ශ්රීලංකන් ගුවන් සේවය සඳහා එයාර්බස් ගුවන් යානා මිලදී ගැනීමේදී ඇමෙරිකානු ඩොලර් මිලියන 2කට ආසන්න මුදලක් අයථා ලෙස පරිහරණය කළ බවට එල්ල වී ඇති චෝදනා සම්බන්ධයෙන් සිදුකෙරෙන විමර්ශනයකට අදාළව 3වන සැකකරු ලෙස ඉදිරිපත් කළ පාර්ලිමේන්තු මන්ත්රී නාමල් රාජපක්ෂ මහතා ලබන සැප්තැම්බර් 23 වැනිදා දක්වා රක්ෂිත බන්ධනාගාරගත කිරීමට කොළඹ කොටුව මහේස්ත්රාත් අධිකරණය අද (16) නියෝග කර ඇත.
නාමල් රාජපක්ෂ මහතා අද කොළඹ කොටුව මහේස්ත්රාත් පසන් අමරසේන මහතා හමුවට ඉදිරිපත් කිරීමෙන් අනතුරුව මෙම නියෝගය නිකුත් කර තිබේ. අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි නියෝජ්ය සොලිසිටර් ජනරාල් ජනක බණ්ඩාර මහතා අධිකරණය හමුවේ කරුණු ඉදිරිපත් කර ඇත.
නාමල් රාජපක්ෂ මහතා වෙනුවෙන් ජනාධිපති නීතිඥ අනිල් සිල්වා මහතා ඇතුළු නීතිඥ මණ්ඩලයක්ද අධිකරණය හමුවේ කරුණු දක්වා තිබුණු අතර නාමල් රාජපක්ෂ මහතා ඉදිරිපත් කර ඇති ඇප ඉල්ලීම සම්බන්ධයෙන් තීන්දුව සැප්තැම්බර් 23 වැනිදා ප්රකාශයට පත් කරන බවද මහේස්ත්රාත්වරයා දැනුම් දී තිබේ.
