- සැකකරුවන් රඳවා තබාගැනීමේ කාලය පැය 72 සිට 48 දක්වා අඩු කිරීමටත්
- වරෙන්තුවක් නොමැතිව ගොඩනැගිලි පරීක්ෂා කිරීමේ බලතල සංශෝධනය කිරීමටත් යෝජනා
රජය විසින් පාර්ලිමේන්තුවට ඉදිරිපත් කර ඇති සංවිධානාත්මක අපරාධ වැළැක්වීමේ පනත් කෙටුම්පතේ අන්තර්ගත පච්ච සහ ශරීරයේ සලකුණු සම්බන්ධ ප්‍රතිපාදන මෙන්ම බරපතළ අපරාධ නඩු සම්බන්ධ තොරතුරු ප්‍රසිද්ධ කිරීමට අධිකරණයේ පූර්ව අවසරය ලබාගත යුතු බවට වන ප්‍රතිපාදනය ද ඉවත් කිරීමට රජය එකඟ වී ඇති බව නීතිපතිවරයා නොවැම්බර් 9 වැනිදා ශ්‍රේෂ්ඨාධිකරණයට දැනුම් දුන්නේය.
ඊට අමතරව සැකකරුවකු මහේස්ත්‍රාත්වරයකු වෙත ඉදිරිපත් කිරීමට පෙර රඳවා තබාගත හැකි කාලය පැය 72 සිට පැය 48 දක්වා අඩු කිරීම, සෝදිසි වරෙන්තුවක් නොමැතිව ඉඩම් සහ ගොඩනැගිලි පරීක්ෂා කිරීමට ලබාදී තිබූ බලතල සංශෝධනය කිරීම ඇතුළු තවත් වෙනස්කම් කිහිපයක් පනත් කෙටුම්පතට ඇතුළත් කිරීමට යෝජනා වී තිබේ.
නීතිපතිවරයා වෙනුවෙන් පෙනී සිටි සොලිසිටර් ජනරාල් විරාජ් දයාරත්න මහතා මෙම කරුණු අනාවරණය කළේ පනත් කෙටුම්පතේ ඇතැම් විධිවිධාන ආණ්ඩුක්‍රම ව්‍යවස්ථාවට පටහැනි බව පවසමින් ගොනු කර ඇති පෙත්සම් 26ක් ශ්‍රේෂ්ඨාධිකරණය හමුවේ විභාගයට ගත් අවස්ථාවේදීය.
අගවිනිසුරු ප්‍රීති පද්මන් සූරසේන මහතාගේ සභාපතිත්වයෙන් යුත් අචල වෙංගප්පුලි සහ සම්පත් අබේකෝන් යන විනිසුරුවරුන්ගෙන් සමන්විත ත්‍රිපුද්ගල විනිසුරු මඬුල්ලක් හමුවේ මෙම පෙත්සම් විභාගය පැවැත්විණි.
සුරාබදු සහ ප්‍රකාශන හිමිකම් වැරදි ඉවත් කිරීමටත් යෝජනා
පෙත්සම් විභාගය ආරම්භ වූ අවස්ථාවේදී අධිකරණය හමුවේ කරුණු දැක්වූ සොලිසිටර් ජනරාල් විරාජ් දයාරත්න මහතා සඳහන් කළේ පෙත්සම්කරුවන් විසින් ඉදිරිපත් කර තිබූ සංශෝධන යෝජනා අදාළ අමාත්‍යාංශ වෙත යොමු කර සාකච්ඡා කළ බවයි.
එම සාකච්ඡාවලින් අනතුරුව පනත් කෙටුම්පතේ ඇතැම් ප්‍රතිපාදන ඉවත් කිරීමටත් තවත් ප්‍රතිපාදන සංශෝධනය කිරීමටත් එකඟතාවකට පැමිණ ඇති බව ඔහු පැවසීය.
ඒ අනුව පනත් කෙටුම්පතට ඇතුළත් කර තිබූ සුරාබදු පනත යටතේ ගැනෙන වැරදි සියල්ල ඉවත් කිරීමට යෝජනා වී තිබේ.
බුද්ධිමය දේපළ නීතියට අදාළ ප්‍රකාශන හිමිකම් උල්ලංඝනය කිරීමේ වැරදි ද පනත් කෙටුම්පතෙන් ඉවත් කිරීමට එකඟතාව පළ වී ඇති බව සොලිසිටර් ජනරාල්වරයා අධිකරණයට දැනුම් දුන්නේය.
