මහබැංකු බැඳුම්කර මගඩියට අදාළ පාර්ලිමේන්තු විවාදය තවමත් නොපැවැත්වීම පිළිබඳව දෙමළ ජාතික සන්ධානයේ පාර්ලිමේන්තු මන්තී‍්‍ර එම්.ඒ. සුමන්තිරන් දොස් නගා තිබුණේ පසුගියදා යාපනයේ පැවති ජන රැළියක් අමතමිනි.
ජනාධිපති ලේකම්වරයා විසින් කථානායකවරයාට යොමු කිරීමෙන් පසු සභාගත කරන ලද මහ බැංකු බැඳුම්කර මගඩියට අදාළ විශේෂ ජනාධිපති විමර්ශන කොමිෂන් සභාවේ වාර්තා පිළිබඳව විවාදය සභානායක ලක්ෂ්මන් කිරිඇල්ල විසින් කල් තබනු ලැබුණේ එම වාර්තාවල දෙමළ පිටපත් නොමැති බවට සුමන්තිරන් මන්තී‍්‍රවරයා පාර්ලිමේන්තුවේදී කරනු ලැබූ ප‍්‍රකාශයක් පදනම් කරගෙනය.
මහ බැංකු බැදුම්කර මගඩියට අදාළව ජනාධිපති කොමිෂන් සභාව විසින් සකස් කරන ලද සියලූම වාර්තා ඇමිණුුම් ජනාධිපති ලේකම්වරයා විසින් කථානායකවරයාට යොමුකර නැති අතර යොමු නොකරන ලද එම කොටස්වල තවමත් හෙළි නොවූ හොඳ හොඳ කථා ඇතැයිද සඳහන්ය.
ඒ කෙසේ වෙතත් මේ වනවිට මහබැංකු බැඳුම්කර මගඩිය මතකය අලූත් කරන්නේ එක් කටයුත්තක් නිසා පමණය. ඒ පර්පෙචුවල් ටේරෂරීස් හිමිකරු අර්ජුන් ඇලෝෂියස් එහි සේවක කසුන් පලිසේන හා හිටපු මහ බැංකු අධිපති අර්ජුන් මහේන්ද්‍රන්ට එරෙහිව පවරා ඇති නඩුවය. අර්ජුන් මහේන්ද්‍රන් සිංගප්පුරුවේ සිට ශී‍්‍ර ලංකාවේ අධිකරණ කටයුතු මඟහරිමින් සිටින කථා අසන්නට ලැබෙන අතර අර්ජුන් ඇලෝසියස් හා කසුන් පලිසේන තවදුරටත් රක්ෂිත බන්ධනාගාරගත වන කථා අසන්නට ලැබේ.
මහ බැංකු බැඳුම්කර මගඞීයේදී බොහෝ විට කතාබහ කෙරුණේ හා පරීක්‍ෂණ සිදුවූයේ මහබැංකු බැඳුම්කර ප‍්‍රාථමික වෙළෙඳපොලේ දී මිලදී ගැනීමේ ගනුදෙනු පිළිබඳවය. එහෙත් එසේ ප‍්‍රාථමික වෙළෙඳපොලේදී මිලදී ගැනුණු මහ බැංකු බැඳුම්කර ද්විතීයික වෙළෙඳපොළේදී විකිණීම සම්බන්ධයෙන් වූ කථා තවමත් හරි හැටි සාකච්ඡා වී නැත. ඊට එක් හේතුවක් වී ඇත්තේ එම ද්විතීයික වෙළෙඳපොළ ගනුදෙනු පිළිබඳව පොදුවේ හෝ වෙන් වෙන් වශයෙන් පරීක්‍ෂණ කිසිවක් සිදුනොවීමය.
