පසුගිය රජය සමයේ ඊශ්රායලයට ශ්රමිකයින් යැවීමේදී සිදුවූ බව කියන අක්රමිකතාවක් සම්බන්ධයෙන් හිටපු අමාත්ය මනුෂ නානායක්කාර මහතාට එරෙහිව සිදු කළ විමර්ශන කටයුතු අවසන් කර ඇති බව අල්ලස් හෝ දූෂණ චෝදනා විමර්ශන කොමිෂන් සභාව අද (28) කොළඹ ප්රධාන මහේස්ත්රාත් අධිකරණයට දැනුම් දී තිබේ.
මෙම නඩුකරය කොළඹ ප්රධාන මහේස්ත්රාත් අසංග එස්. බෝදරගම මහතා ඉදිරියේ කැඳවූ අවස්ථාවේදී අල්ලස් කොමිසමේ නිලධාරීන් මේ බව අධිකරණයට දැනුම් දී ඇත. එහිදි අල්ලස් කොමිසම අධිකරණයට දැනුම් දී ඇත්තේ මනුෂ නානායක්කාර මහතා සම්බන්ධයෙන් සිදු කළ විමර්ශන කටයුතු මේ වනවිට අවසන් කර ඇති බවත් එම විමර්ශනවලට අදාළ ගොනු කොමිසමේ කොමසාරිස්වරුන් වෙත ඉදිරිපත් කර ඇති බවත්ය.
විමර්ශනවලින් අනතුරුව හිටපු අමාත්යවරයා සම්බන්ධයෙන් ගනු ලබන ඉදිරි පියවර පිළිබඳව අධිකරණයට දැනුම් දීම සඳහා නඩුව යළි කැඳවීමට දිනයක් ලබාදෙන ලෙසද අල්ලස් කොමිසමේ නිලධාරීන් අධිකරණයෙන් ඉල්ලා තිබේ.
ඉදිරිපත් වූ කරුණු සලකා බැලූ කොළඹ ප්රධාන මහේස්ත්රාත්වරයා නඩුකරය ලබන දෙසැම්බර් 18 වැනිදා යළි කැඳවීමට නියම කර ඇති අතර එදින වනවිට විමර්ශනවලින් අනතුරුව මනුෂ නානායක්කාර මහතා සම්බන්ධයෙන් ගෙන ඇති පියවර සහ නඩු කටයුතුවල ප්රගතිය අධිකරණයට දැනුම් දෙන ලෙසද මහේස්ත්රාත්වරයා අල්ලස් කොමිසමට නියෝග කර ඇත.
පසුගිය රජය සමයේ ඊශ්රායලයේ කෘෂිකාර්මික රැකියා සඳහා ශ්රී ලාංකික ශ්රමිකයින් යැවීමේදී දේශපාලනික වශයෙන් තමන්ට හිතවත් පුද්ගලයන් තෝරා යැවීම මඟින් හිටපු අමාත්ය මනුෂ නානායක්කාර මහතා සිය බලය අයුතු ලෙස පරිහරණය කරමින් දූෂණය නමැති වරද සිදුකර ඇති බවට චෝදනා එල්ල වී තිබිණි.