මෙම සංශෝධන පාර්ලිමේන්තුවේ කාරක සභා අවස්ථාවේදී ඉදිරිපත් කිරීමට නියමිත අතර, යෝජිත වෙනස්කම් ඇතුළත් ලේඛනයක් ද ශ්‍රේෂ්ඨාධිකරණයට ඉදිරිපත් කර තිබේ.
මාධ්‍ය වාර්තාකරණයට බලපාන 14(3) වගන්තිය ඉවත් කරයි
පනත් කෙටුම්පතේ 14 වැනි වගන්තිය සම්බන්ධයෙන් අගවිනිසුරු ප්‍රීති පද්මන් සූරසේන මහතා සොලිසිටර් ජනරාල්වරයාගෙන් විශේෂයෙන් ප්‍රශ්න කර ඇති අතර එම වගන්තියේ අන්තර්ගත ප්‍රතිපාදන ජනමාධ්‍ය කටයුතුවලට බලපාන බවට පෙත්සම් විභාගයේදී කරුණු ඉදිරිපත් වී ඇති බව අගවිනිසුරුවරයා පෙන්වා දුන්නේය.
ඊට පිළිතුරු දුන් සොලිසිටර් ජනරාල්වරයා සඳහන් කළේ 14 වැනි වගන්තියේ අරමුණ බරපතළ අපරාධවල වින්දිතයන්ගේ අනන්‍යතාව ආරක්ෂා කිරීම බවයි. එහෙත් එම වගන්තියේ 14(3) උපවගන්තිය මගින් බරපතළ අපරාධ සම්බන්ධ නඩුකරයක තොරතුරු ප්‍රසිද්ධ කිරීමට අධිකරණයේ පූර්ව අනුමැතිය ලබාගත යුතු බවට පනවා තිබූ ප්‍රතිපාදනය ඉවත් කිරීමට තීරණය කර ඇති බව ඔහු පැවසීය.
ඒ අනුව වින්දිතයන්ගේ අනන්‍යතාව ආරක්ෂා කිරීම සඳහා වන ප්‍රතිපාදන සහ නඩු කටයුතු වාර්තා කිරීමට අධිකරණයේ පූර්ව අවසරය ලබාගැනීමේ අවශ්‍යතාව වෙන වෙනම සලකා බැලීමට රජය පියවර ගෙන තිබේ.
පච්ච සහ ශරීරයේ සලකුණු පිළිබඳ ප්‍රතිපාදන ඉවතට
සංවිධානාත්මක අපරාධ කල්ලියක සාමාජිකත්වය හඳුනාගැනීම සම්බන්ධයෙන් පනත් කෙටුම්පතේ ඇතුළත් කර තිබූ පච්ච සහ ශරීරයේ සලකුණු පිළිබඳ ප්‍රතිපාදන ද ඉවත් කිරීමට තීරණය කර ඇති බව සොලිසිටර් ජනරාල්වරයා දැනුම් දුන්නේය. මෙම ප්‍රතිපාදන සම්බන්ධයෙන් පෙත්සම්කරුවන් විසින් මීට පෙර අධිකරණයේදී විරෝධතා ඉදිරිපත් කර තිබිණි. ඒ අනුව පනත් කෙටුම්පතේ සංවිධානාත්මක අපරාධ කල්ලි සාමාජිකත්වය හඳුනාගැනීමට අදාළ නිර්ණායක පිළිබඳව ද සංශෝධන සිදු කිරීමට රජය එකඟ වී තිබේ.
වරෙන්තුවක් නොමැතිව ගොඩනැගිලි පරීක්ෂා කිරීමේ බලතල සංශෝධනයට
පනත් කෙටුම්පතේ 17(1) වගන්තිය සම්බන්ධයෙන් ද සංශෝධනයක් ඉදිරිපත් කරන බව සොලිසිටර් ජනරාල්වරයා ශ්‍රේෂ්ඨාධිකරණයට දැනුම් දුන්නේය. එම වගන්තිය යටතේ කිසියම් භූමියක් හෝ ගොඩනැගිල්ලක් සෝදිසි වරෙන්තුවක් නොමැතිව පරීක්ෂා කිරීමට අවසර ලබාදී තිබූ බව ඔහු පැහැදිලි කළේය. එහෙත් එම ප්‍රතිපාදනය සෝදිසි වරෙන්තුවක් සහිතව පරීක්ෂා කළ යුතු බවට සංශෝධනය කිරීමට තීරණය කර ඇති බව ඔහු පැවසීය.
