පාස්කු ඉරුදින ත්රස්ත ප්රහාරය එල්ල වීමට නියමිත බවට ප්රමාණවත් බුද්ධි තොරතුරු ලැබී තිබියදීත් එය වැළැක්වීමට අවශ්ය පියවර නොගැනීම, රාජකාරිය පැහැර හැරීම සහ මිනීමැරීමට අනුබල දීමේ චෝදනාවලට වරදකරුවන් කළ ආරක්ෂක අමාත්යංශයේ හිටපු ලේකම් හේමසිරි ප්රනාන්දු සහ හිටපු පොලිස්පති පූජිත් ජයසුන්දර යන මහත්වරුන්ට කොළඹ ස්ථීර ත්රිපුද්ගල මහාධිකරණ විනිසුරු මඩුල්ලේ බහුතර තීන්දුව අනුව ජූලි 31 වැනිදා මරණීය දණ්ඩනය නියම කෙරිණි.
මෙම නඩුව ප්රියන්ත ලියනගේ, තිලකරත්න බණ්ඩාර සහ විරාජ් වීරසූරිය යන විනිසුරුවරුන්ගෙන් සමන්විත ත්රිපුද්ගල මහාධිකරණ විනිසුරු මඩුල්ල හමුවේ විභාග වූ අතර පැය හතරකට අධික කාලයක් පුරා තීන්දුව ප්රකාශයට පත් කිරීමෙන් අනතුරුව බහුතර විනිසුරුවරුන් වූ ප්රියන්ත ලියනගේ සහ තිලකරත්න බණ්ඩාර යන මහත්වරුන් විත්තිකරුවන් දෙදෙනාම චෝදනාවලට වරදකරුවන් බවට තීරණය කළහ.
බහුතර තීන්දුවෙන් අධිකරණය අවධාරණය කළේ රාජ්යයේ ඉහළම ආරක්ෂක නිලධාරීන් ලෙස කටයුතු කළ විත්තිකරුවන් දෙදෙනාට පාස්කු ඉරුදින මරාගෙන මැරෙන ප්රහාරයක් එල්ල වීමට නියමිත බවට ප්රමාණවත් බුද්ධි තොරතුරු ලැබී තිබූ නමුත් එය වැළැක්වීම සඳහා ඔවුන්ට නීතියෙන් සහ සිය තනතුරුවලින් පැවරී තිබූ වගකීම් ඉටු කිරීමට අපොහොසත් වී ඇති බවයි.
පූජිත් ජයසුන්දරට එරෙහි තීන්දුව
හිටපු පොලිස්පති පූජිත් ජයසුන්දර මහතා සම්බන්ධයෙන් තීන්දුව ප්රකාශයට පත් කළ සභාපති විනිසුරු ප්රියන්ත ලියනගේ මහතා සඳහන් කළේ මහජන ආරක්ෂාව තහවුරු කිරීමේ ප්රධාන වගකීම පැවරී තිබුණේ පොලිස්පතිවරයා වෙත බවය.
තීන්දුවේ සඳහන්ව ඇති පරිදි 2019 අප්රේල් 20 වැනිදා සවස එවක රාජ්ය බුද්ධි සේවයේ අධ්යක්ෂ නිලන්ත ජයවර්ධන මහතා විසින් කොළඹ හා තදාසන්න ප්රදේශවල පිහිටි කතෝලික දේවස්ථාන සහ සංචාරක හෝටල් ඉලක්ක කර මරාගෙන මැරෙන ප්රහාරයක් එල්ල විය හැකි බවට නිශ්චිත බුද්ධි තොරතුරු පොලිස්පතිවරයා වෙත ලබාදී තිබිණි.
එහෙත් එම අනතුරු ඇඟවීම ලැබීමෙන් පසුව ප්රහාරය වැළැක්වීම සඳහා පොලිස් දෙපාර්තමේන්තුව හරහා විශේෂ ආරක්ෂක වැඩපිළිවෙළක් ක්රියාත්මක කිරීම අදාළ නිලධාරීන් දැනුවත් කිරීම හෝ අවදානම් ස්ථාන ආරක්ෂා කිරීම සඳහා කිසිදු ක්රියාමාර්ගයක් ගෙන නොමැති බව අධිකරණය පෙන්වා දුන්නේය.
