මත්ද්‍රව්‍ය ජාවාරම්කරුවකු බව පැවසෙන නඳුන් චින්තක වික්‍රමරත්න හෙවත් ‘හරක් කටා’ නමැත්තාගේ බිරිඳගෙන් රුපියල් කෝටි 12ක අල්ලසක් ලබාගත් බවට එල්ල වූ චෝදනාවක් සම්බන්ධයෙන් රක්ෂිත බන්ධනාගාරගත කර සිටි රඛිත රාජපක්ෂ සහ චරිත් අබේසිංහ ඇතුළු සැකකරුවන් තිදෙනකුට ඇප ලබාදීමට කොළඹ මහේස්ත්‍රාත් අධිකරණය දුන් නියෝගය අවලංගු කරන ලෙස ඉල්ලා අල්ලස් හෝ දූෂණ චෝදනා විමර්ශන කොමිෂන් සභාව ගොනු කළ ප්‍රතිශෝධන පෙත්සම් 2027 පෙබරවාරි 9 වැනිදා විභාගයට ගැනීමට කොළඹ මහාධිකරණය නියම කළේය.
අල්ලස් කොමිසම ගොනු කළ මෙම ප්‍රතිශෝධන පෙත්සම් කොළඹ මහාධිකරණ විනිසුරු ලාල් බණ්ඩාර මහතා හමුවේ අද කැඳවනු ලැබීය.
එහිදී ඉදිරිපත් වූ කරුණු සලකා බැලූ විනිසුරුවරයා, අදාළ පෙත්සම් සම්බන්ධයෙන් විරෝධතා තිබේ නම් ඒවා නොවැම්බර් 14 වැනිදාට පෙර ගොනු කරන ලෙස වගඋත්තරකරුවන්ට නියෝග කළේය. එම විරෝධතාවලට අදාළ ප්‍රතිවිරෝධතා තිබේ නම් ඒවා 2027 ජනවාරි 28 වැනිදාට පෙර ගොනු කරන ලෙස අල්ලස් කොමිසමට ද නියම කෙරිණි.
මෙම පෙත්සම් කැඳවූ අවස්ථාවේදී අල්ලස් කොමිසම වෙනුවෙන් පෙනී සිටි එහි සහකාර අධ්‍යක්ෂ ජනරාල් අනුෂා සම්බන්ධප්පෙරුම මහත්මිය අධිකරණයට කරුණු දක්වමින්, ප්‍රතිශෝධන පෙත්සම් මඟින් අතුරු නියෝගයක් අපේක්ෂා කරන බව සඳහන් කළාය. එහිදී විනිසුරුවරයා ඇයගෙන් විමසා සිටියේ එම අතුරු නියෝගය මඟින් අපේක්ෂා කරන්නේ කුමක්ද යන්නයි.
ඊට පිළිතුරු දෙමින් සහකාර අධ්‍යක්ෂ ජනරාල්වරිය සඳහන් කළේ, සැකකරුවන් ඇප මත මුදාහරිමින් මහේස්ත්‍රාත්වරයා නිකුත් කළ ඇප නියෝගය අත්හිටුවන ලෙස අතුරු සහනයක් ඉල්ලා සිටින බවයි. එහිදී විනිසුරුවරයා යළිත් විමසා සිටියේ පෙත්සම් මඟින් ඉල්ලා සිටින අවසන් සහනය කුමක්ද යන්නයි. ඊට පිළිතුරු දෙමින් සහකාර අධ්‍යක්ෂ ජනරාල්වරිය පැවසුවේ මහේස්ත්‍රාත්වරයා විසින් ප්‍රදානය කරන ලද ඇපය අවලංගු කරන ලෙස ඉල්ලා සිටින බවයි.
ඒ අවස්ථාවේදී විවෘත අධිකරණයේ අදහස් දැක්වූ විනිසුරුවරයා, පෙත්සම්වලින් ඉල්ලා ඇති අතුරු සහනය සහ අවසන් සහනය එක සමාන බව පෙනී යන බව සඳහන් කළේය. එවැනි අවස්ථාවක අතුරු සහනයක් ඉල්ලා සිටීම සම්බන්ධයෙන් නීතිමය ගැටලුවක් පවතින බව ද පෙන්වා දුන් විනිසුරුවරයා, එවැනි තත්ත්වයක් යටතේ අතුරු සහනයක් ඉල්ලා සිටින්නේ කෙසේදැයි ප්‍රශ්න කළේය.
ඊට පිළිතුරු දෙමින් සහකාර අධ්‍යක්ෂ ජනරාල්වරිය සඳහන් කළේ, මෙම අවස්ථාවේදී පෙත්සම්වලින් ඉල්ලා ඇති අතුරු සහන සම්බන්ධයෙන් තවදුරටත් කරුණු දැක්වීමක් සිදු නොකරන බවයි. අනතුරුව ප්‍රතිශෝධන පෙත්සම් විභාගයට ගැනීමට මහාධිකරණය නියම කළේය.
අල්ලස් කොමිසම සිය ප්‍රතිශෝධන පෙත්සම් මඟින් පෙන්වා දෙන්නේ, ‘හරක් කටා’ නමැත්තාගේ බිරිඳගෙන් රුපියල් කෝටි 12ක අල්ලසක් ලබාගැනීමේ සිද්ධිය සම්බන්ධයෙන් රක්ෂිත බන්ධනාගාරගත කර සිටි රඛිත රාජපක්ෂ සහ චරිත් අබේසිංහ ඇතුළු සැකකරුවන් තිදෙනා ඇප මත මුදාහැරීමට කොළඹ මහේස්ත්‍රාත් අධිකරණය දුන් නියෝගය නීතියට පටහැනි බවයි. ඒ අනුව අදාළ ඇප නියෝගය ප්‍රතිශෝධනය කර එය බල රහිත කරන ලෙස අල්ලස් කොමිසම අධිකරණයෙන් ඉල්ලා තිබේ.
සැකකරුවන් තිදෙනා 2026 ජූලි 28 වැනිදා කොළඹ ප්‍රධාන මහේස්ත්‍රාත් අධිකරණය විසින් ඇප මත මුදාහැරීමට නියෝග කර තිබිණි. එම තීරණයට එරෙහිව අල්ලස් කොමිසම ගොනු කළ ප්‍රතිශෝධන පෙත්සම් සම්බන්ධයෙන් ඉදිරි විරෝධතා සහ ප්‍රතිවිරෝධතා ගොනු කිරීමෙන් පසු 2027 පෙබරවාරි 9 වැනිදා විභාගය පැවැත්වීමට නියමිතය.
