‘සිරිලිය සවිය’ ගිණුමේ මුදල් අවභාවිත කළ බවට එල්ල වූ චෝදනා සම්බන්ධයෙන් රක්ෂිත බන්ධනාගාරගත කර සිටි හිටපු ජනාධිපති මහින්ද රාජපක්ෂ මහතාගේ බිරිඳ වන ශිරන්ති රාජපක්ෂ මහත්මියට කොළඹ මහේස්ත්‍රාත් අධිකරණය අද ඇප ලබා දී තිබේ.
කොළඹ ප්‍රධාන මහේස්ත්‍රාත් අසංග එස්. බෝදරගම මහතා මෙම නියෝගය නිකුත් කර ඇත්තේ අල්ලස් කොමිසම වෙනුවෙන් පෙනී සිටි අතිරේක සොලිසිටර් ජනරාල් දිලීප පීරිස් මහතා සහ සැකකාරිය වෙනුවෙන් පෙනී සිටි නීතිඥවරුන් ඉදිරිපත් කළ කරුණු සලකා බැලීමෙන් අනතුරුවය.
ජාතික ඉතිරිකිරීමේ බැංකුවට අයත් රුපියල් මිලියන 10ක මුදලක් නීති විරෝධී ලෙස ‘සිරිලිය සවිය’ සංවිධානය වෙත මාරු කළ බවට එල්ල වූ චෝදනාවක් සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් ශිරන්ති රාජපක්ෂ මහත්මිය මෑතකදී අත්අඩංගුවට ගනු ලැබීය. එම සිද්ධිය සම්බන්ධයෙන් රක්ෂිත බන්ධනාගාරගත කර සිටි ඇයට අධිකරණය මෙලෙස ඇප නියම කර තිබේ.
update
ශිරන්ති රාජපක්ෂට හෘද බයිපාස් සැත්කමක් අවශ්‍ය බව වෛද්‍ය වාර්තාවේ සඳහන්
ජාතික රෝහලේ වෛද්‍ය වාර්තාව කොළඹ ප්‍රධාන මහේස්ත්‍රාත් අධිකරණයට – නඩු විභාගය පස්වරු 2.45 දක්වා කල් තබයි
හිටපු ජනාධිපති ආර්යාව ශිරන්ති රාජපක්ෂ මහත්මියට හෘද බයිපාස් සැත්කමක් සිදුකිරීම අවශ්‍ය බව සඳහන් වෛද්‍ය වාර්තාවක් කොළඹ ජාතික රෝහල විසින් කොළඹ ප්‍රධාන මහේස්ත්‍රාත් අධිකරණයට ඉදිරිපත් කර තිබේ.
‘සිරිලිය සවිය’ සංවිධානයට ජාතික ඉතිරිකිරීමේ බැංකුවට අයත් රුපියල් මිලියන 10ක මුදලක් ලබාදීමේ සිද්ධිය සම්බන්ධයෙන් සැකකාරියක ලෙස රක්ෂිත බන්ධනාගාරගත කර සිටින ශිරන්ති රාජපක්ෂ මහත්මියගේ සෞඛ්‍ය තත්ත්වය පිළිබඳ මෙම වාර්තාව අද (16) අධිකරණයට ඉදිරිපත් කර ඇත.
කොළඹ ප්‍රධාන මහේස්ත්‍රාත් අසංග එස්. බෝදරගම මහතා ඉදිරියේ නඩුව අද කැඳවූ අවස්ථාවේදී මෙම වාර්තාව ඉදිරිපත් කර ඇත.
ශ්‍රී ලංකා ජාතික රෝහලේ අධ්‍යක්ෂවරයාගේ ආවරණ ලිපියක් සමඟ වාර්තාව ඉදිරිපත් කර තිබූ බව මහේස්ත්‍රාත්වරයා විවෘත අධිකරණයේදී සඳහන් කර ඇත. එම වාර්තාවේ සැකකාරියගේ සෞඛ්‍ය තත්ත්වය විස්තර කර ඇති අතර, ඇයට හෘද බයිපාස් සැත්කමක් අවශ්‍ය බව ද සඳහන් කර තිබේ. ඉන් අනතුරුව අල්ලස් කොමිසම වෙනුවෙන් අධිකරණයේ පෙනී සිටි අතිරේක සොලිසිටර් ජනරාල් දිලීප පීරිස් මහතා, වෛද්‍ය වාර්තාව අධ්‍යයනය කිරීමෙන් පසු කරුණු ඉදිරිපත් කිරීමට අවසර ලබාදෙන ලෙස අධිකරණයෙන් ඉල්ලා ඇත.
ඒ අනුව, අදාළ කරුණු ඉදිරිපත් කිරීම සඳහා නඩු කටයුතු අද පස්වරු 2.45 දක්වා කල් තැබීමට මහේස්ත්‍රාත්වරයා නියෝග කර තිබේ.
