පානීය ජලයට භූගත ජලය සොයයි
වියළි කාලගුණය හේතුවෙන් දිස්ත්රික්ක හතක පානීය ජල අවශ්යතාවට බලපෑම් එල්ල වී ඇති අතර එම තත්ත්වයට විසඳුමක් ලෙස මොනරාගල සහ මඩකලපුව දිස්ත්රික්කවල භූගත ජලය ලබාගැනීමේ ව්යාපෘතියක් ආරම්භ කර ඇතැයි ජාතික ජල සම්පාදන හා ජලාපවහන මණ්ඩලය මාධ්ය වෙත පවසා ඇත.
එම වැඩපිළිවෙළ යටතේ මොනරාගල දිස්ත්රික්කයේ මේ වනවිට නළ ළිං 60කට ආසන්න සංඛ්යාවක් ඉදිකරමින් පවතින බව ජාතික ජල සම්පාදන හා ජලාපවහන මණ්ඩලයේ සභාපති චන්දන බණ්ඩාර මහතා සඳහන් කර ඇත.
මඩකලපුව දිස්ත්රික්කයේද භූගත ජලය ලබාගැනීම සඳහා නළ ළිං ඉදිකිරීමට අවශ්ය පියවර ගෙන ඇති බව ඔහු වැඩිදුරටත් සඳහන් කර ඇත.
මේ අතර වියළි කාලගුණික තත්ත්වය හේතුවෙන් පානීය ජල අර්බුදයට මුහුණ දී සිටින ජනතාවට සහන සැලසීම සඳහා දිස්ත්රික්ක හතක පුද්ගලයන් 75,000කට අධික පිරිසකට මේ වනවිට පානීය ජලය ලබාදෙමින් සිටින බව ආපදා කළමනාකරණ මධ්යස්ථානය පවසා ඇත.
බදුල්ල, පොළොන්නරුව, හම්බන්තොට, රත්නපුර, මඩකලපුව සහ අම්පාර ඇතුළු දිස්ත්රික්ක හතක ප්රාදේශීය ලේකම් කොට්ඨාස රැසකට මෙම වියළි කාලගුණ තත්ත්වයෙන් බලපෑම් එල්ල වී ඇති අතර, සමස්තයක් ලෙස බලපෑමට ලක්ව ඇති පුද්ගලයන් සංඛ්යාව 84,545 ඉක්මවා තිබේ.
වියළි කාලගුණයත් සමඟ වාරිමාර්ග දෙපාර්තමේන්තුව යටතේ පවතින ජලාශවල ජල ධාරිතාවද තවදුරටත් පහළ ගොස් ඇති අතර මේ වනවිට සමස්ත ජල ධාරිතාව සියයට 34.7ක් දක්වා අඩු වී තිබේ.
ජලාශවල ජල ධාරිතාව අඩුවීම සම්බන්ධයෙන් වැඩිම බලපෑමක් අම්පාර දිස්ත්රික්කයට එල්ල වී ඇති අතර එම දිස්ත්රික්කයේ ජලාශවල ජල ධාරිතාව සියයට 21.7ක් දක්වා පහත වැටී ඇත. මඩකලපුව දිස්ත්රික්කයේ ජලාශවල ජල ධාරිතාව සියයට 25.6ක් සහ ත්රිකුණාමලය දිස්ත්රික්කයේ සියයට 26.8ක් ලෙස වාර්තා වී තිබේ.
මේ අතර මුරුතවෙල, මොරවැව, කවුඩුල්ල, ඇතිමලේ, වීරවිල, වෙහෙරගල, උන්නච්චිය, මොරනා, නාගදීප සහ රොටිකුලම් ඇතුළු ප්රධාන ජලාශ කිහිපයක ජල සංචිත ප්රමාණය මේ වනවිට සියයට 20කටත් වඩා පහළ මට්ටමකට පැමිණ තිබේ.
මෙවැනි තත්ත්වයක් තුළ පානීය ජල අවශ්යතාවට ප්රමුඛත්වය ලබා දෙමින් ජලාශවල පවතින ජලය උපරිම කාර්යක්ෂමතාවකින් කළමනාකරණය කර මුදාහැරීමට පියවර ගනිමින් සිටින බව වාරිමාර්ග දෙපාර්තමේන්තුව සඳහන් කර ඇත.
වියළි කාලගුණ තත්ත්වය තවදුරටත් පැවතුණහොත් ජල සම්පත් මත පවතින පීඩනය ඉහළ යා හැකි බැවින් පානීය ජල සැපයුම අඛණ්ඩව පවත්වාගෙන යාම සඳහා විකල්ප ජල මූලාශ්ර හඳුනාගැනීම සහ පවතින ජල සංචිත කාර්යක්ෂමව කළමනාකරණය කිරීම කෙරෙහි අවධානය යොමුවී තිබේ.
