යෝෂිතගේ නාවික හමුදා සේවා කාලයේ වැටුප් හා දීමනා රුපියල් ලක්ෂ 51ක් – කොළඹ මහාධිකරණයට සාක්ෂි
හිටපු නාවික හමුදාපති වසන්ත කරන්නාගොඩ මහතා, ශ්‍රී ලංකා නාවික හමුදාවේ සේවය කරමින් සිටි යෝෂිත රාජපක්ෂ මහතාට බ්‍රිතාන්‍යයේ පුහුණු වැඩසටහනකට සහභාගි වීම සඳහා පවුම් 4,000කට අධික මුදලක් සහ දීමනා ලබාදෙන ලෙස ඉල්ලමින් ආරක්ෂක අමාත්‍යාංශයේ ලේකම්වරයා වෙත ලිපියක් යොමු කර තිබූ බව කොළඹ මහාධිකරණයේදී අනාවරණය වී තිබේ.
රුපියල් මිලියන 73කට අධික වටිනාකමකින් යුත් දෙහිවල සහ රත්මලාන ප්‍රදේශවල පිහිටි ඉඩම් කොටස් පහක් මිලදී ගැනීම සම්බන්ධයෙන් යෝෂිත රාජපක්ෂ මහතාට එරෙහිව මුදල් විශුද්ධිකරණය වැළැක්වීමේ පනත යටතේ නීතිපතිවරයා විසින් ගොනු කර ඇති නඩුව විභාගයට ගත් අවස්ථාවේදී මෙම කරුණු අනාවරණය විය.
කොළඹ මහාධිකරණ විනිසුරු උදේශ් රණතුංග මහතා ඉදිරියේ බ්‍රහස්පතින්දා (15) නඩුව විභාගයට ගෙන තිබිණි.
ජ්‍යෙෂ්ඨ රජයේ නීතිඥ ඔස්වල්ඩ් පෙරේරා මහතාගේ මෙහෙයවීම යටතේ සාක්ෂි ලබාදුන් නාවික හමුදා නිලධාරී ධම්මික ප්‍රියදර්ශන වික්‍රමාරච්චි මහතා සඳහන් කළේ, යෝෂිත කනිෂ්ක රාජපක්ෂ මහතා 2006 දෙසැම්බර් 14 වැනිදා සිට 2016 පෙබරවාරි 28 වැනිදා දක්වා ශ්‍රී ලංකා නාවික හමුදාවේ ලුතිනන්වරයකු ලෙස සේවය කර ඇති බවයි.
එම සේවා කාලයේදී ඔහුගේ මාසික වැටුප රුපියල් 16,500ක් වූ බවත්, ඉන් රුපියල් 110ක් අඩු කිරීමෙන් පසු දීමනා ද ඇතුළත්ව මාසිකව රුපියල් 16,390ක මුදලක් ගෙවා ඇති බවත් සාක්ෂිකරු අධිකරණයට දැනුම් දුන්නේය. අද්මිරාල් ට්‍රැවිස් සින්නයියා මහතා වෙනුවෙන් සාක්ෂි ලබාදුන් ඔහු, නිල වාර්තා පදනම් කරගනිමින් මෙම කරුණු ඉදිරිපත් කළේය.
හිටපු නාවික හමුදාපති වසන්ත කරන්නාගොඩ මහතා, තරුණ නාවික නිලධාරීන් සඳහා බ්‍රිතාන්‍යයේ පැවැත්වෙන පුහුණු වැඩසටහනකට යෝෂිත රාජපක්ෂ මහතා සහභාගි කරවීම සඳහා නවාතැන් හා ආහාර වෙනුවෙන් පවුම් 4,174.80ක් සහ පාඨමාලා ගාස්තු ලෙස රුපියල් 20,362ක් ලබාදෙන ලෙස ආරක්ෂක අමාත්‍යාංශයේ ලේකම්වරයාගෙන් ඉල්ලා තිබූ බව ද සාක්ෂිකරු පැවසීය. එවකට විනිමය අනුපාතය අනුව පවුම් මුදල රුපියල් මිලියනයකට ආසන්න වටිනාකමක් ගත් බව ද අධිකරණයට ඉදිරිපත් වූ සාක්ෂියේ සඳහන් විය.
තවත් නාවික හමුදා නිලධාරියකු වන නුවන් තුෂාර මහතා සාක්ෂි දෙමින් කියා සිටියේ, යෝෂිත රාජපක්ෂ මහතා 2006 වසරේ සිට 2016 පෙබරවාරි දක්වා නාවික හමුදාවේ සේවය කළ කාලය තුළ වැටුප් හා දීමනා ලෙස රුපියල් 5,150,626ක මුදලක් ලබාගෙන ඇති බවයි. එම මුදලට මූලික වැටුප සහ දීමනා ඇතුළත් වූ බව ද ඔහු සඳහන් කළේය.
මේ අතර, නාවික හමුදා නිලධාරී දේවින්ද උදයකුමාර මහතා සාක්ෂි ලබාදෙමින් සඳහන් කළේ, 2009 මාර්තු 31 සිට 2015 මාර්තු 31 දක්වා කාලයට අදාළ වත්කම් හා බැරකම් ප්‍රකාශ යෝෂිත රාජපක්ෂ මහතා විසින් නාවික හමුදාවට ඉදිරිපත් කර තිබූ බවයි.
ඩේසි ෆොරස්ට් මහත්මියට අදාළ දේපළ සම්බන්ධයෙන් නුගේගොඩ දිසා අධිකරණයේ විභාග වූ නඩුවක මුල් නඩු ගොනුව පදනම් කරගනිමින් අධිකරණ ලේඛක සෙනරත් බණ්ඩාර මහතා ද සාක්ෂි ලබා දුන්නේය. 2017 මාර්තු 15 වැනිදා එවකට නුගේගොඩ දිසා විනිසුරු සහන් මාපා මහතා විසින් නිකුත් කරන ලද නියෝගයකින් ඩේසි ෆොරස්ට් මහත්මියගේ දේපළ පරිපාලනය සඳහා තෙවැනි විත්තිකරුවකු පත් කර තිබූ බවත්, ඩිමෙන්ෂියා සහ ඇල්සයිමර් රෝගයෙන් පෙළෙන බව සඳහන් කරමින් තවත් පුද්ගලයකු ඇගේ භාරකරු ලෙස පත් කර තිබූ බවත් සාක්ෂිකරු පැවසීය.
කෙසේ වෙතත්, අදාළ නියෝගයේ ඩේසි ෆොරස්ට් මහත්මියගේ වෛද්‍ය තත්ත්වය පිළිබඳව අධිකරණය සෑහීමකට පත්වූ බවට සටහනක් නොතිබූ බව සාක්ෂිකරු පෙන්වා දුන්නේය. එමෙන්ම, ඇගේ දේපළ පරිපාලනය සඳහා පුද්ගලයකු පත් කර තිබුණ ද, ඇයට අයත් චංචල හෝ නිශ්චල දේපළ සහ මූල්‍ය වත්කම් පිළිබඳ විස්තර නඩු වාර්තාවල අඩංගු නොවූ බව ද ඔහු සඳහන් කළේය.
වැඩිදුර නඩු විභාගය ඔක්තෝබර් 30 වැනිදාට කල් තැබූ විනිසුරුවරයා, එදින ඉතිරි පැමිණිල්ලේ සාක්ෂිකරුවන් අධිකරණය හමුවේ පෙනී සිටින ලෙස ද නියෝග කළේය.
