යෝජිත රාජ්‍යය ත්‍රස්තවාදයෙන් ආරක්ෂා කිරීමේ පනත් කෙටුම්පත සහ සංවිධානාත්මක අපරාධ වැළැක්වීමේ පනත් කෙටුම්පත නැවත සමාලෝචනය කරන ලෙස ඉල්ලමින් පැෆ්රල් සංවිධානය ජනාධිපති අනුර කුමාර දිසානායක මහතාගෙන් ඉල්ලීමක් කර තිබේ.
නව නීති සම්පාදනයේදී පුරවැසියන්ගේ මූලික අයිතිවාසිකම් සහ නිදහස පිළිබඳව වැඩි අවධානයක් යොමු කළ යුතු බව පෙන්වා දෙමින් පැෆ්රල් සංවිධානයේ විධායක අධ්‍යක්ෂ රෝහණ හෙට්ටිආරච්චි අදාල ලිපිය ඔක්තෝබර් 30 වැනිදා ජනාධිපතිවරයාට යොමු කර ඇත.
ත්‍රස්තවාදය වැළැක්වීමේ පනත අහෝසි කිරීමට වත්මන් රජය ගන්නා උත්සාහය පිළිබඳව කෘතඥතාව පළ කරන බවත් ජාතික ආරක්ෂාව තහවුරු කිරීම රජයේ මූලික වගකීමක් බව ද ලිපියේ සඳහන් කර ඇති අතර ත්‍රස්තවාදී ක්‍රියා හේතුවෙන් ජන ජීවිත හා රාජ්‍ය සහ පෞද්ගලික දේපළ විනාශ වීම වැළැක්වීම, මත්ද්‍රව්‍යවලින් සමාජය සහ තරුණ පරපුර ආරක්ෂා කිරීම, රටේ ආර්ථිකයට සිදුවන හානි වැළැක්වීම සහ ජනතාව තුළ බිය ඇතිවීම වැළැක්වීම සඳහා ශක්තිමත් නීති පද්ධතියක් අවශ්‍ය බව ද එහි සඳහන් වේ.
කෙසේ වෙතත්, ජාතික ආරක්ෂාව තහවුරු කිරීමේ නාමයෙන් පුරවැසියන්ගේ මූලික අයිතිවාසිකම්, අදහස් ප්‍රකාශ කිරීමේ නිදහස, සාමකාමී විරෝධතාවල නිරත වීමේ අයිතිය සහ අධිකරණයේ ස්වාධීනත්වය අනවශ්‍ය ලෙස සීමා නොකළ යුතු බව එම ලිපියෙන් අවධාරණය කර ඇත.
ත්‍රස්තවාදය පිළිබඳ පුළුල් අර්ථ දැක්වීමක්
ජාතික ජන බලවේගය ජනාධිපතිවරණයේදී සහ පාර්ලිමේන්තු මැතිවරණයේදී ත්‍රස්තවාදය වැළැක්වීමේ පනත ඇතුළු සියලු පීඩාකාරී නීති අහෝසි කර රටේ සියලු ප්‍රදේශවල ජනතාවගේ සිවිල් අයිතිවාසිකම් සහතික කරන බවට ප්‍රතිඥා දී තිබූ බව ද එම ලිපියෙන් සිහිපත් කර තිබේ. එමෙන්ම යුරෝපා සංගමය විසින් GSP+ වෙළෙඳ සහනය යළි ලබාදීමේ කොන්දේසියක් ලෙස ත්‍රස්තවාදය වැළැක්වීමේ පනත අහෝසි කිරීමට ශ්‍රී ලංකාව එකඟ වී ඇති බව ද පෙන්වා දී ඇත.
යෝජිත නව ත්‍රස්ත විරෝධී පනත් කෙටුම්පත මගින් ත්‍රස්තවාදය අතිශය පුළුල් ලෙස අර්ථ දක්වා ඇති බවත්, සාමකාමී විරෝධතා, වෘත්තීය සමිති ක්‍රියාමාර්ග, මතවාදී ප්‍රකාශන සහ මානුෂීය හෝ වෛද්‍ය ආධාර සැපයීම් ත්‍රස්තවාදී වැරදිවලින් පැහැදිලිව වෙන් කිරීමට එය අපොහොසත් වී ඇති බවත් ලිපියෙන් පෙන්වා දෙයි.
