රටට කීර්තිය ගෙනෙන පැරා ක්‍රීඩා ජයග්‍රහණවලට කුඩම්මාගේ සැලකිලි ඇයි?

දෙසැම්බර් 07 සිට 14 දින දක්වා ඩුබායිහි පැවති තුන්වන ආසියානු යොවුන් පැරා ක්‍රීඩා ශූරතාවලියට සහභාගි වූ ශ්‍රී ලංකා කණ්ඩායම රන් පදක්කම් 3ක් හා ලෝකඩ පදක්කම් 2ක් දිනා ගැනීමට සමත් වී තිබේ. ඒ ආසියාවේ රටවල් 35ක් සමඟ තරග කරමිනි.

වයස අවුරුදු 17න් පහළ යගුලිය දැමීම හා කවපෙත්ත වීසිකිරීම ඉසව්වලින් දිල්මිණි උදුම්බරා කුමාරගේ රන් පදක්කම් දෙකක්ද, වයස අවුරුදු 17න් පහළ මීටර් 100 ඉසව්වෙන් සෙනුවර සන්දිලු රන් පදක්කමක් හා දුර පැනීමේ ඉසව්වෙන් ලෝකඩ පදක්කමක්ද, අවුරුදු 20න් පහළ මීටර් 400 ඉසව්වෙන් මොහොමඩ් ඉෂාම් යූනුස් ලෝකඩ පදක්කමක්ද දිනා ගන්නට සමත් වී තිබේ.

එහිදී ඉහත සඳහන් කළ රන් පදක්කම් තුන හා ලෝකඩ පදක්කම් දෙකට අමතරව මලල ක්‍රීඩාවෙන් සෙනුවර සන්දිලු අවුරුදු 17න් පහළ මීටර් 200 තරගයෙන් 4 වන ස්ථානය, මොහොමඩ් ඉෂාම් යූනුස් අවුරුදු 20න් පහළ මීටර් 200 තරගයෙන් 7 වන ස්ථානය, වෙඩිගේ චරින් මින්රුත් අවුරුදු 20න් පහළ හෙල්ල වීසිකිරීමෙන් 8 වන ස්ථානය, කවපෙත්ත වීසිකිරීමෙන් 11 වන ස්ථානය හා යගුලිය වීසිකිරීමෙන් 11 වන ස්ථානය දිනාගෙන තිබේ.

ඊට අමතරව බැඩ්මින්ටන් සඳහා සහභාගි වූ ෂෝන් මාර්ක් කෞෂල්‍ය යුගල හා කේවල තරගවලින් 4 හා 5 වන වර්ගීකරණ ස්ථානත්, හිමත් සෙනුවර රණසිංහ කේවල තරගවලින් 8 වන වර්ගීකරණ ස්ථානයත් දිනාගෙන ඇත. එමෙන්ම ටේබල් ටෙනිස් සඳහා ඉදිරිපත් වූ ජාමුනි රුසත් සිල්වා කේවල වර්ගීකරණ තුන්වන ස්ථානයත්, ලිනුක් මාදෙව් දෙහිගහවත්ත කේවල වර්ගීකරණයේ තුන්වන ස්ථානයත්, ඔවුන් දෙදෙනා යුගල වර්ගීකරණයේ 4 වන ස්ථානයත් හිමිකරගෙන ඇත.
ඒ අනුව සහභාගි වූ කණ්ඩායම සැලකිය යුතු දක්ෂතාවක් දක්වා ඇති බව පෙනේ.

මෙසේ ආසියානු යොවුන් පැරා තරඟාවලි පදක්කම් දිනා ගනිමින් ශ්‍රී ලංකාවට පැමිණි ආසියානු යොවුන් පැරා ක්‍රීඩක ක්‍රීඩිකාවන් පිළිගැනීම සඳහා ඔවුන්ගේ දෙමාපියන්, ගුරුවරුන් හා පුහුණුකරුවන් ඇතුළු පිරිස කටුනායක ජාත්‍යන්තර ගුවන් තොටුපළට පැමිණ තිබුණි.