මේ ද්විතීයික වෙළෙඳපොළ ගනුදෙනුවලටද රාජ්‍ය ආයතන හා රාජයේ භාරයේ ඇති ආයතන රැුසක් සම්බන්ධ වී ඇති බවට මේ වනවිට හෙළිදරව් වී හමාරය. ඒ අතරට රාජ්‍ය බැංකු මෙන්ම, ශී‍්‍ර ලංකා රක්ෂණ සංස්ථාවද, සේවක අර්ථසාධක අරමුදල හෙවත් ඊපීඑෆ්ද, සේවක භාරකාර අරමුදල හෙවත් ඊටීඑෆ්ද, විශ්වවිද්‍යාල ප‍්‍රතිපාදන කොමිෂන් සභාවද වේ.
ද්විතීයික වෙළෙඳපොළේ මහබැංකු බැඳුම්කර මිලදී ගැනීමේදී රුපියල් බිලියන 9ක පාඩුවක් සිදුවූ බව පවසමින් ශී‍්‍ර ලංකා මහ බැංකුව, ශී‍්‍ර ලංකා රක්ෂණ සංස්ථාව, ඊ.පී.එෆ්, ඊ.ටී.එෆ්. හා විශ්වවිද්‍යාල ප‍්‍රතිපාදන කොමිෂන් සභාව යන ආයතන පහ නඩු පවරා ඇති බව පසුගිය ජුලි 27 දින ලංකාදීප පුවත්පත වාර්තා කර තිබුණි. එහිදී අදාළ රාජ්‍ය ආයතන අධිකරණයට පවසා තිබුණේ වගඋත්තරකාර පර්පෙචුවල් ටේරෂරීස් සමාගම එම බැඳුම්කර නීතිවිරෝධී හා වංචනික ආකාරයට එම රාජ්‍ය ආයතනවලට අලෙවි කර ඇති බව හා ඒ මඟින් එම ආයතනනවලට සිදුවූ පාඩුව අයකර දෙන ලෙසයි.
මහ බැංකුවෙන් මිලදී ගත් බැඳුම්කර පර්පෙචුවල් ටේරෂරීස් සමාගම ද්විතීයික වෙළෙඳපොළේදී විකුණනු ලැබුවේ වංචනික ආකාරයකටද නැද්ද යන්න ඒ පිළිබඳව සිදුකරන විමර්ශනයකදී හඳුනාගත යුතු කරුණක්ය. එහෙත් පර්පෙචුවල් ටේරෂරීස් වංචනිකයාට හසුවීමට තරම් කිසිත් නොදන්නා තොත්ත බබාලා අදාළ රාජ්‍ය ආයතනවලට තීන්දු තීරණ ගැනීමේ කළමනාකාරීත්වයේ සිටියේ යැයි කිසිවකුට හෝ විශ්වාස කළ හැකිද? නැත. මහ බැංකු බැදුම්කර ප‍්‍රාථමික වෙළෙඳපොළේදී පර්පෙචුවල් ටේරෂරීස් සමාගමට මිලදී ගැනීමට උදව් උපකාර කළ හිටපු මහ බැංකු අධිපති අර්ජුන් මහේන්ද්‍රන් ඇතුළු මහ බැංකුවේ හොර නඩය හෙළිවී ඇත. ද්විතීයික වෙළෙඳපොළේදී මෙම බැඳුම්කර මගඩියට අනුග‍්‍රහය දැක්වූ රාජ්‍ය ආයතන කළමනාකාරිත්වය තවම හෙළිවී නැතිවා මෙන්ම ඔවුන්ට විරුද්ධව තවම කිසිවක්ම සිදුවී නැත.