විනිසුරුවරුන් සඳහන් කළේ අපරාධ වැළැක්වීම සඳහා රාජ්යය විසින් පත් කර ඇති ප්රධාන නිලධාරියා ලෙස ඔහු සිය නීතිමය සහ ව්යවස්ථානුකූල වගකීම බරපතළ ලෙස පැහැර හැර ඇති බවය. එම හේතුවෙන් රාජකාරිය පැහැරහැරීම සහ මිනීමැරීමට අනුබල දීමේ චෝදනාවලට පූජිත් ජයසුන්දර මහතා වරදකරු කර මරණීය දණ්ඩනය නියම කෙරිණි.
හේමසිරි ප්රනාන්දුට එරෙහි තීන්දුව
ආරක්ෂක අමාත්යංශයේ හිටපු ලේකම් හේමසිරි ප්රනාන්දු මහතා සම්බන්ධයෙන් තීන්දුව ප්රකාශයට පත් කළ බහුතර විනිසුරුවරු සඳහන් කළේ නීතිපතිවරයා ගොනු කළ චෝදනා 855න් චෝදනා 854කට ඔහු වරදකරු බවය. අධිකරණය පෙන්වා දුන්නේ පාස්කු ප්රහාරයට පෙර දින සවස රාජ්ය බුද්ධි සේවයේ එවක අධ්යක්ෂ නිලන්ත ජයවර්ධන මහතා විසින් පසුදින ප්රහාරයක් එල්ල විය හැකි බවට ආරක්ෂක අමාත්යංශයේ ලේකම්වරයාට දැනුම් දී තිබූ බවයි.
එහෙත් එම තොරතුරු අනුව ආරක්ෂක අමාත්යංශයේ හිටපු ලේකම්වරයා ලෙස බුද්ධි අංශ රැස්වීමක් කැඳවීම, ත්රිවිධ හමුදාව සහ අනෙකුත් ආරක්ෂක අංශ සමඟ සම්බන්ධීකරණය කිරීම හෝ හදිසි ආරක්ෂක සැලැස්මක් ක්රියාත්මක කිරීම වැනි පියවර කිසිවක් ගෙන නොමැති බව තීන්දුවෙන් සඳහන් කර ඇත.
ප්රහාරය හේතුවෙන් මහා පරිමාණ මිනීමැරුම් සිදුවිය හැකි බව දැන සිටියද එය වැළැක්වීම සඳහා කිසිදු ක්රියාමාර්ගයක් නොගැනීමෙන් විත්තිකරු සිය නීතිමය වගකීම් පැහැර හැර ඇති බව බහුතර විනිසුරුවරු තීරණය කර තිබිණි. ඒ අනුව රාජකාරිය නොකර හැරීම සහ මිනීමැරීමට අනුබල දීමේ චෝදනාවලට ඔහු වරදකරු කර මරණීය දණ්ඩනය නියම කරන ලදී.
බෙදුණු තීන්දුවක්
මෙම නඩුවේ විශේෂත්වය වූයේ ත්රිපුද්ගල විනිසුරු මඩුල්ල බෙදුණු තීන්දුවක් ලබාදීමයි. ප්රියන්ත ලියනගේ සහ තිලකරත්න බණ්ඩාර යන විනිසුරුවරුන්ගේ බහුතර තීන්දුව අනුව විත්තිකරුවන් දෙදෙනාට මරණීය දණ්ඩනය නියම වූ අතර විනිසුරු විරාජ් වීරසූරිය මහතා සිය සුළුතර තීන්දුවෙන් සඳහන් කළේ පැමිණිල්ල විසින් ඉදිරිපත් කළ සාක්ෂි මත චෝදනා සාධාරණ සැකයෙන් ඔබ්බට ඔප්පු කර නොමැති බවය.
එබැවින් විත්තිකරුවන් දෙදෙනාම නිදොස් කොට නිදහස් කළ යුතු බව විනිසුරු විරාජ් වීරසූරිය මහතා සිය තීන්දුවෙන් ප්රකාශ කළ ද බහුතර විනිසුරුවරුන්ගේ තීරණය අනුව හේමසිරි ප්රනාන්දු සහ පූජිත් ජයසුන්දර යන මහත්වරුන්ට මරණීය දණ්ඩනය නියම කෙරිණි.
නිදහස් කිරීමේ තීන්දුවේ සිට මරණීය දණ්ඩනය දක්වා නඩුවේ ගමන
ආරක්ෂක අමාත්යංශයේ හිටපු ලේකම් හේමසිරි ප්රනාන්දු සහ හිටපු පොලිස්පති පූජිත් ජයසුන්දර යන මහත්වරුන්ට එරෙහි නඩුවේ අවසන් තීන්දුව ලබාදීමට පෙර එය දීර්ඝ නීතිමය ක්රියාදාමයක් ඔස්සේ ගමන් කළ නඩුවකි. මුල් මහාධිකරණ තීන්දුව, නීතිපතිවරයාගේ අභියාචනය සහ ශ්රේෂ්ඨාධිකරණයේ මැදිහත්වීම හේතුවෙන් මෙම නඩුව නැවත විභාගයට ගැනීමට සිදු විය.
