෂය මැතිවරණ වර්ෂයක් කියලා තමයි කියන්නේ. නමුත් ඒ ගැන විවිධ කතා දේශපාලන වේදිකාවලින් ඇහෙන්න පටන් අරගෙන තියෙනවා. රටේ ආර්ථිකය වගේම දේශපාලන තත්වයත් හරිම සංකීර්ණයි. මේ සියලු දේවල් එක්ක පවතින දේශපාලන තත්වය කොහොමද විග්රහ කර ගන්නේ.
හැම පාලකයෙක්ම ජනතාවගේ මූලික අවශ්යතා ඉටු කිරීමට බැරි වුණාට පස්සේ ජනතාව මර්දනය කරන්න බලහත්කාරී නීති පනවා ගන්නවා. ත්රස්ත විරෝධී පනත, මාර්ගගත පනත කඩිමුඩියේ ගේන්නේ ජනතා හඬ යටපත් කරන්න. ජනතාවගෙන් බුර බුරා නැගෙන ආණ්ඩු විරෝධය මැඬ පවත්වන්න. එහෙම නැතිව ත්රස්තවාදය මැඬ පවත්වන්න නෙමෙයි. ඒක පැහැදිලිව පේන්න තියෙනවා. අපි ඒවාට එරෙහිව පාර්ලිමේන්තුවේත් මහ පාරේත් දිගින් දිගටම සටන් කරනවා. ඒ වගේම අපි නීතිය ඉදිරියටත් යනවා. අද රටේ නීතියක් නැහැ. නීතිය වල් වැදිලා තියෙන්නේ. යුක්තිය සාධාරණත්වයක් නැහැ. නීතිය ක්රියාත්මක කිරීමට නම් ඕනෑ තරම් නීති රීති තියෙනවා. ප්රශ්නේ වෙන්නේ ඒවා ක්රියාත්මක වෙන්නේ නැහැ. නීතිය සාධාරණව ක්රියාත්මක වෙන්නේ නැහැ. බල පුළුවන්කාරයාට එක නීතියක්. නැති බැරි මනුස්සයාට තව නීතියක්. ආර්ථිකය කඩන් වැටිලා, දවසින් දවස බඩුමිල වැඩි වෙනවා. බදු බර වැඩි වෙනවා. මිනිස්සුන්ට ජීවත් වෙන්න බැහැ. මිනිස්සුන්ට මේ ආණ්ඩුව එපාවෙලා තියෙන්නේ. මේ ආණ්ඩුව වෙනස් කර ගැනීමේ වුවමනාව ජනතාවට තියෙනවා. ජනතාව ඉවසලා ඉන්නේ ඡන්දයක් එනකන්. ඡන්දයක් නොපැවැත්වෙනවා නම් ජනතාව පාරට බැහැලා මේ ආණ්ඩුවත් ජනාධිපතිවත් පලවාහරින එක අපි කාටවත් වළක්වන්න බැහැ.
විධායක ජනාධිපතිධුරය අහෝසි කිරීම පිළිබඳව නැවත කතාබහක් ඇතිවෙලා තියෙනවා.
