දිට්වා සුළි කුණාටුවෙන් නිවාස අහිමි වූ පුද්ගලයන් 200කට පමණ ජීවත් වීම සඳහා නුවරඑළිය දිස්ත්රික්කයේ මහල් නිවාස සෑදීමට කටයුතු සැලසුම් කර ඇති බව නුවරඑළිය දිස්ත්රික් ලේකම් ඩීඒපී ධනසූරිය මහතා පැවසීය.
ඒ සඳහා අවශ්ය ඉඩම් නුවරඑළිය දිස්ත්රික් ලේකම් කාර්යාලය හඳුනාගෙන ඇති බවත් එම ප්රදේශ මහල් නිවාස තැනීමට සුදුසු දැයි වාර්තාවක් ජාතික ගොඩනැගිලි පර්යේෂණ ආයතනයෙන් ලබා ගෙන අවසන් බවත්, මහල් නිවාස යෝජනා ක්රමයේ ඉදිරි කටයුතු නිවාස අධිකාරිය සහ නුවරඑළිය දිස්ත්රික්ක ලේකම් කාර්යාලය එකතු වී සිදු කරගෙන යෑමට නියමිත බවත් ඒ මහතා පැවසීය.
ඒ සම්බන්ධයෙන් ජාතික ගොඩනැගිලි පර්යේෂණ ආයතනයේ ජ්යෙෂ්ඨ භූ විද්යාඥ ආචාර්ය වසන්ත සේනාධීරගෙන් විමසීමේදී පැවසුවේ නුවරඑළිය හාවා එළිය ප්රදේශයේ අක්කර එකහාමාරක භූමි ප්රමාණයක සහ කොත්මලේ ප්රදේශ කිහිපයක පාංශු පරික්ෂාවක් ගොඩගැගිලි පර්යේෂණ ආයතනය සිදු කළ බවත්, එම ප්රදේශ අතරින් මහල් නිවාස ගොඩනැගීමට තීරණය කරනා ප්රදේශ නැවතත් පාංශු පරීක්ෂාවක් සිදු කළ යුතු බවත්ය.
එහිදී එම මහල් නිවාස තැනීමේදී පොළොවේ සිට කොතරම් ප්රමාණක් පතුළට අත්තිවාරම් දැමිය යුතුද, මහල් නිවාස සංකීර්ණය මහල් කීයක් තිබිය යුතුද සහ මහල් නිවාස කොපමණ ප්රමාණයක් එකම ස්ථානයේ සෑදීමට හැකිද යන්න තීරණය කළ යුතු බවද ඔහු පැවසීය.
මෙම ව්යාපෘති සිදු කරගෙන යද්දී, නැවත නාය යෑම් සිදු නොවන ස්ථානයක් තෝරා ගත යුතු බවත් පස් ගලා ගෙන ගොස් පහළ තැන්පත් නොවන ස්ථානයක් තෝරා ගත යුතු බවත් ඒ මහතා වැඩිදුරටත් පැවසීය.
