No menu items!
26.4 C
Sri Lanka
18 November,2026

ශෂීගේ අවුරුදු දෙකේ සිරදඬුවම… ශ්‍රේෂ්ඨාධිකරණය තහවුරු කරයි

Must read

අවිධිමත් විදේශ ගමන් බලපත්‍රයක් සන්තකයේ තබා ගැනීමේ චෝදනාවට වැරදිකාරිය වූ ශෂී වීරවංශ මහත්මියට කොළඹ මහේස්ත්‍රාත් අධිකරණය විසින් නියම කරනු ලැබ තිබුණු වසර දෙකක සිරදඬුවම ශ්‍රේෂ්ඨාධිකරණය නොවැම්බර් 18දා (අද) තහවුරු කළේය.

සිරදඬුවමට එරෙහිව වීරවංශ මහත්මිය ඉදිරිපත් කර තිබූ අභියාචනය ප්‍රතික්ෂේප කරමින් අගවිනිසුරු ප්‍රීති පද්මන් සූරසේන ප්‍රමුඛ ත්‍රිපුද්ගල විනිසුරු මඬුල්ල මෙම නියෝගය ලබාදුන්නේය.

විවෘත අධිකරණයේ පෙනීසිටි ශෂි වීරවංශ මහත්මිය රිමාන්ඩ් භාරයට පත්කරන ලෙස නියම කළ අගවිනිසුරු ප්‍රීති පද්මන් සූරසේන ප්‍රමුඛ ත්‍රිපුද්ගල විනිසුරු මඬුල්ල වසර දෙකක සිරදඬුවම ක්‍රියාත්මක කිරීම සඳහා කොළඹ මහේස්ත්‍රාත් අධිකරණයට ඇය ඉදිරිපත් කරන ලෙසද නියම කළේය.

ව්‍යාජ උප්පැන්න සහතිකයක් සහ ව්‍යාජ ජාතික හැඳුනුම්පතක් ඉදිරිපත් කරමින්, උපන් දිනය සහ නම වෙනස් කර අවිධිමත් ලෙස සාමාන්‍ය විදේශ ගමන් බලපත්‍රයක් සහ රාජ්‍යතාන්ත්‍රික විදේශ ගමන් බලපත්‍රයක් ලබා ගැනීම සහ ඒවා සන්තකයේ තබා ගැනීම යන චෝදනා වීරවංශ මහත්මියට එරෙහිව එල්ල වී තිබිණ.

ඒ, 1948 අංක 20 දරන ආගමන හා විගමන පනතේ 45(1)(අ) සහ 45(1)(ආ) වගන්ති යටතේය.

2015 යහපාලන ආණ්ඩුව බලයට පත්වීමත් සමඟ, ශෂී වීරවංශ මහත්මිය ව්‍යාජ තොරතුරු ඉදිරිපත් කර විදේශ ගමන් බලපත්‍ර ලබාගෙන ඇති බවට අපරාධ පරීක්ෂණ දෙපාර්තමේන්තුවට පැමිණිල්ලක් ලැබුණි. ඒ අනුව, ආගමන හා විගමන දෙපාර්තමේන්තුවේ සහ පුද්ගලයන් ලියාපදිංචි කිරීමේ දෙපාර්තමේන්තුවේ ලේඛන පරීක්ෂා කරමින් විමර්ශන ආරම්භ කෙරිණි.
2015 පෙබරවාරි 22දා අසනීප තත්ත්වයක් හේතුවෙන් මාලබේ පෞද්ගලික රෝහලක ප්‍රතිකාර ලබමින් සිටියදී, අපරාධ පරීක්ෂණ දෙපාර්තමේන්තුව විසින් ඇය අත්අඩංගුවට ගන්නා ලද්දීය. පසුව කඩුවෙල මහේස්ත්‍රාත් අධිකරණයට ඉදිරිපත් කිරීමෙන් අනතුරුව ඇය රක්ෂිත බන්ධනාගාරගත කෙරුණි.

2015 මාර්තු 04 කොළඹ ප්‍රධාන මහේස්ත්‍රාත් අධිකරණය විසින් ඇයට ඇප නියම කරන ලදි. රුපියල් 15,000ක මුදල් ඇපයක් සහ රුපියල් ලක්ෂ 5 බැගින් වූ ශරීර ඇප දෙකක් මත ඇය මුදා හැරීමට අධිකරණය නියෝග කළේය.

අපරාධ පරීක්ෂණ දෙපාර්තමේන්තුව සිදුකළ විමර්ශනවල වාර්තා නීතිපතිවරයා වෙත යොමු කිරීමෙන් පසු, ආගමන හා විගමන පනත උල්ලංඝනය කිරීම යටතේ කොළඹ ප්‍රධාන මහේස්ත්‍රාත් අධිකරණය හමුවේ ඇයට එරෙහිව චෝදනා පත්‍ර ගොනු කරන ලදි. මෙහිදී ‘ශිරාන්ති උදයන්ති රණසිංහ’ සහ ‘ශෂී වීරවංශ’ යන නම් දෙකෙන්ම ලේඛන සකස් කර ඇති බවට පැමිණිල්ල විසින් කරුණු ඉදිරිපත් කෙරුණි.