මෙතෙක් කල් බලයට පත් වුණ හැම කෙනාම ආවේ විධායක ජනාධිපතිධුරය අහෝසි කරනවා කියලා. නමුත් එහෙම වුණේ නැහැ. කිසිම කෙනෙක් ඒ දේ කළේ නැහැ. ඒ පොරොන්දු කැඩුවා. ජනතාවට ඔවුන් ගැන කිසිම විශ්වාසයක් නැහැ. විධායක ජනාධිපතිධුරය අහෝසි කිරීම පිළිබඳව සාකච්ඡාව කඩිමුඩියේ තමයි ගෙනෙල්ලා තියෙන්නේ. මේ වෙලාවේ විධායක ජනාධිපතිධුරය අහෝසි කරන්න ඕනෑ කියලා කියන්නේ මාලිමාව දිනන නිසා. ඒ ගැන ලොකු බයක් ඇතිවෙලා තියෙනවා. ඒකට බයවෙලා තමයි හදිසියේ විධායක ජනාධිපති ක්රමය අහෝසි කරනවා කියන කථිකාවතක් කඩන්පාත්වෙලා තියෙන්නේ. කරූ ජයසූරිය ඉස්සර කරගෙන, චන්ද්රිකා බණ්ඩාරනායක ඉස්සර කරගෙන ඒ සටකපට යෝජනාව ගෙනත් තියෙනවා. විධායක ජනාධිපති ක්රමය අහෝසි කරන්න මේ කවුරුවත් මැදිහත් වෙන්නේ නැහැ. අපේ ප්රතිපත්තිය තමයි විධායක ජනාධිපති ක්රමය අහෝසි කිරීම අපි එදාත් ඒ ස්ථාවරයේ හිටියා. අදත් ඒ ස්ථාවරයේ ඉන්නවා. අනාගතයේත් ඒ ස්ථාවරයේ ඉන්නවා. ඒ වගේම විධායක ජනාධිපතිධුරය අහෝසි කිරීමට පුළුවන් වෙන්නේ මාලිමාවේ ජනාධිපති කෙනෙක් පත් කරලා, ආණ්ඩුක්රම ව්යවස්ථාවක් සම්මත කරලා අන්න ඒ ආණ්ඩුක්රම ව්යවස්ථාවෙන් තමයි සත්ය වශයෙන්ම විධායක ජනාධිපතිධුරය අහෝසි කිරීමට පුළුවන්කමක් එන්නේ. අපි ඒ වෙනුවෙන් මැදිහත් වෙනවා. ඊට මෙහා මේක අහෝසි කරන්න බැහැ. ඒක කරන්න නම් පාර්ලිමේන්තුවේ තුනෙන් දෙකක බලයක් ඕනෑ. ජනමත විචාරණයකුත් ඕනෑ. මේ පාර්ලිමේන්තුවේ ආණ්ඩුවට දැනට නම් තුනෙන් දෙකක් නැහැ. ඒ නිසා ඒක හරියන උප්පරවැට්ටියක් නෙමෙයි. තමන්ගේ බලය ගිලිහෙනකොට බලය පවත්වාගෙන යාමට ගේන අලුත් තුරුම්පුවක්. ඒ තුරුම්පුවට ජනතාව අහුවෙන්නේ නැහැ.
යම් හෙයකින් විධායක ජනාධිපති ක්රමය අහෝසි කිරීම සඳහා පාර්ලිමේන්තුවේ තුනෙන් දෙකේ බහුතර බලය ලබා ගැනීමට පාර්ලිමේන්තුව තුළ දී ඡන්දයකට ගියහොත්..
විධායක ජනාධිපතිධුරය අහෝසි කිරීමට පාර්ලිමේන්තුව තුළ ඡන්ද විමසීමකට නොඑන බව ස්ථිරයි. ඒ ගැන කතා කරලා වැඩකුත් නැහැ. එහෙම එකක් අද තියෙන පාර්ලිමේන්තුවේ වෙන්නේ නැහැ.
ජනාධිපතිවරණයට පෙර හදිසියේ හෝ පාර්ලිමේන්තු මැතිවරණයක් පැවැත්වුවහොත් එය ජාතික ජන බලවේගයට කොහොම බලපාවිද?
කිසිම ප්රශ්නයක් නැහැ. ජනතාවට ඕනෑ කුමක් හෝ මැතිවරණයක්. ජනතාවට ඕනෑ මේ ආණ්ඩුවට විරුද්ධව තමන්ගේ මතය ප්රකාශ කරන ඡන්දයක්. මොන ඡන්දේ ආවත් රටේ ජනතාව මේ ආණ්ඩුවට විරුද්ධව ඡන්දය පාවිච්චි කරනවා. මාලිමාවේ අපි ඕනෑම ඡන්දයකට සූදානම්. පාර්ලිමේන්තු මැතිවරණයක් මුලින් පවත්වනවානම් අපිට මේ දූෂිත ආණ්ඩුව ඉක්මනින්ම ඵලවා හරින්න පුළුවන්. කුමන ඡන්දයක් මුලින් තිබ්බත් අපි උපරිමයෙන්ම ජයග්රහණය කරනවා.
අපිට පෙනෙන්නට තියෙනවා මේ වන විට ජාතික ජන බලවේගය වටා මිනිසුන් එකතු වෙමින් සිටින බවක්. ජාතික ජන බලවේගයට යම් හෙයකින් රටේ පාලන බලය ලැබුණහොත් දරිද්රතාවේ ගිලිලා ඉන්න මිනිස්සුන්ගේ ජන ජීවිතය යථා තත්වයට පත් කරන්න කඩිනම් ආර්ථික වැඩපිළිවෙළක් තිබෙනවාද?
