යෝජිත 22 වැනි ආණ්ඩුක්රම ව්යවස්ථා සංශෝධන පනත් කෙටුම්පත සම්බන්ධයෙන් පක්ෂව හෝ විපක්ෂව ශ්රේෂ්ඨාධිකරණය හමුවේ පෙත්සම් ගොනු කිරීම සඳහා ලබාදී ඇති කාලය අද (31) අවසන් වේ.
මේ වනවිට යෝජිත 22 වැනි ආණ්ඩුක්රම ව්යවස්ථා සංශෝධන පනත් කෙටුම්පතට පක්ෂව සහ විපක්ෂව පෙත්සම් 30කට ආසන්න සංඛ්යාවක් ගොනු කර ඇති බව වාර්තා වේ.
පසුගිය අගෝස්තු 7 වැනිදා 22 වැනි ආණ්ඩුක්රම ව්යවස්ථා සංශෝධන පනත් කෙටුම්පත ගැසට් පත්රයේ පළ කළ අතර එහි ව්යවස්ථානුකූලභාවය අභියෝගයට ලක් කරමින් මෙන්ම එයට සහය පළ කරමින්ද ශ්රේෂ්ඨාධිකරණය හමුවේ පෙත්සම් ඉදිරිපත් කර තිබේ.
විනිසුරුවරුන්ගේ විශ්රාම වයස දීර්ඝ කිරීම ඇතුළු කරුණු කිහිපයක් යෝජිත 22 වැනි සංශෝධනයට ඇතුළත් වන අතර ඒ අනුව ශ්රේෂ්ඨාධිකරණ විනිසුරුවරුන්ගේ විශ්රාම වයස අවුරුදු 65 සිට 67 දක්වාත්, අභියාචනාධිකරණ විනිසුරුවරුන්ගේ විශ්රාම වයස අවුරුදු 63 සිට 65 දක්වාත් දීර්ඝ කිරීමට යෝජනා කර ඇත.
මෙම සංශෝධනය සම්බන්ධයෙන් ශ්රී ලංකා නීතිඥ සංගමය ඇතුළු පාර්ශ්ව කිහිපයක් විරෝධය පළ කර ඇති අතර එය අධිකරණයේ ස්වාධීනත්වයට බලපෑම් ඇති කළ හැකි බවටද කරුණු ඉදිරිපත් කර තිබේ.
පෙත්සම් ගොනු කිරීමේ කාලය අදින් අවසන් වීමෙන් අනතුරුව ශ්රේෂ්ඨාධිකරණය විසින් ඉදිරිපත් වී ඇති පෙත්සම් සලකා බලා යෝජිත පනත් කෙටුම්පතේ ව්යවස්ථානුකූලභාවය සම්බන්ධයෙන් සිය තීරණය කථානායකවරයා වෙත දැනුම් දීමට නියමිතය.