2019 අප්රේල් 21 වැනිදා පාස්කු ඉරුදින ත්රස්ත ප්රහාරයෙන් පුද්ගලයන් 270කට ආසන්න පිරිසක් මියගොස් තවත් සිය ගණනක් තුවාල ලැබීමෙන් අනතුරුව, ප්රහාරය වැළැක්වීමට ප්රමාණවත් බුද්ධි තොරතුරු ලැබී තිබියදීත් රාජකාරිය පැහැර හැරීමෙන් සාපරාධී ලෙස වගකීම් ඉටු නොකළ බවට චෝදනා කරමින් නීතිපතිවරයා ආරක්ෂක අමාත්යංශයේ හිටපු ලේකම් හේමසිරි ප්රනාන්දු සහ හිටපු පොලිස්පති පූජිත් ජයසුන්දරට එරෙහිව කොළඹ මහාධිකරණය හමුවේ චෝදනා 855ක් යටතේ අධිචෝදනා ගොනු කළේය.
පැමිණිල්ලේ ස්ථාවරය වූයේ ප්රමාණවත් බුද්ධි තොරතුරු ලැබී තිබියදීත් ඒවාට ප්රතිචාර නොදැක්වීම හේතුවෙන් පුද්ගලයන්ගේ මරණ සහ තුවාල සිදුවීමට විත්තිකරුවන්ගේ රාජකාරි පැහැර හැරීම සෘජුවම බලපා ඇති බවය.
2022 මහාධිකරණ තීන්දුව
දීර්ඝ නඩු විභාගයකින් අනතුරුව 2022 පෙබරවාරි 18 වැනිදා නාමල් බලල්ලේ, මොහොමඩ් ඉර්ෂඩීන් සහ ආදිත්ය පටබැඳිගේ යන විනිසුරුවරුන්ගෙන් සමන්විත ත්රිපුද්ගල මහාධිකරණ විනිසුරු මඩුල්ල සිය තීන්දුව ප්රකාශයට පත් කළේය.
එහිදී විත්තිවාචික කැඳවීමකින් තොරවම තීන්දුව ලබාදුන් විනිසුරු මඩුල්ල, හේමසිරි ප්රනාන්දු සහ පූජිත් ජයසුන්දර යන මහත්වරුන් නිදොස් කොට නිදහස් කිරීමට තීරණය කළේය.
එම තීන්දුවේදී මහාධිකරණය පෙන්වා දුන්නේ පාස්කු ප්රහාරය සම්බන්ධයෙන් නිශ්චිත හා ප්රමාණවත් බුද්ධි තොරතුරු සැපයීමට රාජ්ය බුද්ධි සේවය අසමත් වී ඇති බවයි. විශේෂයෙන්ම එවකට රාජ්ය බුද්ධි සේවයේ අධ්යක්ෂ නිලන්ත ජයවර්ධන මහතා සිය වගකීම් නිසි ලෙස ඉටු කර නොමැති බව තීන්දුවේ සඳහන් කෙරිණි.
එවැනි තත්ත්වයක් තුළ ආරක්ෂක අමාත්යංශයේ හිටපු ලේකම් සහ හිටපු පොලිස්පතිවරයා රාජකාරිය පැහැර හැරීමේ චේතනාවකින් කටයුතු කළ බව සාධාරණ සැකයෙන් ඔබ්බට ඔප්පු කිරීමට පැමිණිල්ල අපොහොසත් වී ඇති බව මහාධිකරණ විනිසුරු මඩුල්ල නිගමනය කළේය.
නීතිපතිගේ අභියාචනය
මහාධිකරණයේ එම තීන්දුවට එකඟ නොවූ නීතිපතිවරයා ශ්රේෂ්ඨාධිකරණය හමුවේ අභියාචනයක් ගොනු කළේය. එහිදී නීතිපතිවරයා මූලික වශයෙන් තර්ක කළේ විත්තිකරුවන්ගේ විත්තිවාචිකය කැඳවීමකින් තොරවම නඩුව අවසන් කිරීම නීතියට පටහැනි බවත්, පැමිණිල්ල ඉදිරිපත් කළ සාක්ෂි නිසි ලෙස ඇගයීමකින් තොරව විත්තිකරුවන් නිදහස් කර ඇති බවත්ය.