පැහැදිලිවම මේ රටේ ආර්ථිකය බංකොලොත් වෙන්න බලපාපු ප්රධාන හේතු දෙකක් තියෙනවා. එකක් තමයි හොරකම, දූෂණය, වංචාව, නාස්තිය. ඒකත් එක්ක බැඳිච්ච පිරිහුණ දේශපාලන සංස්කෘතිය. දෙක තමයි අපේ රටේ නිෂ්පාදන ආර්ථිකය බිඳ වට්ටපු එක. අපිට අද රුපියල් නැතිවෙලා තියෙන්නෙත් ඩොලර් නැතිවෙලා තියෙන්නෙත් ඒ නිසා. ජාතික ජන බලවේග ආණ්ඩුවක් ආවම මුලින්ම කරන්නේ දේශපාලන සංස්කෘතිය වෙනස් කරන එක. දේශපාලන සංස්කෘතිය වෙනස් කරලා, වංචාව, දූෂණය, හොරකම නැති කරලා රටේ යහ පාලනයක් ඇති කරනවා. ඒකෙන්ම ආර්ථිකය 50%ක් අනෙක් පැත්තට හරවන්න ආරම්භයක් ගන්නවා. එතැනින් එහාට සැලැස්මකට අනුව මේ රටේ නිෂ්පාදන ආර්ථිකය ඉලක්ක කර ගත්ත, නිෂ්පාදන ආර්ථිකයකට යනවා අන්න ඒකෙන් ජනතාවගේ දැවෙන ආර්ථික ගැටලුවලට විසඳුමක් ලැබෙනවා. අපිට සැලැස්මක් තියෙනවා. කෙටි කාලීන, මධ්ය කාලීන සහ දිගු කාලීන ආර්ථික වැඩපිළිවෙළක් ඇතුළේ, මේ ආර්ථිකය අවම කාලයක් තුළ ගොඩ ගන්නවා. නිෂ්පාදන ආර්ථිකයක් හරහා මේ වැටිච්ච ආර්ථික මේ වැටිච්ච ආර්ථික ප්රපාතයෙන් අනිවාර්යයෙන්ම අපි මේ රට ගොඩ ගන්නවා.
අයිඑම්එෆ් වැඩපිළිවෙළ ක්රියාත්මක කිරීම හරහා රාජ්ය සම්පත් විකිණීම, රාජ්ය ආයතන විකිණීම, සුබ සාධන කප්පාදුව වැනි විවේචන ප්රමාණයක් පහුගිය කාලයේ ඔබගේ පාර්ශ්වයෙන්ම ආවා. එහෙමනම් ජාතික ජන බලවේගය අයිඑම්එෆ් එකත් සමග ඉදිරියටත් වැඩ කරනවාද? වැඩ කරනවානම් ඒක කොහොමද වෙන්නේ?
අයිඑම්එෆ් ගිවිසුම අපි නැවත සමාලෝචනය කරනවා. ජනතාවටත් රටටත් අහිතකර යෝජනා අපි සංශෝධනය කරනවා. අයිඑම්එෆ් යෝජනා හරහා ජනතාවට බදු ගහලා තියෙනවා. ඒ වගේම අපේ විදුලිය, ඉන්ධන, ගෑස් මිල වැඩි කරලා තියෙනවා. ඒ සියල්ලම කළේ අයිඑම්එෆ් කොන්දේසි මත. ඒ වගේම අපේ රටේ රාජ්ය සම්පත් කුණු කොල්ලයට විකුණන්න යනවා. සියල්ලම සිදු වෙන්නේ අයිඑම්එෆ් කොන්දේසි මත. ඒවා රටට අහිතකරයි. ජනතාවගේ පැවැත්මට අහිතකරයි. අපි අයිඑම්එෆ් ගිවිසුම සමාලෝචනය කරලා ජනතාවට අහිතකර කොන්දේසි ඉවත් කර ගන්නවා. අපි රටේ ජනතාවගෙන් ජන වරම ඉල්ලන්නේ ඒ සඳහා තමයි. අපි අකමැති වුණත් දැන් ඒ අයිඑම්එෆ් ගිවිසුම ක්රියාතමක වෙනවා. රජය ඒ කොන්දේසිවලට එකඟවෙලා තියෙනවා. ඒ නිසා මුළුමනින්ම අහෝසි කරනවා කියලා අපි කියන්නේ නැහැ. හැබැයි ජනතාවට අහිතකර කොන්දේසි ඉවත් කිරීමට අපි මැදිහත් වෙනවා.