එම සුවිශේෂ ජයග්‍රහණය සම්බන්ධයෙන් මුද්‍රිත මාධ්‍ය, විද්‍යුත් මාධ්‍ය මෙන්ම සමාජ මාධ්‍ය ද ප්‍රචාරයන් ලබාදී තිබුණි. ඒ එහි ඇති වැදගත්කම නිසාවෙනි. පැරා ක්‍රීඩා තරඟාවලි යනු ආබාධිත ක්‍රීඩක ක්‍රීඩිකාවන් තරග වදින ක්‍රීඩා තරඟාවලි වන අතර එවන් තරඟවල ආසියානු මට්ටමේ ජයග්‍රහණයක් යනු ඇගැයීමට ලක්විය යුතු තත්වයකි. පෞද්ගලිකව එම පැරා ක්‍රීඩක ක්‍රීඩිකාවන් ජයග්‍රාහක ජයග්‍රාහිකාවන් වුවද, එහි කීර්තිය අවසන් වශයෙන් ලැබෙන්නේ රටක් වශයෙන් ශ්‍රී ලංකාවටය.

මෙම ජයග්‍රාහි කථාවේ පෙර කථාව එම ජයග්‍රහණය තරම් ආස්වාදජනක එකක් වී නැත. ඒ පැරා ක්‍රීඩා හා ඒ සඳහා තරඟ වදින ක්‍රීඩක ක්‍රීඩිකාවන් යනු නොසැලකිය යුතු මට්ටමේ දෙයක් හා පිරිසක් බවට අදහසක් ක්‍රීඩා බලධාරීන් තුළ තිබීමේ තත්වය තුළය.

එය පැහැදිලි කර ගැනීම සඳහා මේ වනවිට මාධ්‍ය අවකාශය දිනාගෙන ඇති ආසියානු යොවුන් පැරා ක්‍රීඩා තරඟාවලියම උදාහරණයකට ගත හැකිය. එම යොවුන් ආසියානු පැරා ක්‍රීඩා තරගාවලිය සඳහා මලල ක්‍රීඩා තරග ඉසව්වලට අමතරව අවශ්‍ය පරිසාධන මට්ටම් සපුරා ඇති බැඩ්මින්ටන් හා ටේබල් ටෙනිස් ක්‍රීඩක ක්‍රීඩිකාවන්ද සහභාගි වී ඇති අතර ඒ අනුව සහභාගි වී ඇති මුළු පැරා යොවුන් ක්‍රීඩක ක්‍රීඩිකාවන් සංඛ්‍යාව 10 දෙනෙකි. ඒ මලල ක්‍රීඩා සඳහා 6 දෙනෙකු, බැඩ්මින්ටන් සඳහා දෙදෙනෙකු හා ටේබල් ටෙනිස් සඳහා දෙදෙනෙකු වශයෙනි.

ඊට අමතරව කණ්ඩායම් භාර නිලධාරියෙක්, මලල ක්‍රීඩා සම්බන්ධයෙන් කළමනාකරුවෙක්, මලල ක්‍රීඩා පුහුණුකරුවෙක්, බැඩ්මින්ටන් හා ටේබල් ටෙනිස් වෙනුවෙන් කළමනාකරුවෙක්, පාසල් ක්‍රීඩක ක්‍රීඩිකාවන් සහභාගි වන බැවින් අධ්‍යාපන අමාත්‍යාංශ නිලධාරියකු හා කාන්තා භාර නිලධාරිනියක සහභාගි වී තිබේ.

