දූෂණ චෝදනා සම්බන්ධයෙන් අල්ලස් හෝ දූෂණ විමර්ශන කොමිෂන් සභාව විසින් අත්අඩංගුවට ගත් ජාතික ගමනාගමන කොමිෂන් සභාවේ හිටපු සභාපති රේණුක පෙරේරා මහතාව ලබන සැප්තැම්බර් 29 වැනිදා දක්වා රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් අධිකරණය අද (17) නියෝග කර ඇත.
අල්ලස් කොමිසමේ නිලධාරීන් සහ විත්තිකරු වෙනුවෙන් පෙනී සිටි නීතිඥවරුන් ඉදිරිපත් කළ කරුණු සලකා බැලීමෙන් අනතුරුව කොළඹ ප්රධාන මහේස්ත්රාත් අසංග එස්. බෝදරගම මහතා මෙම නියෝගය නිකුත් කර ඇත.
රේණුක පෙරේරා මහතා ජාතික ගමනාගමන කොමිෂන් සභාවේ සභාපතිවරයා ලෙස කටයුතු කළ සමයේ නීත්යනුකූල ක්රමවේදයෙන් බැහැරව බස් රථ සඳහා මාර්ග බලපත්ර 56ක් නිකුත් කිරීමෙන් රජයට පාඩුවක් සිදු කිරීම සහ බාහිර පාර්ශ්වයකට අයුතු වාසියක් ලබාදීම සම්බන්ධයෙන් ඔහුට එරෙහිව විමර්ශනය සිදුකරන බව අල්ලස් කොමිසම අධිකරණයට දැනුම් දී තිබේ.
දක්ෂිණ අධිවේගී මාර්ගයේ බස් රථ ධාවනය සඳහා මගී ප්රවාහන සේවා බලපත්ර 56ක් නීත්යනුකූල ක්රමවේදයෙන් බැහැරව නිකුත් කිරීම සහ වාර්ෂික ගාස්තු එකවර අයකර නොගැනීම සම්බන්ධයෙන් රේණුක පෙරේරා මහතා අද පෙරවරු 9.55ට පමණ අත්අඩංගුවට ගෙන තිබුණි.
අදාළ ක්රියාව ජාතික ගමනාගමන කොමිෂන් සභා පනතේ 1991 අංක 37 දරන විධිවිධාන සහ 2014 සැප්තැම්බර් 19 වැනිදා නිකුත් කළ අමාත්ය මණ්ඩල තීරණයේ නිර්දේශවලට පටහැනිව සිදුකර ඇති බවට අල්ලස් කොමිසම චෝදනා කරයි.
ශ්රී ලංකා පොදුජන පෙරමුණේ ජ්යෙෂ්ඨ සාමාජිකයකු වන රේණුක පෙරේරා මහතා එම පක්ෂයේ පරිපාලන ලේකම්වරයා ලෙසද කටයුතු කරන අතර ඔහු මීට පෙර පැවැති රජය සමයේ රජයට අයත් කිරි නිෂ්පාදන හා අලෙවි ආයතනයක් වන මිල්කෝ ආයතනයේ සභාපතිවරයා ලෙසද කටයුතු කර තිබේ.