මහ බැංකු බැඳුම්කර මගඩිය ද්විතීයික වෙළෙඳපොළ තුළ සිදුවන විටදී ඒ සඳහා විශාල දායකත්වයක් දක්වා ඇති එක් රාජ්‍ය ආයතනයක් වන්නේ ශී‍්‍ර ලංකා රක්ෂණ සංස්ථාවය. තොරතුරු දැනගැනීමේ අයිතිවාසිකම පනත යටතේ රක්ෂණ සේවක සංගමය ශී‍්‍ර ලංකා රක්ෂණ සංස්ථාවෙන් කරන ලද විමසීමකදී ලැබී තිබුණ පිළිතුර වී තිබුණේ ශී‍්‍ර ලංකා රක්ෂණ සංස්ථාව පෑන් ඒෂියා බැංකුව හරහා ද්විතීයික වෙළෙඳපොළේදී රුපියල් මිලියන 7292 (රු.7,292,243,200) මහ බැංකු බැඳුම්කර මිලදී ගෙන ඇති බවයි. ඒ 2015 ජුනි 17 දින සිට 2015 දෙසැම්බර් 10 දින දක්වා අවස්ථා පහකදීය.
එම තොරතුරු ඉල්ලීමට අදාළ පිළිතුරේ ඇති උත්ප‍්‍රාසය වන්නේ එම බැඳුම්කර පර්පෙචුවල් ටේරෂරිස් සමාගම විසින් පෑන් ඒෂියා බැංකුවට විකුණා ඇති ඒවාදැයි දැනගැනීමට අවශ්‍ය තොරතුරු නියෝජ්‍ය සාමාන්‍යාධිකාරි (ආයෝජන) සතුව නොමැති බව දැන්වීමය. එසේ වුවද මහබැංකු බැඳුම්කර පිළිබඳ විශේෂ ජනාධිපති කොමිෂන් සභාවේදී පෑන්ඒෂියා බැංකුවේ ඉහළ නිලධාරීන්ගෙන් කරන ලද විමසීම්වලදී ශී‍්‍ර ලංකා රක්ෂණ සංස්ථාව එම බැංකුවෙන් බැඳුම්කර මිලදීගත් බව හෙළිවී තිබුණි.
කෙසේ වෙතත් 2018 ජනවාරි 06 දින සහිතව ශී‍්‍ර ලංකා රක්ෂණ සංස්ථාවේ සභාපති හේමක අමරසූරිය මහබැංකු බැදුම්කර සම්බන්ධයෙන් පළවන මාධ්‍ය වාර්තා පිළිබඳ කලබලයට පත්වී එහි සියලූ සේවකයන්ට නිවේදනයක් යවනු ලබයි. එහි මෙසේ සඳහන් වේ.
‘‘ශී‍්‍ර ලංකා මහ බැංකුව විසින් බැඳුම්කර නිකුත් කිරීමේදී සිදුවූ අක‍්‍රමිකතා සෙවීම සඳහා පත් කරන ලද ජනාධිපති කොමිෂන් සභාව තුළ හෙළිදරව් වූ කරුණු’’ යන සිරස්තල යටතේ පළවුණ පුවත්පත් වාර්තා සහ අතිගරු ජනාධිපතිතුමා විසින් මේ සම්බන්ධව කරන ලද ප‍්‍රකාශය හා බැඳේ.
ඔබ විසින් දන්නා පරිදි මෙහිදී ගණුදෙනුකරුවන් වශයෙන් ජාතික ඉතිරිකිරීමේ බැංකුව, ශී‍්‍ර ලංකා රක්ෂණ සංස්ථාව, සේවක අර්ථසාධක අරමුදල සහDFCC (තැරැව්කරු ලෙස) යන ආයතන පර්පෙචුවල් ටේරෂරිස් (PTL)ආයතනය විසින් බැඳුම්කර රාජ්‍ය ආයතනවලට ද්විතීයික වෙළෙඳපොළේදී විකිණීම සම්බන්ධයෙන් මිත‍්‍රයන් සහ කාණ්ඩයක් වශයෙන් කි‍්‍රයාකරන ලද බැව් සඳහන් වේ.