මෙම අභියාචනය සලකා බැලූ ශ්රේෂ්ඨාධිකරණයේ පංචපුද්ගල විනිසුරු මඩුල්ල 2024 නොවැම්බර් 5 වැනිදා සිය තීන්දුව ප්රකාශයට පත් කළේය.
ශ්රේෂ්ඨාධිකරණයේ නියෝගය
ශ්රේෂ්ඨාධිකරණය මහාධිකරණය ලබාදුන් නිදොස් කිරීමේ තීන්දුව බලරහිත කළ අතර, නඩුවේ විත්තිවාචිකය කැඳවා නඩුව යළි විභාග කරන ලෙස මහාධිකරණයට නියෝග කළේය. එම තීන්දුවෙන් ශ්රේෂ්ඨාධිකරණය අවධාරණය කළේ නඩුවේ පැමිණිල්ල ඉදිරිපත් කළ සාක්ෂි සම්පූර්ණයෙන් විමසා බැලීමෙන් අනතුරුව විත්තිකරුවන්ට තම ආරක්ෂාව ඉදිරිපත් කිරීමේ අවස්ථාව ලබාදිය යුතු බවත්, එම ක්රියාදාමය අනුගමනය නොකර නඩුව අවසන් කිරීම නිසි නීතිමය ක්රියාපටිපාටියට අනුකූල නොවන බවත්ය.
යළි විභාගයට ගත් නඩුව
ශ්රේෂ්ඨාධිකරණ නියෝගයට අනුව ප්රියන්ත ලියනගේ, තිලකරත්න බණ්ඩාර සහ විරාජ් වීරසූරිය යන විනිසුරුවරුන්ගෙන් සමන්විත කොළඹ ස්ථීර ත්රිපුද්ගල මහාධිකරණ විනිසුරු මඩුල්ල හමුවේ නඩුව යළි කැඳවනු ලැබීය. විත්තිවාචිකය කැඳවීමෙන් පසු දෙපාර්ශ්වයේම කරුණු සලකා බැලූ අධිකරණය පැය හතරකට අධික කාලයක් පුරා සිය තීන්දුව ප්රකාශයට පත් කළ අතර බහුතර තීන්දුව අනුව හේමසිරි ප්රනාන්දු සහ පූජිත් ජයසුන්දර යන මහත්වරුන්ට එරෙහි චෝදනා සනාථ වී ඇති බව තීරණය කර මරණීය දණ්ඩනය නියම කළේය.
පාස්කු ප්රහාරයේ පසුබිම
2019 අප්රේල් 21 වැනිදා පාස්කු ඉරුදින උදෑසන 8.45ට පමණ කතෝලික දේවස්ථාන තුනක් සහ කොළඹ පිහිටි සුඛෝපභෝගී හෝටල් තුනක් ඉලක්ක කර මරාගෙන මැරෙන බෝම්බ ප්රහාර මාලාවක් එල්ල විය. එදිනම දෙහිවල ප්රදේශයේ හෝටලයක සහ දෙමටගොඩ ප්රදේශයේ නිවසකද පිපිරීම් වාර්තා විය.
එම ප්රහාරවලින් පුද්ගලයන් 270කට ආසන්න පිරිසක් ජීවිතක්ෂයට පත් වූ අතර 500කට අධික පිරිසක් තුවාල ලැබූහ. ප්රහාරයට පෙර බුද්ධි තොරතුරු ලැබී තිබූ බව පසුව සිදු වූ ජනාධිපති කොමිෂන් සභා විමර්ශන, පාර්ලිමේන්තු සාකච්ඡා සහ අධිකරණ ක්රියාදාමයන්හිදීද ප්රධාන කරුණක් බවට පත්විය.
එම පසුබිම තුළ ගොනු වූ මෙම නඩුව, ප්රහාරය සිදුකළ පුද්ගලයන්ගේ අපරාධ වගකීම පමණක් නොව රාජ්ය නිලධාරීන්ගේ රාජකාරිමය වගකීම සහ එම වගකීම ඉටු නොකිරීම අපරාධමය වගකීමක් දක්වා විහිදිය හැකිද යන ප්රශ්නයද ශ්රී ලංකාවේ අධිකරණය හමුවේ විභාගයට ලක් කළ වැදගත් නඩුවක් බවට පත්විය.