සැකකරුවන් රඳවා තබාගැනීමේ කාලය පැය 48 දක්වා අඩු කරයි
පනත් කෙටුම්පතේ 20 වැනි වගන්තිය යටතේ අත්අඩංගුවට ගනු ලබන පුද්ගලයකු පැය 72ක් රඳවා තබාගැනීමට ඉඩ ලබාදී තිබූ බව සොලිසිටර් ජනරාල්වරයා සඳහන් කළේය. එම කාලය පැය 48ක් දක්වා අඩු කිරීමට යෝජනා වී ඇති අතර, එම කාලය තුළ අත්අඩංගුවට ගත් පුද්ගලයා මහේස්ත්‍රාත්වරයකු වෙත ඉදිරිපත් කළ යුතු බව ද ඔහු අධිකරණයට දැනුම් දුන්නේය.
එමෙන්ම, පනත් කෙටුම්පත යටතේ අත්අඩංගුවට ගනු ලබන පුද්ගලයකු අදාළ පොලිස් ස්ථානයේ ස්ථානාධිපතිවරයා වෙත ඉදිරිපත් කළ යුතු අතර, අත්අඩංගුවට ගැනීම පිළිබඳව පැය 24ක් ඇතුළත සැකකරුගේ ළඟම ඥාතීන්ට දැනුම් දිය යුතු බව ද ඔහු පැහැදිලි කළේය.
ආරක්ෂක අමාත්‍යංශයට රැඳවුම් නියෝග බලතල
පනත් කෙටුම්පතේ 21 වැනි වගන්තිය යටතේ සැකකරුවකු රඳවා තබාගැනීම සඳහා රැඳවුම් නියෝග ලබාගැනීමේ ක්‍රියාවලිය පිළිබඳව ද සොලිසිටර් ජනරාල්වරයා කරුණු පැහැදිලි කළේය.
ඔහු සඳහන් කළ ආකාරයට, එවැනි රැඳවුම් නියෝගයක් ඉල්ලා සිටීම පොලිස්පතිවරයා හෝ නියෝජ්‍ය පොලිස්පති ධුරයට නොඅඩු තනතුරක් දරන නිලධාරියකු විසින් සිදු කළ යුතුය. එම ඉල්ලීමට අදාළව සෑහීමකට පත්විය හැකි කරුණු ඉදිරිපත් වුවහොත් ආරක්ෂක ලේකම්වරයාට රැඳවුම් නියෝග නිකුත් කිරීමේ බලය හිමිවන බව ඔහු පැවසීය.
එම රැඳවුම් නියෝගවල පිටපත් මහේස්ත්‍රාත්වරයා වෙත ඉදිරිපත් කළ යුතු බව ද සඳහන් කෙරිණි.
සොලිසිටර් ජනරාල්වරයාගේ කරුණු දැක්වීමට අනුව, මාස දෙකක සිට වසරක කාලයක් දක්වා රැඳවුම් නියෝග නිකුත් කිරීමේ ප්‍රතිපාදන පනත් කෙටුම්පතට ඇතුළත් වේ. කෙසේ වෙතත්, මාස දෙකකට වැඩි කාලයක් රැඳවුම් නියෝගයක් දීර්ඝ කිරීමට අවශ්‍ය නම් නීතිපතිවරයා මාර්ගයෙන් මහාධිකරණයට ඉල්ලීමක් ඉදිරිපත් කර අනුමැතිය ලබාගත යුතු බව ඔහු පැහැදිලි කළේය. එම ඉල්ලීම සඳහා ආරක්ෂක අමාත්‍යංශයේ ලේකම්වරයා හේතු ඉදිරිපත් කළ යුතු බව ද අධිකරණයට දැනුම් දෙන ලදී.
