හිටපු අමාත්ය පාර්ලිමේන්තු මන්ත්රී රවී කරුණානායක මහතා අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අගෝස්තු 31 දින (අද) අත්අඩංගුවට ගෙන තිබේ.
ඒ ජාතික ලොතරැයි මණ්ඩලයට පුද්ගලයන් පස්දෙනෙකු අනුමත බඳවා ගැනීමේ ක්රමවේදයෙන් බැහැරව කොන්ත්රාත් පදනම මත බඳවාගෙන, පසුව ඔවුන් හිටපු අමාත්යවරයාගේ පෞද්ගලික කාර්ය මණ්ඩලයට අනුයුක්ත කළ බවට එල්ල වී ඇති චෝදනා සම්බන්ධයෙන් සිදුකරන විමර්ශනයකට අදාළවය.
විමර්ශන නිලධාරීන් විසින් නිකුත් කළ කැඳවීමකට අනුව රවී කරුණානායක මහතා අද පෙරවරු 8.15ට පමණ අල්ලස් කොමිසම වෙත පැමිණ ඇති අතර එහිදී පැය කිහිපයක් පුරා ඔහුගෙන් ප්රශ්න කර ප්රකාශයක් සටහන් කරගැනීමෙන් අනතුරුව අදාළ විමර්ශනයේ දිගුවක් ලෙස ඔහු අත්අඩංගුවට ගෙන ඇත.
විමර්ශනය සඳහා මීට පෙර අවස්ථා හතරකදී අල්ලස් කොමිසම හමුවේ පෙනී සිටින ලෙස රවී කරුණානායක මහතාට දැනුම් දී තිබුණද එම අවස්ථාවලදී ඔහු කොමිසම හමුවේ පෙනී සිට නොතිබූ බව විමර්ශන නිලධාරීන් සඳහන් කර තිබේ. තවද විමර්ශනයට අදාළව දින දෙකකට පෙර අල්ලස් කොමිසමේ නිලධාරීන් පිරිසක් බත්තරමුල්ල, රාජමල්වත්ත පාරේ පිහිටි රවී කරුණානායක මහතාගේ නිවස වෙතද ගොස් තිබේ. එම අවස්ථාවේදී ඔහු නිවසේ නොසිටි බව නිලධාරීන් සඳහන් කර ඇත.
ජාතික ලොතරැයි මණ්ඩලයට සිදුකළ බව කියන අදාළ බඳවා ගැනීම් සම්බන්ධ විමර්ශනයේදී මීට පෙරද පුද්ගලයන්ට එරෙහිව නීතිමය ක්රියාමාර්ග ගෙන තිබේ.එම විමර්ශනයට අදාළව ජාතික ලොතරැයි මණ්ඩලයේ හිටපු සභාපතිනී ශ්යාමිලා පෙරේරා මහත්මියද අත්අඩංගුවට ගනු ලැබූ අතර පසුව 2026 ජුනි 30 වැනිදා ඇය ඇප මත මුදාහැර තිබිණි.