කොළඹ ප්‍රධාන මහේස්ත්‍රාත් අධිකරණය හමුවේ නඩු විභාගය වසර කිහිපයක් පුරා පැවැත්වුණු අතර, ආගමන හා විගමන දෙපාර්තමේන්තුවේ නිලධාරීන්, පුද්ගලයන් ලියාපදිංචි කිරීමේ දෙපාර්තමේන්තුවේ නිලධාරීන් සහ රජයේ රස පරීක්ෂක දෙපාර්තමේන්තුවේ නිලධාරීන් ඇතුළු සාක්ෂිකරුවන් රැසකගේ සාක්ෂි එහිදී සටහන් කර ගැනුණි.

2022 මැයි 27දා දීර්ඝ නඩු විභාගයකින් අනතුරුව, කොළඹ ප්‍රධාන මහේස්ත්‍රාත් බුද්ධික ශ්‍රී රාගල ශෂී වීරවංශ මහත්මිය අදාළ චෝදනාවලට වරදකරු බවට තීන්දු කළේය. ඒ අනුව ඇයට වසර 2ක බරපතළ වැඩ සහිත සිරදඬුවමක් සහ රුපියල් 100,000ක දඩයක් නියම කෙරුණි. දඩ මුදල නොගෙවන්නේ නම් අමතර මාස 6ක සිරදඬුවමක් ද නියම විය.

2022 මැයි 31දා මහේස්ත්‍රාත් අධිකරණයේ තීන්දුවට එරෙහිව ශෂී වීරවංශ මහත්මියගේ නීතිඥවරුන් විසින් කොළඹ මහාධිකරණය වෙත අභියාචනයක් ඉදිරිපත් කරන ලදි. එම අභියාචනය මත මහේස්ත්‍රාත් අධිකරණය, අභියාචනා විභාගය අවසන් වන තෙක් ඇය ඇප මත මුදා හැරීමට නියෝග කළේය.

පැමිණිල්ලට අනුව, සැබෑ උපන් දිනය (1967) වසන් කර, 1971 වසරේ උපන් බවට ව්‍යාජ ලේඛන සකස් කරමින් රජයේ නිලධාරීන් නොමඟ යවා රාජ්‍යතාන්ත්‍රික ගමන් බලපත්‍රයක් ඇය ලබාගෙන තිබිණි.

එහෙත් විත්තියේ කරුණු දැක්වීම වුණේ, අදාළ ලේඛන සකස් කිරීමේදී හිතාමතා වංචාවක් කිරීමේ චේතනාවක් නොතිබූ බවත්, පරිපාලනමය දෝෂ හේතුවෙන් මෙම තත්ත්වය ඇති වූ බවත්ය.

කොළඹ මහේස්ත්‍රාත් අධිකරණය ලබා දී තිබූ වසර 2ක සිරදඬුවම සහ දඩ මුදල අභියෝගයට ලක් කරමින් ඉදිරිපත් කරන ලද වීරවංශ මහත්මියගේ අභියාචනය 2026 ජුනි මස 11 වන දින කොළඹ මහාධිකරණය විසින් ප්‍රතික්ෂේප කරන ලදි. ඇයට නියම කරනු ලැබ තිබුණු සිරදඬුවම සහ දඩයද ඒ අනුව තහවුරු කෙරිණි.

2026 ජුනි 25දා කොළඹ මහාධිකරණය මුල් අභියාචනය ප්‍රතික්ෂේප කරමින් වසර 2ක සිරදඬුවම ස්ථිර කිරීමට එරෙහිව, ශෂී වීරවංශ මහත්මියගේ නීතිඥවරුන් විසින් ශ්‍රේෂ්ඨාධිකරණය හමුවේ විශේෂ අභියාචනා අයැදුම්පතක් ගොනු කරන ලදි.
අභියාචනා පෙත්සම සලකා බැලූ ශ්‍රේෂ්ඨාධිකරණ ත්‍රිපුද්ගල විනිසුරු මඬුල්ල, මහේස්ත්‍රාත් අධිකරණය සහ මහාධිකරණය විසින් ලබා දී ඇති තීන්දුවලට මැදිහත් වීමට තරම් නීතිමය පදනමක් නොමැති බව තීරණය කළේය. ඒ අනුව ඇගේ අභියාචනය ශ්‍රේෂ්ඨාධිකරණය විසින් ප්‍රතික්ෂේප කරන ලදි.

- Advertisement -spot_img

පුවත්

LEAVE A REPLY

Please enter your comment!
Please enter your name here

- Advertisement -spot_img

අලුත් ලිපි