තවද රැඳවුම් නියෝගවල පිටපත් අත්අඩංගුවේ පසුවන පුද්ගලයාට දින හතක් ඇතුළත ලබාදිය යුතු බවත්, වසරක රැඳවුම් කාලයෙන් පසුව මහාධිකරණයෙන් ඇප ඉල්ලා සිටීමට අවස්ථාව පවතින බවත් සොලිසිටර් ජනරාල්වරයා සඳහන් කළේය. මෙම ප්‍රතිපාදන මගින් අත්අඩංගුවට ගැනීම, රඳවා තබාගැනීම, රැඳවුම් නියෝග නිකුත් කිරීම සහ ඇප ඉල්ලීම් අධිකරණ අධීක්ෂණයට යටත් කර ඇති බව ඔහුගේ ස්ථාවරය විය.
අත්අඩංගුවට ගැනීමේ බලතල ගැන විනිසුරුවරුන්ගේ අවධානය
මෙම අවස්ථාවේදී ත්‍රිපුද්ගල විනිසුරු මඬුල්ලේ සාමාජික විනිසුරු අචල වෙංගප්පුලි මහතා පෙන්වා දුන්නේ පෙත්සම්කරුවන්ගෙන් බහුතරයකගේ අවධානය යොමු වී ඇත්තේ පනත් කෙටුම්පතේ අත්අඩංගුවට ගැනීම සම්බන්ධ ප්‍රතිපාදන කෙරෙහි බවයි. ඊට ප්‍රතිචාර දක්වමින් සොලිසිටර් ජනරාල්වරයා සඳහන් කළේ එම බලතල අනිසි ලෙස භාවිත කිරීමට ඇති අවස්ථා අවම කිරීම සඳහා පනත් කෙටුම්පතේ ප්‍රතිපාදන සකස් කර ඇති බවයි.
යෝජිත සංශෝධන ද සැලකිල්ලට ගත් විට පනත් කෙටුම්පත සම්බන්ධයෙන් ඉදිරිපත් කර ඇති විවේචනවලින් පෙන්වා දෙන තරම් බරපතළ තත්ත්වයක් එහි නොමැති බව ඔහු අධිකරණය හමුවේ ප්‍රකාශ කළේය.
සංවිධානාත්මක අපරාධ මැඩලීමට නව නීති අවශ්‍ය බව නීතිපතිවරයා කියයි
පනත් කෙටුම්පතේ අරමුණු පිළිබඳව කරුණු දක්වමින් සොලිසිටර් ජනරාල් විරාජ් දයාරත්න මහතා සඳහන් කළේ අන්තර්ජාතික වශයෙන් ක්‍රියාත්මක වන සංවිධානාත්මක අපරාධ මැඩලීම සඳහා එක්සත් ජාතීන්ගේ සංවිධානය සකස් කර ඇති සම්මුතිය පදනම් කරගෙන මෙම පනත් කෙටුම්පත සකස් කර ඇති බවයි.
ශ්‍රී ලංකාව ද එම සම්මුතියට පාර්ශ්වකරුවකු වන බව සඳහන් කළ ඔහු, සංවිධානාත්මක අපරාධ කල්ලිවලින් සමාජය ආරක්ෂා කිරීම පනත් කෙටුම්පතේ ප්‍රධාන අරමුණ බව පැවසීය. සංවිධානාත්මක අපරාධ කල්ලි මගින් ජාතික ආරක්ෂාවට, ආර්ථිකයට සහ නීතියේ ආධිපත්‍යයට බරපතළ තර්ජන එල්ල වී ඇති බව ද ඔහු අධිකරණය හමුවේ ප්‍රකාශ කළේය.
එවැනි කල්ලි විසින් සිදුකරන අපරාධ සාමාන්‍ය අපරාධවලට වඩා සංකීර්ණ බව පැහැදිලි කළ ඔහු, සංවිධානාත්මක මිනීමැරුමක් සැලසුම් කරන පුද්ගලයා, එය සිදුකරන වෙඩික්කරු සහ ආයුධ සපයන පුද්ගලයා එකිනෙකා නොහඳුනන අවස්ථා පවා පවතින බව උදාහරණයක් ලෙස පෙන්වා දුන්නේය. එවැනි අපරාධ විමර්ශනය කිරීම සඳහා කාර්යක්ෂම නීතිමය ප්‍රතිපාදන, නවීන විමර්ශන ක්‍රමවේද සහ දියුණු තාක්ෂණික පහසුකම් අවශ්‍ය බව ඔහුගේ අදහස විය.