මේ සියල්ලන්ගේ ගුවන් ටිකට්පත්, වීසා, ගාස්තු, නවාතැන්, ගමන් රක්ෂණ, කණ්ඩායම් ඇඳුම් හා දේශීය ප්‍රවාහනය වෙනුවෙන් රුපියල් 12,283,740.50ක මුදලක් ඇස්තමේන්තුගත කර ඇති අතර ඉන් කණ්ඩායම් ඇඳුම් හා දේශීය ගමන් වියදම් හැර රුපියල් 11,753,740.50ක මුදලක් ලබාදෙන ලෙස ක්‍රීඩා අමාත්‍යාංශයෙන් ඉල්ලා ඇත. ඒ සඳහා වූ නිල ඉල්ලීම්වලට යහපත් ප්‍රතිචාර නොලැබෙන තත්වය හමුවේ එම ආබාධිත ක්‍රීඩක ක්‍රීඩිකාවන්ගේ දෙමාපියන් වත්මන් ආණ්ඩුව නියෝජනය කරන මහජන නියෝජිතයින් හමුවීද සිය ඉල්ලීම් ඉදිරිපත් කර ඇත. ඒ එම යොවුන් පැරා ක්‍රීඩා උළෙලට සුදුසුකම් ලබා ඇති සිය දූ දරුවන් ඒ සඳහා ඉදිරිපත් කිරීමට නොලැබුණහොත් ඔවුන් වසර ගණනාවක් තිස්සේ ඒ සඳහා දැරූ වෙහෙස මහන්සියද, දූ දරුවන්ගේ වෙහෙස මහන්සියද වතුරේ ගොස් ඔවුන් මානසිකව ඇද වැටෙන නිසාවෙනි. එම උත්සාහයන්ට ක්‍රීඩා ඇමති සුනිල් කුමාර ගමගේගේ එතරම් කැමැත්තක් තිබී නැත. ක්‍රීඩාවන් ලෙස පැරා ක්‍රීඩා පිළිගන්නට ඔහු කැමැත්තක් දක්වා නැත. පැරා ක්‍රීඩා යනු ලෝකයම පිළිගත් එකක් බව ඔහුට ඒත්තු ගන්වන්නටද හැකි වී නැත. එහෙත් ලැබුණ අනෙකුත් ඉල්ලීම් හමුවේ දහසක් බැනුම් දෙසමින් අවසානයේ ක්‍රීඩා ඇමතිවරයා විසින් එම ආසියානු යොවුන් පැරා ක්‍රීඩා උළෙල සඳහා අනුමත කර ඇත්තේ රුපියල් මිලියන 8.4ක මුදලක් පමණි. ඒ නවාතැන් ගාස්තු සඳහා පමණය. සිය දූ දරුවන් මානසිකව ඇද වැටීම වැළැක්වීම සඳහා හා ඔවුන් තවදුරටත් ක්‍රීඩාවේ දරඳවා තබා ගැනීම සඳහා වෙන කරන්නට දෙයක් නැති තැන ක්‍රීඩක ක්‍රීඩිකාවන්ගේ දෙමාපියන් ටිකට් වියදම් කෙසේ හෝ දරා ඇති අතර ඉතිරි වියදම් ශ්‍රී ලංකාවේ පැරාඔලිම්පික් සංගමය දරා ඇත.

ක්‍රීඩා ඇමති සුනිල් කුමාර ගමගේ එම ඉල්ලීම් හමුවේ ප්‍රතිචාර දැක්වීමේදී කියා ඇත්තේ අනෙකුත් ක්‍රීඩා සංගම්වලට වඩා වැඩි මුදල් මෙම පැරා සංගමයේ ක්‍රීඩා සඳහා වියදම් කිරීමට සිදුවී ඇති බවයි. එහෙත් ක්‍රීඩා ඇමතිවරයා නොදන්නා හෝ නොදන්නා ලෙස හැසිරෙන කාරණය වන්නේ ක්‍රීඩා අමාත්‍යාංශය යටතේ ලියාපදිංචි අනෙකුත් ක්‍රීඩා සංගම් කේවල ක්‍රීඩාවක් සම්බන්ධයෙන් ඇති ඒවා බව යන්නයි. පැරාඔලිම්පික් ක්‍රීඩා සංගමය පැරා ක්‍රීඩාවලට අදාළ මලල ක්‍රීඩා, බැඩ්මින්ටන්, ටේබල් ටෙනිස්, පිහිනුම්, රෝද පුටු ටෙනිස්, ඔරු පැදීම, දුනු විදීම හා වෙඩි තැබීම යන ක්‍රීඩා සියල්ල ආවරණය කරන එකක් යන්නයි.

