හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ සහ හිටපු නාවික හමුදාපති අද්මිරාල් (විශ්රාමික) වසන්ත කරන්නාගොඩට එරෙහිව දූෂණ චෝදනා සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව කොළඹ මහාධිකරණය හමුවේ අධිචෝදනා ගොනු කර ඇත.
අල්ලස් කොමිසම විසින් ඉදිරිපත් කර ඇති අධිචෝදනා අනුව 2006 සැප්තැම්බර් 1 සිට 2007 ජූනි 8 දක්වා කාලය තුළ ශ්රී ලංකා නාවික හමුදාපති ලෙස කටයුතු කළ වසන්ත කරන්නාගොඩ මහතා යෝෂිත රාජපක්ෂට බ්රිතාන්ය රාජකීය නාවික හමුදා පුහුණු විද්යාලයේ Royal Navy Young Officers Course පාඨමාලාවට අයුතු ලෙස සහභාගී වීමට අවස්ථාව සලසා දීමෙන් රජයට පාඩුවක් සිදු කළ බවට චෝදනා එල්ල කර ඇත.
එම ක්රියාවෙන් අයුතු ප්රතිලාභයක් ලබාගත් බවට යෝෂිත රාජපක්ෂ මහතාටද චෝදනා එල්ල කර තිබේ.
විත්තිකරුවන් දෙදෙනාට එරෙහිව අල්ලස් කොමිසම විසින් ගොනු කර ඇති අධිචෝදනා සංඛ්යාව අටකි.
මෙම අධිචෝදනා මේ වන විට කොළඹ මහාධිකරණය හමුවේ ගොනු කර ඇති අතර, චෝදනා භාරදීම සඳහා විත්තිකරුවන්ට ඉදිරියේදී අධිකරණය විසින් සිතාසි නිකුත් කිරීමට නියමිතය.