ජාතික ජන බලවේගයේ නායක අනුර කුමාර දිසානායක ඇතුළු පිරිස ඊයේ පෙරේදා ගිහිල්ලා ආව සංචාරයත් සමග ඒ ගැන ලොකු කතිකාවතක් නිර්මාණය වුණා ඉන්දීය මැදිහත්වීම් පිළිබඳව ජාතික ජන බලවේගයේ දරන ස්ථාවරය පිළිබඳව. ඒකත් එක්ක මම අහන්නේ භූ දේශපාලනික බල අරගලයේ ඉත්තෙක් නොවී සිටීමට ජාතික ජන බලවේගය අනුගමනය කරන්නේ මොනවගේ විදේශ ප්රතිපත්තියක් ද?
ඉන්දියාව, චීනය, ඇමරිකාව ලෝකයේ භූ දේශපාලනයේ බල අරගලයක නිරත වෙනවා. ශ්රී ලංකාව ඒ බල අරගලයේ නැහැ. ඒත් ශ්රී ලංකාව ඒ බල අරගලයේ ගොදුරක් බවට පත්වෙලා තියෙනවා. අපි ඒ තත්වය වෙනස් කරනවා. අපි කිසිදු රටක බල අරගලයේ ගොදුරක් විය යුතු නැහැ. අපි දේශපාලන ස්ථාවරත්වය කිසිදු රටකට ගැති නොවන විදේශ ප්රතිපත්තියක් අනුගමනය කිරීම. කිසිදු රටකට අපි ගැති වෙන්නේ නැහැ. නමුත් අපි හැම රටක් එක්කම රාජ්ය තාන්ත්රික වශයෙන් දේශපාලන ගනුදෙනු පවත්වනවා. ඒවා ශක්තිමත් කර ගන්නවා. ඒකට අපිට බටහිර නැගෙනහිර කියලා බේදයක් නැහැ. අපි ලෝකයේ හැම රටක් එක්කම සහයෝගයෙන් වැඩ කරනවා. ඉන්දියාවත් එක්ක, චීනයත් එක්ක, රුසියාවත් එක්ක, කියුබාවත් එක්ක සහ ලෝකයේ හැම රටක් එක්කම අපි සම්බන්ධතා පවත්වනවා. එහෙමයි කියලා අපි කිසිම රටක, කිසිම පාර්ශ්වයක බල අරගලයක ගොදුරක් වීමට තීන්දු තීරණ ගන්නේ නැහැ. අපි ස්වෛරී නිදහස් රාජ්යයක්. අන්න ඒ ස්ථාවරයේ සිට අපි කටයුතු කරනවා.
මේ රටේ දශක ගණනාවක් කුරුවල් වෙවී තිබුණ ප්රශ්නයක් තමයි ජාතික ගැටලුව. ජාතික ජන බලවේගයට ඒ සඳහා උත්තරයක් තියෙනවාද?
අපි සියලු පාර්ශ්වයන් එක්ක සාකච්ඡා කරලා ජාතික ගැටලුවට සාධාරණ විසඳුමක් ගෙන ඒමට පුළුවන් නව ආණ්ඩුක්රම ව්යවස්ථාවක් ඉදිරිපත් කරනවා. ඒ ආණ්ඩුක්රම ව්යවස්ථාව මේ රටේ ජනමත විචාරණයට ලක් කරනවා. ජනතාවගේ ජනමතයෙන් අලුත් ආණ්ඩුක්රම ව්යවස්ථාව සම්මත කරනවා. ඒ හරහා ජාතික ගැටලුවට විසඳුමක් ගේනවා. ඒ වගේම මේ රටේ මූලික අයිතිවාසිකම් ආරක්ෂා කරන, විධායක ජනාධිපතිධුරය අහෝසි කරන, කැබිනට් එකට, පාර්ලිමේන්තුවට බලය පැවරෙන අලුත් ආණ්ඩුක්රම ව්යවස්ථාවක් අපි ගේනවා. ඒ හරහා අපි මේ රටේ ප්රජාතන්ත්රවාදයත් ස්ථාපිත කරනවා.