නීතිඥ සංගමයෙන් සහ පෙත්සම්කරුවන්ගෙන් කරුණු දැක්වීම්
මේ අතර, ශ්‍රී ලංකා නීතිඥ සංගමය වෙනුවෙන් පෙනී සිටි ජනාධිපති නීතිඥ සාලිය පීරිස් මහතා අධිකරණයට පෙන්වා දුන්නේ ජනාධිපතිවරයා පවා මීට පෙර මෙම පනත් කෙටුම්පත සංශෝධනය කළ යුතු බව ප්‍රසිද්ධියේ ප්‍රකාශ කර තිබූ බවයි. තවත් පෙත්සම්කාර පාර්ශ්ව කිහිපයක් වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා සහ එම්.ඒ. සුමන්තිරන් ඇතුළු නීතිඥවරුන් අධිකරණයෙන් ඉල්ලා සිටියේ යෝජිත සංශෝධන පිළිබඳ පෙත්සම්කරුවන් දැනුවත් කිරීමෙන් අනතුරුව වැඩිදුර කරුණු සලකා බැලීම සුදුසු බවයි.
සංශෝධන සම්බන්ධයෙන් තමන්ගේ අවධානය යොමු වී ඇති බවත් ඒ පිළිබඳව අධිකරණයට ප්‍රතිඥාවක් ලබාදෙන බවත් සොලිසිටර් ජනරාල්වරයා එහිදී සඳහන් කළේය.
විශේෂ බහුතරයක් හෝ ජනමත විචාරණයක් අවශ්‍ය නොවන බවට නීතිපතිවරයාගේ ස්ථාවරය
යෝජිත සංශෝධන සහ පනත් කෙටුම්පතේ අරමුණු පිළිබඳව කරුණු ඉදිරිපත් කළ සොලිසිටර් ජනරාල් විරාජ් දයාරත්න මහතා අවසානයේ සඳහන් කළේ අදාළ පනත් කෙටුම්පත පාර්ලිමේන්තුවේ විශේෂ බහුතරයකින් හෝ ජනමත විචාරණයකින් තොරව සම්මත කළ හැකි බවයි. එය නීතිපතිවරයා වෙනුවෙන් ඉදිරිපත් කළ නීතිමය ස්ථාවරය වන අතර, පනත් කෙටුම්පතේ ව්‍යවස්ථානුකූලභාවය පිළිබඳ අවසන් නිගමනය ශ්‍රේෂ්ඨාධිකරණය විසින් ලබාදීමට නියමිතය.
ලිඛිත දේශන ඉදිරිපත් කිරීමට නියෝග
දෙපාර්ශ්වයේ කරුණු දැක්වීම් අවසන් වීමෙන් අනතුරුව පනත් කෙටුම්පතට අදාළ සංශෝධන පිළිබඳ ලිඛිත දේශන නොවැම්බර් 11 වැනිදා පස්වරු 4.00ට පෙර ඉදිරිපත් කරන ලෙස ශ්‍රේෂ්ඨාධිකරණය නියෝග කළේය. ඉන් අනතුරුව පනත් කෙටුම්පතේ ව්‍යවස්ථානුකූලභාවය සම්බන්ධයෙන් ශ්‍රේෂ්ඨාධිකරණයේ රහසිගත නිගමනය පාර්ලිමේන්තුවේ කථානායකවරයා සහ ජනාධිපතිවරයා වෙත යොමු කරන බව ද අධිකරණය දැනුම් දුන්නේය.
ඒ අනුව පච්ච සහ ශරීර සලකුණු පිළිබඳ ප්‍රතිපාදන, මාධ්‍ය වාර්තාකරණයට පූර්ව අධිකරණ අවසරය ලබාගැනීමේ අවශ්‍යතාව, සෝදිසි කිරීම්, අත්අඩංගුවට ගැනීම් සහ රඳවා තබාගැනීමේ කාලසීමා ඇතුළු කරුණු රැසක් සම්බන්ධයෙන් සංශෝධන ඉදිරිපත් කිරීමට රජය එකඟ වී ඇති අතර, එම සංශෝධන පාර්ලිමේන්තුවේ කාරක සභා අවස්ථාවේදී සිදු කිරීමට නියමිතය.