විශේෂයෙන්ම පනත් කෙටුම්පතේ තුන්වැනි වගන්තිය මගින් ත්‍රස්තවාදය අර්ථ දැක්වීමේදී සඳහන් වන ‘සැලකිය යුතු ආර්ථික හානියක්’ ඇති කිරීමේ හැකියාව පිළිබඳ ප්‍රතිපාදනය ගැටලුකාරී බව එහි සඳහන් වේ.
සාමකාමී අරගලයක්, රජයේ තීරණයකට එරෙහි විරෝධතාවක් හෝ ආර්ථික ප්‍රතිපත්තියක් වෙනස් කරන ලෙස ඉල්ලා සිටින මහජන ව්‍යාපාරයක් හේතුවෙන් ආර්ථික බලපෑමක් ඇතිවිය හැකි නමුත් එවැනි බලපෑමක් ඇතිවූ පමණින් එය ත්‍රස්තවාදී ක්‍රියාවක් ලෙස අර්ථ දැක්වීම සාධාරණ නොවන බව ලිපියෙන් පෙන්වා දී තිබේ.
එමෙන්ම පනත් කෙටුම්පතේ අටවැනි වගන්තියේ ‘බාධා කිරීම හෝ මැදිහත්වීම’ සහ ‘විශ්වාස කිරීමට සාධාරණ හේතු තිබීම’ වැනි යෙදුම් පුළුල් ලෙස අර්ථකථනය කළ හැකි බැවින් ත්‍රස්තවාදී නොවන ක්‍රියා ද ත්‍රස්තවාදී ක්‍රියා ලෙස අර්ථ දැක්වීමේ අවදානමක් පවතින බව සඳහන් කර ඇත.
දහවැනි වගන්තියේ ත්‍රස්තවාදී ප්‍රකාශන පිළිබඳ අර්ථ දැක්වීම ද පුළුල් බැවින් සාමකාමී විරෝධතාවකට ජනතාව කැඳවන ප්‍රකාශයක් පවා ත්‍රස්තවාදී ප්‍රකාශනයක් ලෙස අර්ථකථනය විය හැකි බව එම ලිපියේ දැක්වේ.
අත්අඩංගුවට ගැනීමේ සහ රඳවා තැබීමේ බලතල පිළිබඳ විවේචන
පනත් කෙටුම්පතේ 19 වැනි වගන්තිය මගින් පොලිසියට පැවරී තිබූ ඇතැම් බලතල සන්නද්ධ හමුදා සහ වෙරළාරක්ෂක නිලධාරීන් වෙත ද පවරා ඇති බව ලිපියෙන් පෙන්වා දී තිබේ.
එමගින් වරෙන්තුවකින් තොරව අත්අඩංගුවට ගැනීමේ බලය එම ආරක්ෂක අංශ වෙත ද හිමිවන බවත්, පැවති පනතේ තිබූ අත්අඩංගුවට ගැනීම් සම්බන්ධ ඇතැම් පාලන විධිවිධාන නව කෙටුම්පතේ නොමැති වීම බරපතළ ගැටලුවක් බවත් එහි සඳහන් වේ.
එමෙන්ම 26 වැනි වගන්තිය මගින් අත්අඩංගුවට ගත් පුද්ගලයෙකු වසරක කාලයක් දක්වා රඳවා තැබීමේ නියෝග නිකුත් කිරීමේ බලය ආරක්ෂක අමාත්‍යාංශයේ ලේකම්වරයාට පැවරීමෙන් අධිකරණයේ බලය පරිපාලන නිලධාරියෙකු වෙත පැවරෙන බව ද පෙන්වා දී තිබේ.
49 වැනි වගන්තිය යටතේ අධිකරණ අධීක්ෂණයකින් තොරව පරීක්ෂණ ද්‍රව්‍ය රජයේ රස පරීක්ෂකවරයා වෙත යොමු කිරීමට පොලිසියට බලය ලබාදීම ද අධිකරණ මැදිහත්වීම සීමා කරන ප්‍රතිපාදනයක් ලෙස ලිපියෙන් විවේචනය කර ඇත.