එසේම ක්‍රිකට්, පාපන්දු වැනි ක්‍රීඩා සංගම්වලට විදේශ සංචාර සම්බන්ධයෙන් මුදල් ප්‍රශ්නයක් නැති බව අප දන්නා සත්‍යයයි. වෙනත් ජනප්‍රිය ක්‍රීඩාවලටද අනුග්‍රහකයන් සොයා ගැනීම හා ජාත්‍යන්තර ක්‍රීඩා සංගමයේ අනුග්‍රහයන් මත මූල්‍යමය ප්‍රශ්න එතරම් නැත. එහෙත් ක්‍රීඩා ඇමතිවරයා මෙන්ම ක්‍රීඩා බලධාරීන්ද තේරුම් ගත යුතු තත්වය වන්නේ ස්වාධින මූල්‍ය ශක්තියක් නැති හා අනුග්‍රහයන්ද නොලැබෙන ක්‍රීඩාවන් සම්බන්ධයෙන් අවශ්‍ය ප්‍රතිපාදන වෙන්කළ යුතු බවයි.

එමෙන්ම පැරා ක්‍රීඩා යනු ලෝකය පිළිගත් ක්‍රීඩා ඉසව් බවද, සෑම ඔලිම්පික් ක්‍රීඩා උළෙලකට පසු එම ඔලිම්පික් ක්‍රීඩා උළෙල පැවැත්වූ ප්‍රධාන ක්‍රීඩාංගණවල පැරා ඔලිම්පික් යනුවෙන් ක්‍රීඩා උළෙලක් පවත්වන බවද, ඒ ආබාධිත තත්වයට පත්වූවන් බැහැර නොකර ඇතුළත් කර ගැනීමේ අදහසින් බවද සටහන් කළ යුතුය. මෙම පැරා ඔලිම්පික් උළෙල සඳහා යන ගමනද, සාමාන්‍ය ඔලිම්පික් උළෙලක් සඳහා යන ගමන මෙන් වන අතර ඒ සඳහා සුදුසුකම් ලැබීමට ඒ ඒ ක්‍රීඩා ඉසව් සඳහා වන පරිසාධන මට්ටම් පසුකිරීම අනිවාර්ය වේ. පරිසාධන මට්ටම් මතම තේරී පත්වන මෙවැනි යොවුන් ක්‍රීඩා උළෙලවලින් කරන්නේ අනාගත පැරා ඔලිම්පික් ක්‍රීඩා උළෙලවලට යෑමට ක්‍රීඩක ක්‍රීඩිකාවන් සූදනම් කිරීමකි. ඒ එම එක් එක් ක්‍රීඩා ඉසව්වල එම ක්‍රීඩක ක්‍රීඩිකාවන් සිටින ස්ථාන හඳුනා ගැනීම සඳහා හා එම ක්‍රීඩක ක්‍රීඩිකාවන් වෛද්‍යමය ලෙස අයත් වන්නේ කුමන ආබාධිත තත්වයේ වර්ගීකරණයටද යන්න මෙවැනි ජාත්‍යන්තර තරගාවලියකදී නිර්ණය වන බැවින්ය.

ශ්‍රී ලංකාව ගත්කළ පැරා ක්‍රීඩා ඉසව්වලදී පසුගිය කාලයේ ආසියානු මට්ටමෙන් පමණක් නොව ලෝක මට්ටමෙන්ද ජයග්‍රහණ අත්කරගත් රටකි.

දිනේෂ් ප්‍රියන්ත හේරත් 2021 ජපානයේ පැවති පැරාඔලිම්පික් ක්‍රීඩා උළෙලේ දී හෙල්ල වීසිකිරීමේ ඉසව්වෙන් රන් පදක්කම දිනාගෙන ඇති අතර එම ක්‍රීඩා උළෙලේදීම කේඒ සමිත දුලාන් හෙල්ල වීසිකිරීම ඉසව්වෙන් ලෝකඩ පදක්කමක් දිනා ගෙන ඇත. එමෙන්ම 2023 දී පැරීසියේ පැවති ලෝක පැරා මලල ක්‍රීඩා උළෙලේදී දිනේෂ් ප්‍රියන්ත හේරත් හෙල්ල වීසිකිරීමෙන් ලෝකඩ පදක්කමක්ද, කේඒ සමිත දුලාන් හෙල්ල වීසිකිරීමෙන් ලෝකඩ පදක්කමක්ද දිනා ගෙන ඇත.