ඔබ දන්නා පරිදි අතිගරු ජනාධිපතිතුමන් විසින් ජනවාරි 03 වන දින පවත්වන ලද මහජන ඇමතීමේදී බැඳුම්කර වාර්තාවට අනුව රජයට සිදුවූ අලාභය වශයෙන් රුපියල් මිලියන 11,145 සහ එම පාඩුව තුළ සේවක අර්ථසාධක අරමුදල, මහපොල ශිෂ්‍යත්ව අරමුදල, ශී‍්‍ර ලංකා රක්ෂණ සංස්ථාව සහ ජාතික ඉතිරිකිරීමේ බැංකුව යන ආයතනවල සිදුවූ පාඩුව මිලියන 8,529 (රුපියල් බිලියන 8.5) බව සඳහන් වන අතර සහ එම රුපියල් බිලියන 8.5 මුදල ඉහත සඳහන් සියලූම ආයතනවලට ආරෝපණය වූ බව සඳහන් වේ. ඉහත සඳහන් කළ රුපියල් බිලියන 8.5 ක පාඩුව ප‍්‍රධාන වශයෙන් සිදුවී ඇත්තේ සේවක අර්ථසාධක අරමුදල හරහාය.
මේ සම්බන්ධව අප දැන්වීමට අදහස් කරනුයේ, සුදුසුකම් සහිත අරමුදල් කළමනාකරණය සම්බන්ධයෙන් දැනීම ලත් අයෙකු ලෙස නියෝජ්‍ය සාමාන්‍යාධිකාරිවරයා එම තනතුර හොබවන ලද බවත්, එසේම ඔහු වෙත තබන ලද විශ්වාසය සහ වගකීම පදනම් කරගෙන ඔහු ලබා දුන් තොරතුරු සහ නිර්දේශයන් කළමනාකරණය සහ (Investment Committee) ආයෝජන අනුකමිටුව විසින් පිළිගන්නා ලද බවයි. කෙසේ වුවද මෙම අක‍්‍රමිකතාව අනාවරණය වූ වහාම සහ එම තොරතුරුවල බරපතළභාවය මනාව අවබෝධ කරගෙන වගකිවයුතු අධ්‍යක්ෂක මඩුල්ලක් ලෙස අත්‍යවශ්‍යයෙන්ම කළ යුතු සියලූ කටයුතු සිදුකළ අතර පළමුව වෝහාරික විගණනය (Forensic Audit) සිදුකළ අතර එම විගණනය මේ වන විට අවසාන අදියර දක්වා පැමිණ ඇත. තවදුරටත් අප විසින් මෙම බැඳුම්කර සම්බන්ධව කටයුතු මෙහෙයවන කමිටුව වෙතින් සාක්ෂි ඉල්ලා ඇති අතර මෙම නිකුත් කරන ලද රපෝර්තුවල පිටපත්, ජනාධිපති කාර්යාලයෙන් තොරතුරු දැනගැනීමේ පනත යටතේ විමසා සිටින ලදි. තවද යෝග්‍ය කාර්යාවලියක් වශයෙන් නියෝජ්‍ය සාමාන්‍යාධිකාරි/ ආයෝජන 2017/11/20 වන දින සිට අනිවාර්ය නිවාඩු යවන ලදි.
තවද, මුදල් ආයෝජනය සම්බන්ධ රාජකාරි කටයුතු කරන දෙපාර්තමේන්තුව සහ එම කාර්ය මණ්ඩලය සහ එම කි‍්‍රයාවලියද අප විසින් ශක්තිමත් කරමින් පවතින බවත් සියලූ නීතිරීතිවලට අනුකූලව එම දෙපාර්තමේන්තුව වඩාත් වගකිව යුතු ලෙස කටයුතු කිරීමට අවශ්‍ය කටයුතු කි‍්‍රයාත්මක කරමින් පවතී.
