සිංහරාජ වනාන්තර රක්ෂිතය තුළ දුර්ලභ කෘමි හා උරග විශේෂ එකතු කරමින් සිටි බව කියන චීන ජාතිකයන් සිව්දෙනෙකු වනජීවී නිලධාරීන් විසින් අත්අඩංගුවට ගෙන තිබේ.
උඩවලව ජාතික වනෝද්‍යානයේ පනාහඩුව වනජීවී අඩවි කාර්යාලයට ලැබුණු තොරතුරක් මත සිදුකළ වැටලීමකදී සැකකරුවන් අත්අඩංගුවට ගෙන ඇත.
ඔවුන් සන්තකයේ තිබී කෘමි හා සත්ත්ව විශේෂ 40කට ආසන්න සංඛ්‍යාවකට අයත් නිදර්ශක 250කට වැඩි ප්‍රමාණයක් සොයාගෙන තිබේ.
වනජීවී සංරක්ෂණ දෙපාර්තමේන්තුව සඳහන් කර ඇත්තේ සැකකරුවන් මීට පෙර අවස්ථාවලදී ද ශ්‍රී ලංකාවට පැමිණ ඇති බව විමර්ශනවලදී අනාවරණය වූ බවයි. සැකකරුවන් සහ සොයාගත් නිදර්ශක කළවාන මහේස්ත්‍රාත් අධිකරණයට ඉදිරිපත් කිරීමෙන් පසු ඔවුන් නොවැම්බර් 23 වැනිදා දක්වා රක්ෂිත බන්ධනාගාරගත කිරීමට මහේස්ත්‍රාත්වරයා නියෝග කර තිබේ.
සැකකරුවන් සන්තකයේ තිබී සොයාගත් ජීවී සහ අජීවී නිදර්ශක හඳුනාගැනීම සඳහා අද (10) ජාතික කෞතුකාගාරය වෙත භාරදෙන ලෙස ද මහේස්ත්‍රාත්වරයා නියෝග කර ඇත. හඳුනාගැනීමෙන් අනතුරුව එම නිදර්ශක ඔවුන්ගේ ස්වාභාවික වාසස්ථානවලට මුදාහැරීමට නියමිතය.