2022 දී බි්‍රතාන්‍යයේ පැවති පොදුරාජ්‍ය මණ්ඩලීය පැරා ක්‍රීඩා උළෙලේදී පාලිත බණ්ඩාර කවපෙත්ත වීසිකිරීමේ ඉසව්වෙන් රිදී පදක්කමක් දිනා ගෙන ඇත.

2023 චීනයේ පැවති ආසියානු පැරා ක්‍රීඩා උළෙලේදී නුවන් ඉන්දික මීටර් 100 ඉසව්වෙන් රන් පදක්කමක් හා දුර පැනීමේ ඉසව්වෙන් රිදී පදක්කමක් දිනාගෙන ඇති අතර ප්‍රදීප් සෝමසිරි මීටර් 1500 ඉසව්වෙන් රන් පදක්කමක් දිනා ගෙන ඇත. ඊට අමතරව අනිල් ප්‍රසන්න මීටර 100, ධනනී දනංජනා දුර පැනීම, කේඒ සමිත් දුලාන් හෙල්ල වීසිකිරීම, ගැලිනා බස්නායක පිහිණුම් මීටර 400 නිදහස් ආර යන ඉසව්වලින් රිදී පදක්කම් දිනා ගැනීමට සමත් වී තිබේ.

සමන් සුබසිංහ මීටර් 400, කුමුදු ප්‍රියංකා දුර පැනීම, පාලිත බණ්ඩාර යගලිය වීසිකිරීම හා නවීඩ් රහීම් පිහිණුම් මිටර් 400 නිදහස් ආර ඉසව්වෙන් ලෝකඩ පදක්කම් දිනා ගැනීමට සමත් වී ඇත.

2023 දී ඊජිප්තුවේ පැවති ආසියානු පැරා ක්‍රීඩා උළෙලේදී දිනේෂ් දේශප්‍රිය ටේබල් ටෙනිස්වලින් රන් පදක්කමක්, 2022 තායිලන්තයේ පැවති විවෘත පැරා ක්‍රීඩා උළෙලේදී සම්පත් බණ්ඩාර හා ජගත් වීරතුංග යුගල දුනු විදීමේ ඉසව්වෙන් රිදී පදක්කමක් දිනාගෙන ඇත.

මීට අමතරව ජාත්‍යාන්තර මට්ටමේ පැරා ග්‍රෑන්ඩ්ප්‍රික්ස් තරගවලදී, විදේශ රටවල තරගවලදී මෙන්ම ආසියානු යොවුන් පැරා තරගවලදී ශ්‍රී ලංකාව නියෝජනය කළ ක්‍රීඩක ක්‍රීඩිකාවන් රන්, රිදී හා ලෝකඩ පදක්කම් දිනාගෙන තිබේ. දිනේෂ් ප්‍රියන්ත හේරත් හා සමිත දුලාන් යන ක්‍රීඩකයන් දෙදෙනා සතුව ඔවුන් නියෝජනය කරනු ලබන හෙල්ල වීසිකිරීමේ ඉසව්වේ වර්ගීකරණවල ලෝක වාර්තා තවමත් පවතී.

එහෙත් මේ කිසිදු ක්‍රීඩක ක්‍රීඩිකාවකට රටක් ලෙස අප මෙතෙක් නිසි ගෞරවය හා ඇගැයීම ලබාදී තිබේද යන්න ප්‍රශ්නාර්ථයකි. සාමාන්‍ය ක්‍රීඩාවල ලෝක, ජාත්‍යාන්තර හා ආසියානු මට්ටමේ ජයග්‍රහණවලට වාර්ෂිකව මූල්‍යමය වශයෙන් තෑගි පිරිනමමින් අප කටයුතු කළද පැරා ක්‍රීඩා දෙස අප ඇසක් හැර හෝ බලා නැත. ඒ වෙනුවට සිදුකර ඇත්තේ හා සිදුකරමින් පවතින්නේ ‘පැරා ක්‍රීඩා’ ක්‍රීඩාද යනුවෙන් ප්‍රශ්න කරමින් එය රටට බරක් ලෙස සැලකීමය. ඒ වෙනුවට එම ගෞරවය හා ඇගැයීම පැරා ක්‍රීඩක ක්‍රීඩිකාවන්ට ප්‍රමාද වී හෝ මෙම ආණ්ඩුව යටතේ හෝ ලබාදීම ශ්‍රී ලංකාව ජාත්‍යන්තර තලයේ රැන්දූ එම ක්‍රීඩක ක්‍රීඩිකාවන් වෙනුවෙන් කරන යුතුකමකි.

