ගාල්ල කරාපිටිය රෝහලේ නේවාසික ප්රතිකාර ලබන ඉරාන ජාතික නැවියන් හමුවී තොරතුරු ලබාගනිමින් සිටියදී පොලිසියට අයත් බව කියන පිරිසක් සිලෝන් ටුඩේ පුවත්පතේ නියෝජ්ය කර්තෘ සුලෝචනා රාමයියාගේ රාජකාරියට බාධා කිරීම සම්බන්ධයෙන් ගාල්ල දකුණු පළාත් නියෝජ්ය පොලිස්පති කාර්යාලයෙන් විමර්ශනයක් ආරම්භ කර ඇති බව පොලිස් මාධ්ය ප්රකාශක පොලිස් අධිකාරි එෆ්.යු. වුට්ලර් මහතා කියයි.
විමර්ශනය ජ්යෙෂ්ඨ පොලිස් අධිකාරී එස්.පී.කේ. ගාල්ලගේ අධීක්ෂණය යටතේ සහකාර පොලිස් අධිකාරවරයෙකු සිදු කරන බවද ඔහු පැවසීය.
මාධ්යවේදිනී සුලෝචනා රාමයියා ඉරාන නාවිකයන් හමුවී එම ස්ථානයේ සිටි ඉරාන තානාපති කාර්යාල නිලධාරිනියකගේ භාෂා පරිවර්තන සහායෙන් තොරතුරු ලබාගනිමින් සිටියදී එම ස්ථානයට පැමිණි පිරිසක් ඇයගේ රාජකාරියට බාධා කරමින් අසභ්ය වචන භාවිත කරමින් බැණ වැදී ඇත.
එම පොලිස් නිලධාරීන් පිරිස මාධ්යවේදිනිය පොලිස් බැරැක්කයක් වෙත රැගෙන ගොස් ඇගේ සටහන් පොත ලබා ගැනීමට උත්සාහ කර ඇති බවත් එම අවස්ථාවේදී ඇය පොලිස්පතිවරයාට දූරකථනයෙන් සිද්ධිය පිළිබඳව දැනුම් දී ඇති බවත් වාර්තා වෙයි.