එසේම අලූතින් හඳුන්වාදෙනු ලබන ක‍්‍රමවේදයන් ලෙස, ආයෝජන දෙපාර්තමේන්තුව ප‍්‍රතිසංවිධානය කිරීම, අනුකූලතා රාමුව ශක්තිමත් කිරීම සහ වාර්ෂික අභ්‍යන්තර විගණන කටයුතු ස්වාධීන වරලත් ගණකාධිකාරි සමාගමක් (රක්ෂණ සමාගම්වලට අදාළ ආයෝජන කටයුතු පිළිබඳ දැනුම ලත් සමාගමක්) මගින් කරවීම වැනි දේ මගින් නියමිත පාලනයක් සහ ගිණුම් තැබීම වැනි සියලූම කාර්යයන් නිසි පරිදි පාලනයක් ඇති කරවීම වැනි දේ මගින් කිසිදු දෝෂයක් අනාගතයේදී ඇතිවීම වැළැක්වීම කි‍්‍රයාමාර්ග යොදවා ඇති බැව් දැන්වීමට අදහස් කරමි.
එසේම වගකිව යුතු කළමනාකාර මඩුල්ලක් ලෙස අප විසින් කිසිදු ආකාරයේ වංචනික කි‍්‍රයාවක් අනුමත නොකරන බවත් ඒ වෙනුවෙන් දැඩි කි‍්‍රයාමාර්ග ගන්නා බවත් දැන්වීමට අදහස් කරමි.’’
ඒ අනුව පෑන් ඒෂියා බැංකුව මගින් ලබාගත් බැඳුම්කරවල තොරතුරු තමන් සතුව නැතැයි කියූ ශී‍්‍ර ලංකා රක්ෂණ සංස්ථාවේ නියෝජ්‍ය සාමාන්‍යාධිකාරි රක්ෂණ ධනුක ලියනගමගේ ප‍්‍රශ්නයට පිළියම වශයෙන් අනිවාර්ය නිවාඩු යවා ඇත. එසේ වුවද වැටුප් දීමනා ඇතුළු සියලූ පහසුකම් එදින සිට ඔහුට ලබාදෙමින් ශී‍්‍ර ලංකා රක්ෂණ සංස්ථාව බැඳුම්කර මගඩියේ වගඋත්තරකරුවන් රකිමින් යෙහෙන් වැජඹේ. එසේ අප කියන්නේ ඇයි? රක්ෂණ සංස්ථාවේ සභාපතිවරයා ඔහුගේ අභ්‍යන්තර දැනුම් දීමේම සඳහන් කරන වෝහාරික විගණනය සඟවා තබාගෙන ඇති නිසාය. රක්ෂණ සේවක සංගමය තොරතුරු දැනගැනීමේ පනත යටතේ තොරතුරු ඉල්ලූ විට එම විගණනය ගැන තොරතුරු දීම ප‍්‍රතික්‍ෂේප කර ඇත. වෝහාරික විගණනයේ ඇත්තේ කුමක්ද? එහි ඇති තොරතුරුවලට අනුව හා ශී‍්‍ර ලංකා රක්ෂණ සංස්ථාව ජනාධිපති කාර්යාලයෙන් ඉල්ලා ඇති තොරතුරු අනුව අනිවාර්ය නිවාඩු යවා ඇති නියෝජ්‍ය සාමාන්‍යාධිකාරි ආයෝජන හැර වෙන කිසිවකු හෝ කිසිවක් ගැන අලූතින් තොරතුරු හෙළිදරව්වී නැතිද? වෙනත් කිසිදු පියවරක් අරගෙන නැත්තේ ඒ නිසාද? රක්ෂණ සංස්ථාවේ බලධාරීන් පිළිතුරු දිය යුත්තේ ඒ ගැනය.
