ගලගොඩඅත්තේ ඥානසාර හිමියන්ට නැවත සිවුරු පැළඳවීමේ උත්සවය පැවැත්වීම සඳහා දිනයක් සහ වේලාවක් ලබාදෙන ලෙස කෝට්ටේ ශ්‍රී කල්‍යාණි සාමග්‍රී ධර්ම මහා සංඝ සභාවේ මහ නායක ආචාර්ය ඉත්තෑපාන ධම්මාලංකාර හිමියෝ බන්ධනාගාර කොමසාරිස් ජනරාල්වරයාගෙන් ඉල්ලීමක් කර තිබේ.
2026 ඔක්තෝබර් 30 වැනිදා බන්ධනාගාර කොමසාරිස් ජනරාල්වරයා වෙත යොමු කළ ලිපියකින් මහ නාහිමියන් ඉල්ලා ඇත්තේ ධර්ම විනයට අනුකූලව එම සිවුරු පැළඳවීමේ උත්සවය පැවැත්වීමට අවශ්‍ය කටයුතු සලසන ලෙසත් ඒ සඳහා හැකි ඉක්මනින් සුදුසු දිනයක් සහ වේලාවක් ලබාදෙන ලෙසත් එම ලිපියෙන් ඉල්ලා ඇත.
එම අවස්ථාවට තමන් ඇතුළු කෝට්ටේ පාර්ශ්වයේ සංඝ සභාවේ සාමාජික හිමිවරුන් දස නමකගෙන් සමන්විත පිරිසක් බන්ධනාගාරයට පැමිණීමට නියමිත බවත් එම පිරිසට බන්ධනාගාරයට පැමිණීම සඳහා අවශ්‍ය පහසුකම් සලසා, උත්සවය පැවැත්වීමට නියමිත දිනය සහ වේලාව තමන්ට දැනුම් දෙන ලෙස ද ඒ හිමියන් ලිපියෙන් ඉල්ලා ඇත. අදාළ ලිපියේ පිටපතක් වැලිකඩ බන්ධනාගාර අධිකාරීවරයා වෙත ද යොමු කර තිබේ.
