No menu items!
27.5 C
Sri Lanka
18 November,2026

‘මට පණපිටින් ආපහු එන්න බැරිවෙයි’ ඉම්රාන් ඛාන් අගවිනිසුරුට ලිපියක් යවමින් ඉක්මන් වෛද්‍ය ආධාර ඉල්ලයි

Must read

  • තිවංක සපරමාදු

සිරගතව සිටින පාකිස්තාන හිටපු අග්‍රාමාත්‍ය ඉම්රාන් ඛාන් එරට ශ්‍රේෂ්ඨාධිකරණයෙන් කඩිනම් වෛද්‍ය ප්‍රතිකාර ඉල්ලා ආයාචනා කරමින් තමාගේත් තම බිරිඳගේත් සෞඛ්‍ය තත්ත්වය පිරිහෙමින් පවතින බවත්, තමාට පණපිටින් ආපසු පැමිණීමට නොහැකි වනු ඇති බවත් ප්‍රකාශ කළ බව රොයිටර් පුවත් සේවය වාර්තා කරයි. ඒ නොවැම්බර් 16දාය.

තම නීතිඥවරයා හරහා අගවිනිසුරුවරයා වෙත යවන ලද ලිපියක ඛාන් සඳහන් කර ඇත්තේ, තමාට මොළයේ රුධිර වහනයක් සහ හෘදයාබාධයක් ඇතිවීමේ දැඩි අවදානමක් ඇති බව වෛද්‍යවරුන් පැවසූ බවයි.

හිටපු ක්‍රිකට් ක්‍රීඩකයෙකු ද වන ඔහු වැඩිදුරටත් සඳහන් කළේ, දැනට බන්ධනාගාරගතව සිටින තම බිරිඳ වන බුෂ්රා බිබීගේ පෙනීම සදාකාලිකවම අහිමි වීමේ අවදානමක් පවතින බැවින් තමා මෙම ලිපිය ලියන බවයි.

“‍හැත්තෑ හතර හැවිරිදි වියේ පසුවන මා, මෙම නොනවතින පීඩාකාරී තත්ත්වය විසින් පණපිටින් ආපසු පැමිණිය නොහැකි තැනකට ගෙනයමින් තිබෙනවා” යැයි ඛාන් සිය ලිපියේ සඳහන් කර ඇත.

දීර්ඝ කාලයක් හුදකලා සිරමැදිරියක රඳවා තැබීම තම මානසික සෞඛ්‍යයට දැඩි ලෙස බලපා ඇති බව ඛාන් කියයි. තම පවුලේ අය සමඟ වැඩි වශයෙන් සම්බන්ධ වීමට ඉඩ දෙන ලෙස වෛද්‍ය මණ්ඩලයක් කළ නිර්දේශය බලධාරීන් විසින් අනුගමනය නොකරන බවටද ඔහු චෝදනා කරයි.

“මම මේ ලිපිය ලියන්නේ හිටපු අගමැතිවරයෙකු ලෙසවත්, දේශපාලන පක්ෂයක නායකයෙකු ලෙසවත් නොවෙයි; මම මගේ ජීවිතය පාකිස්තානය වෙනුවෙන් කැප කළ කෙනෙක්. මම ක්‍රිකට් පිටියේදීත්, සමාජ සේවයේදී සහ පරෝපකාර කටයුතුවලදීත්, එහි 22 වැනි අග්‍රාමාත්‍යවරයා ලෙසත් මේ ජාතියට සේවය කළා.

වසර හැත්තෑවක් පුරාවට මගේ නමට විරුද්ධව එකුදු අපරාධ නඩුවක්වත් තිබුණේ නැහැ. නමුත් වයස අවුරුදු හැත්තෑවෙන් පසු, පෙර නොවූ විරූ සහ අනුකම්පා විරහිත දේශපාලන පළිගැනීමේ ව්‍යාපාරයක් ආරම්භ වුණා: ගණන් කළ නොහැකි නඩු පැවරීම්, සිය වතාවකට වඩා අධිකරණය හමුවේ පෙනීසිටීම්, නැවත නැවතත් අත්අඩංගුවට ගැනීමට පෙර ඇප ඉල්ලීම් සහ අල්ලාහ්ගේ පිහිටෙන් මා දිවි ගලවා ගත් ඝාතන තැතක් ඊට ඇතුළත්.

මේ සියල්ල හමුවේ මම තෝරා ගත්තේ නීතියේ මාර්ගයයි. දේශපාලනික වශයෙන් මෙහෙයවනු ලබන මෙම සෑම නඩුවකටම අධිකරණය තුළ සටන් කිරීමට මම තීරණය කළ අතර, කිසි විටෙකත් එය නතර කළේ නැහැ”‍ ඉම්රාන් ඛාන් සිය ලිපියේ සඳහන් කර තිබේ.