රක්ෂණ සේවක සංගමය මේ බැඳුම්කර මිලදී ගැනීම පිළිබඳව පරීක්ෂා කරන ලෙස ඉල්ලා අල්ලස් හෝ දුෂණ චෝදනා විමර්ශන කොමිසමට, අපරාධ පරීක්‍ෂණ දෙපාර්තමේන්තුවට, විගණකාධිපතිවරයාට හා පාර්ලිමේන්තුවේ පොදු ව්‍යාපාර පිළිබඳ කාරක සභාවට පැමිණිලි කර ඇත. ඒත් ඒ කිසිදු ආයතනයකින් තවමත් නිසි පිළිතුරක් ලැබී නැත. පිටට පෙනෙන සේ ශී‍්‍ර ලංකා රක්ෂණ සංස්ථාවේ නියෝජ්‍ය සාමාන්‍යාධිකාරි ආයෝජන දනුක ලියනගමගේ අනිවාර්ය නිවාඩු යවා තිබුණද, එදා 2015 වසරේදී බැඳුම්කර ආයෝජන පිළිබඳව තීන්දු ගැනීමේ ශී‍්‍ර ලංකා රක්ෂණ සංස්ථා ආයෝජන කමිටුව එහි සභාපති හේමක අමරසූරියද නියෝජනය කර ඇත. ඊට අමතරව එවකට එහි කළමනාකාර අධ්‍යක්‍ෂ ධුරය දැරූ හිටපු අමාත්‍ය රවී කරුණානායකගේ මස්සිනාවූ ටී.එම්.ආර්. බන්සජයා ද, එවකට සම කළමනාකරණ අධ්‍යක්‍ෂ ධුරය දැරූ කීත් බර්නාඞ්ද නියෝජනය කර ඇත. ඊට අමතරව අධ්‍යක්ෂවරයෙකු වූ ප‍්‍රදීප් ලියනමානද එය නියෝජනය කර ඇත. මේ අය අතුරින් දැන් ශී‍්‍ර ලංකා රක්ෂණ සංස්ථාවේ ඉන්නේ එහි සභාපති අමරසූරිය පමණය.
ඊට අමතරව ආයෝජන කමිටුවේ අනෙකුත් සාමාජිකයන් වශයෙන් කටයුතු කර ඇත්තේ ශී‍්‍ර ලංකා රක්ෂණ සංස්ථාවේ වරලත් රක්ෂණ නිලධාරී (පි‍්‍රන්සිපල් ඔපිසර්) සුරේෂ් පරණවිතාන, ජ්‍යෙෂ්ඨ නියෝජ්‍ය සාමාන්‍යාධිකාරී රංජිත් පෙරේරා, සහකාර සාමාන්‍යාධිකාරි නලින් සුභසිංහ හා සහකාර කළමනාකාර චමින්ද ගුණසිංහය. මේ අය අතරින් දැනට ශී‍්‍ර ලංකා රක්ෂණ සංස්ථාවේ සේවයේ නැත්තේ රංජිත් පෙරේරා පමණය. අවශ්‍ය එහි දැනට සේවය කරන්නේ හෝ නොකරන්නේ කවුද යන්න නොවේ. රුපියල් මිලියන 7292 ක මේ මහා බැඳුම්කර මිලදී ගැනීම ගැනත් ඒ ගැන සිදු කෙරෙනවා යැයි කියන පරීක්‍ෂණ ගැනත් අසන්නට සිදුවී තිබෙන්නේ, එම බැඳුම්කර මිලදී ගැනීමට තීන්දු තීරණ ගත් ආයෝජන කමිටුව නියෝජනය කළ එහි සභාපති හේමක අමරසූරියගෙන් වීමයි. ඔහු එම තනතුරේ තබාගෙන සාධාරණ පරීක්‍ෂණයක් සිදුකළ හැකිද? හරියටම අග‍්‍රාමාත්‍ය රනිල් වික‍්‍රමසිංහ අර්ජුන් මහේන්ද්‍රන් මහබැංකු අධිපතිකමේ තබාගෙන පරීක්‍ෂණ සිදුකළා වගේය. එම නිසා බැඳුම්කර මගඩිය පිළිබඳ සාධාරණ පරීක්‍ෂණයක් සිදුකරනවා නම් ඔහු එම තනතුරට පත්කළ දේශපාලන බලධාරීන් ඒ ගැන දැඩි අවධානය යොමුකිරීම අත්‍යවශ්‍ය කරුණක් බව අපගේ නිරීක්‍ෂණයය.