39 වැනි වගන්තිය යටතේ රඳවා තැබීමේ නියෝග සමාලෝචනය කිරීම සඳහා පත්කරන ස්වාධීන කමිටුව අමාත්‍යවරයා විසින්ම පත්කිරීම හේතුවෙන් එහි ස්වාධීනත්වය පිළිබඳ ගැටලු මතුවන බව ද සඳහන් කර තිබේ.
61 වැනි වගන්තිය මගින් ඕනෑම ස්ථානයක් තහනම් ස්ථානයක් ලෙස නම් කිරීමට ආරක්ෂක අමාත්‍යාංශයේ ලේකම්වරයාට බලය පැවරීම සහ පුද්ගලයෙකුගේ ගමනාගමනය හා සන්නිවේදනය මාස තුනක් දක්වා සීමා කිරීමට නියෝජ්‍ය පොලිස්පතිවරයෙකුට අධිකරණ නියෝගයක් ලබාගත හැකි වීම ද ගැටලුකාරී බව එම ලිපියෙන් පෙන්වා දෙයි.
මෙවැනි බලතල මගින් අදහස් ප්‍රකාශ කිරීමේ, සංවිධානගත වීමේ, රැස්වීමේ සහ ගමනාගමනයේ නිදහසට දැඩි බලපෑම් එල්ල විය හැකි බව ද එහි සඳහන් වේ.
සංවිධානාත්මක අපරාධ පනත් කෙටුම්පතටත් විරෝධතා
සංවිධානාත්මක අපරාධ වැළැක්වීමේ පනත් කෙටුම්පත සම්බන්ධයෙන් ද ගැටලු රැසක් පවතින බව ජනාධිපතිවරයා වෙත යොමු කළ ලිපියෙන් පෙන්වා දී තිබේ.
එම පනත් කෙටුම්පත යටතේ සාමාන්‍ය හා සුළු වැරදි පවා බරපතළ අපරාධ ලෙස වර්ගීකරණය කිරීමේ අවදානමක් පවතින බව එහි සඳහන් වේ.
බුද්ධිමය දේපළ සහ කර්තෘ හිමිකම් උල්ලංඝනය කිරීම්, සුරාබදු සහ වන සංරක්ෂණ නීති උල්ලංඝනය කිරීම් වැනි වැරදි පවා සංවිධානාත්මක අපරාධ ලෙස අර්ථ දැක්වීමේ අවදානමක් පවතින බව ද පෙන්වා දී ඇත.
එමෙන්ම අමාත්‍යාංශ ලේකම්වරයාගේ නියෝග මත වසරක කාලයක් දක්වා පුද්ගලයන් රඳවා තැබීමට ඉඩ සැලසීම, වෘත්තීය සමිති ක්‍රියාකාරකම් සහ සාමකාමී විරෝධතා පනතේ බලපෑමට ලක්වීමේ අවදානම මෙන්ම පොලිස් අත්අඩංගුවේදී ලබාගන්නා ප්‍රකාශ සාක්ෂි ලෙස පිළිගැනීමට ඉඩ සැලසීම ද ගැටලුකාරී කරුණු ලෙස එම ලිපියෙන් දක්වා තිබේ.
පනත් කෙටුම්පත් යළි සමාලෝචනය කරන්නැයි ඉල්ලීමක්
යෝජිත පනත් කෙටුම්පත් ගෙන ඒමේ රජයේ මූලික අරමුණ සම්බන්ධයෙන් තමන්ට විරෝධයක් නොමැති නමුත්, ඒවා දැනට කෙටුම්පත් කර ඇති ආකාරයෙන් සම්මත වුවහොත් සාමාන්‍ය ජනතාවගේ නිදහස බරපතළ අවදානමකට ලක්විය හැකි බව ලිපියෙන් අවධාරණය කර තිබේ.
රාජ්‍ය පාලනයේදී ජනතාව කෙරෙහි මිත්‍රශීලී ප්‍රවේශයක් පවත්වාගෙන යනු ඇතැයි අපේක්ෂා කරන බව ද සඳහන් කරමින්, අදාළ පනත් කෙටුම්පත් නැවත සමාලෝචනය කිරීමට පියවර ගන්නා ලෙසත් රෝහණ හෙට්ටිආරච්චි මහතා ජනාධිපතිවරයාගෙන් ඉල්ලා ඇත.