තමාට ඇති එකම මානව සම්බන්ධතාව වන තම බිරිඳ සමඟ පැවැත්වෙන සතිපතා හමුව, කිසිදු හේතුවක් හෝ පැහැදිලි කිරීමකින් තොරව බන්ධනාගාර බලධාරීන් විසින් සතියෙන් සතිය මඟ හරින බවද ඛාන් වැඩිදුරටත් පවසයි.

“‍මම ගණන් කළ නොහැකි නඩු ගණනාවකදී කළ නොහැකි මට්ටමේ නීතිමය සටන් කර තිබෙනවා, මම තවමත් නතර වී නැහැ. නමුත් පද්ධතිය මට යුක්තිය ඉටු කිරීම නතර කර තිබෙනවා. බන්ධනාගාර අත්පොත, බන්ධනාගාර නීතිරීති සහ මගේ ව්‍යවස්ථාපිත අයිතිවාසිකම් නිර්ලජ්ජිතව සහ ප්‍රසිද්ධියේ උල්ලංඝනය වෙමින් පවතින අතර, ගරු අධිකරණවල නියෝග පවා ක්‍රියාත්මක නොවී පවතිනවා. ප්‍රතිකාර ලබාගැනීමට වත්කමක් නොමැති අයට නොමිලේ ප්‍රතිකාර ලබා ගැනීම සඳහා රෝහල් ඉදිකිරීමට මම මගේ ජීවිතය කැප කළා. අද මම ඉල්ලා සිටින්නේ මටත් මගේ බිරිඳටත් ප්‍රතිකාර ලබා දෙන ලෙස පමණයි.”‍
පසුගිය සතියේ අක්ෂි පරීක්ෂණයක් සඳහා ඛාන් රෝහලට රැගෙන ගොස් නැවත ඔහුගේ සිරමැදිරියට ගෙන ආ බව බලධාරීහු පැවසූහ.

2018 සිට 2022 දක්වා පාකිස්තාන රජයට නායකත්වය දුන් ඉම්රාන් ඛාන්, දූෂණ, ප්‍රචණ්ඩත්වය ඇවිස්සීම සහ රාජද්‍රෝහී වීම ඇතුළු චෝදනා මත වසර 10, 14 සහ 17 බැගින් වූ සිර දඬුවම් කිහිපයක් විඳිමින් සිටියි. ඔහු සහ ඔහුගේ ආධාරකරුවන් මෙම නඩු හඳුන්වන්නේ දේශපාලනික වශයෙන් මෙහෙයවන ලද ඒවා ලෙසයි.

2024 පාකිස්තාන මහ මැතිවරණයට පෙර, ඔහුගේ විවාහයට අදාළව තවත් වසර හතක සිර දඬුවමක් ඔහුට නියම විය. එම තීන්දුව දැඩි විවේචනයට ලක් වූ අතර පසුව එය අවලංගු කරන ලදි.

මේ වන විට, අභියාචනා විභාග වෙමින් පවතින අතරතුර, එක් වරදකරු කිරීමක් හැර ඛාන්ගේ අනෙකුත් සියලු‍ම සිරදඬුවම් අත්හිටුවා හෝ අවලංගු කර ඇත. තමා කිසිදු වරදක් නොකළ බව පවසන ඉම්රාන් ඛාන්, මෙම චෝදනා දේශපාලනික අරමුණු මත පදනම් වූ ඒවා බව ප්‍රකාශ කර ඇති නමුත්, රජය එම චෝදනාව ප්‍රතික්ෂේප කරයි.

මීට පෙර, කපිල් දේව් සහ සුනිල් ගවස්කාර් ඇතුළු ජාත්‍යන්තර ක්‍රිකට් නායකයින් 14 දෙනෙකුද ඛාන්ගේ සෞඛ්‍ය තත්ත්වය පිළිබඳව දැඩි කනස්සල්ල පළ කර තිබුණි. විවෘත ලිපියක් මගින් ඔවුන් පාකිස්තාන රජයෙන් ඉල්ලා සිටියේ, ඛාන්ට සුදුසුකම් ලත් විශේෂඥ වෛද්‍යවරුන්ගෙන් ක්ෂණික, ප්‍රමාණවත් සහ අඛණ්ඩ වෛද්‍ය ප්‍රතිකාර ලබාදෙන ලෙසත්, ‍ජාත්‍යන්තර ප්‍රමිතීන්ට අනුකූලව මානුෂීය සහ ගෞරවනීය රැඳවුම් තත්ත්වයන් සහතික කරන ලෙසත්ය.

තවත් ආයාචනයකදී, ඕස්ට්‍රේලියානු විදේශ කටයුතු අමාත්‍ය පෙනී වොන්ග් වෙත ලිපියක් යවමින් එරට හිටපු ක්‍රිකට් නායකයින් හත් දෙනෙකු ඛාන් තවදුරටත් රඳවා තබා ගැනීම සම්බන්ධයෙන් මානුෂීය ගැටලු‍ මතු කර තිබුණි.

- Advertisement -spot_img

පුවත්

LEAVE A REPLY

Please enter your comment!
Please enter your name here

- Advertisement -spot_img

අලුත් ලිපි