ජනාධිපතිවරයාගේ 2026 අයවැය කථාවේ ‘ආබාධ සහිත ප්‍රජාව සඳහා සහාය දැක්වීම’ යනුවෙන් විශේෂ මාතෘකාවක් යටතේ සඳහන් කර තිබුණි. එහිදී ජනාධිපතිවරයා සඳහන් කර තිබුණේ ‘රට පුරා විසිරී සිටින මිලියන 1.6ක් පමණ වූ ආබාධ සහිත ප්‍රජාව, රටේ සමස්ත ජනගහනයෙන් සියයට 7ක් වැනි ප්‍රමාණයක් නියෝජනය කරනවා. එම ප්‍රජාවගේ අයිතීන් සුරක්ෂිත කිරීමේ ජාතික සම්මුතිය පිළිගත් රටක් වශයෙන්, එම ප්‍රජාවගේ සියලු අයිතිවාසිකම් ආරක්ෂා කිරීමේ වගකීම රජයට පැවරී තිබෙනවා.’ යන්නය.

ජනාධිපතිවරයා ඔහුගේ 2025 අයවැය කථාවේදී ද ආබාධ සහිත පුද්ගලයන් සම්බන්ධයෙන් කටයුතු කිරීමට දත්ත පද්ධතියක අවශ්‍යතාව ගැන කීවේය.

එමෙන්ම ක්‍රීඩා පාසල්වල ශිෂ්‍යත්වලාභීන්ට ලබාදෙන ශිෂ්‍යධාර වැඩි කිරීම ගැන කීවද යොවුන් ආසියානු මට්ටම පවා නියෝජනය කරන පාසල්වල සිටින ෆැරා ක්‍රීඩක ක්‍රීඩිකාවන් ගැන අමතක කර තිබුණි.

එහෙත් ජනාධිපතිවරයාගේ පොහොසත් රටක් ලස්සන ජීවිතයක් නම් වූ ජනාධිපතිවරණ ප්‍රතිපත්ති ප්‍රකාශයේ ජවසම්පන්න පුරවැසියෙක්, ජයග්‍රාහි ජනතාවක් මාතෘකාවේ ක්‍රියාමාර්ග යටතේ සඳහන් කරන්නේ ‘ක්‍රීඩාවට දක්ෂකම් ඇති ආබාධ සහිත පුද්ගලයින්ට පළපුරුදු පුහුණුකරුවන් යොදා පුහුණු කර ජාත්‍යන්තර තරග සඳහා යොමු කරන බවයි.

ඊට අමතරව එහි ‘ආරක්ෂිත සමාජයක්, සුපෝෂිත ජාතියක්’ ක්‍රියාමාර්ග යටතේ සඳහන් කරන්නේ ආබාධ සහිත පුද්ගලයින්ට අධ්‍යාපනය, පුහුණුව, රැකියා සහ ජීවනෝපාය අවස්ථා සඳහා පහසුකම් සපයන බවයි.

එහෙත් වත්මන් ක්‍රීඩා බලධාරීන් ජනාධිපතිවරයාගේ එම ප්‍රතිපත්ති ප්‍රකාශයේ පොරොන්දුවත් තේරුම් ගෙන ඇති බවක් පැරා ක්‍රීඩක ක්‍රීඩක ක්‍රීඩිකාවන් සම්බන්ධයෙන් අනුගමනය කරමින් තිබෙන මෙම තත්වය අනුව පෙන්නුම් කරන්නේ නැත.