ඉල්ලීම් කිහිපයක් මුල් කරගනිමින් ඉන්ධන බෙදුම්කරුවන්ගේ සංගමය අද (10) පෙරවරුවේ කොළඹ ලෝක වෙළෙඳ මධ්‍යස්ථානය ඉදිරිපිට නිහඬ විරෝධතාවක් පවත්වා තිබේ.
පෞද්ගලික සමාගම්වලට අයත් ඉන්ධන පිරවුම්හල් වෙත අඛණ්ඩව ඉන්ධන සැපයීම සහතික කරන ලෙස විරෝධතාවයේ නිරත වූ බෙදුම්කරුවෝ ඉල්ලා ඇති අතර ඉන්ධන බෙදාහැරීම වෙනුවෙන් ඔවුන්ට ලබාදෙන කොමිස් මුදල සියයට 3.6 සිට සියයට 1.5 දක්වා අඩු කිරීමට ගෙන ඇති තීරණයට ද ඔවුහු විරෝධය පළ කර ඇත.
ඉන්ධන මිල සූත්‍රය නියාමනය කිරීම සඳහා සුදුසුකම් සහිත බලධාරියෙකු පත් කරන ලෙස ද විරෝධතාකරුවෝ ඉල්ලා ඇති අතර පෞද්ගලික සමාගම් තුනක් නියෝජනය කරන ඉන්ධන බෙදුම්කරුවන්ගේ සංගමයේ සාමාජිකයන්ගේ සහභාගිත්වයෙන් මෙම නිහඬ විරෝධතාව සංවිධානය කර තිබිණි.
