2008 වසරේදී මඩකලපුව ප්‍රදේශයේදී ටී-56 ගිනි අවියක් භාවිත කරමින් පුද්ගලයන් පස්දෙනෙකු වෙඩි තබා ඝාතනය කිරීමේ සිද්ධීන් සම්බන්ධයෙන් අත්අඩංගුවට ගෙන සිටින හිටපු රාජ්‍ය අමාත්‍ය සිවනේසතුරෙයි චන්ද්‍රකාන්තන් හෙවත් පිල්ලෙයාන් සහ හමුදා බුද්ධි අංශ තොරතුරු සපයන්නන් දෙදෙනෙකු ලබන නොවැම්බර් 23 වැනිදා දක්වා තවදුරටත් රක්ෂිත බන්ධනාගාරගත කිරීමට මඩකලපුව මහේස්ත්‍රාත්වරයා අද (10) නියෝග කර තිබේ.
අද විවෘත අධිකරණයේදී නඩුව කැඳවූ අවස්ථාවේදී රක්ෂිත බන්ධනාගාරගත කර සිටින හමුදා බුද්ධි අංශ තොරතුරු සපයන්නන් වන මොහොමඩ් සිෆාන් සහ මොහොමඩ් සකීඩ් යන දෙදෙනා අධිකරණයට පෞද්ගලිකව ඉදිරිපත් කර ඇති අතර, පිල්ලෙයාන් වීඩියෝ තාක්ෂණය ඔස්සේ අධිකරණයට ඉදිරිපත් කර තිබේ. ඉන් අනතුරුව සැකකරුවන් තිදෙනාම නොවැම්බර් 23 වැනිදා දක්වා තවදුරටත් රක්ෂිත බන්ධනාගාරගත කිරීමට මහේස්ත්‍රාත්වරයා නියෝග කර ඇත.
මෙම විමර්ශනයට අදාළ සිද්ධීන් අතරට කල්ලඩි ප්‍රදේශයේදී පොලිස් නිලධාරියෙකු ඇතුළු දෙදෙනෙකු වෙඩි තබා ඝාතනය කිරීම, කාත්තන්කුඩි ප්‍රදේශයේදී දෙමළ මක්කල් විඩුතලෙයි පුලිගල් (TMVP) පක්ෂ සාමාජිකයෙකු ඇතුළු දෙදෙනෙකු වෙඩි තබා ඝාතනය කිරීම සහ වවුනතිව්, කරයියක්කන්තිව් ප්‍රදේශයේදී ව්‍යාපාරිකයෙකු පැහැරගෙන ගොස් ඝාතනය කිරීම ඇතුළත් වේ. මෙම සිද්ධීන් 2008 වසරේදී සිදුවූ ඒවා බව වාර්තා වේ.
මේ අතර ලන්ඩනයේ සැඟව සිටින බව කියන ‘පොලිස් ෆයිස්’ හෙවත් රාසික් මොහොමඩ් ෆයිස්ට එරෙහිව මීට පෙර නිකුත් කර තිබූ විවෘත වරෙන්තුව තවදුරටත් ක්‍රියාත්මක කරන ලෙස ද මහේස්ත්‍රාත්වරයා නියෝග කර තිබේ.
