හෝමාගම පොලිස් ස්ථානයේ සිර මැදිරිය තුළ සිටියදී පුද්ගලයෙකු මියයෑමේ සිද්ධිය සම්බන්ධයෙන් විමර්ශනයක් සිදුකරන ශ්‍රී ලංකා මානව හිමිකම් කොමිෂන් සභාව, හෝමාගම පොලිස් ස්ථානාධිපතිවරයා ඇතුළු පොලිස් නිලධාරීන් තිදෙනෙකුට හෙට (29) දින කොමිසම හමුවේ පෙනී සිටින ලෙස දැනුම් දී තිබේ.
සිද්ධිය සම්බන්ධයෙන් සිදුකරන විමර්ශනයේ කොටසක් ලෙස අදාළ නිලධාරීන්ට මෙම කැඳවීම සිදුකර ඇති බව ශ්‍රී ලංකා මානව හිමිකම් කොමිෂන් සභාවේ කොමසාරිස්, නීතිඥ නිමල් ජී. පුංචිහේවා මහතා සඳහන් කර ඇත.
මියගිය පුද්ගලයාගේ මරණය සම්බන්ධයෙන් කරුණු අනාවරණය කර ගැනීම සඳහා ඔහුගේ පවුලේ සාමාජිකයන් කිහිපදෙනෙකුගෙන් ප්‍රකාශ සටහන් කර ගැනීමට ද කොමිසම පියවර ගෙන තිබේ.
පොලිස් අත්අඩංගුවේ සිටියදී සිදුවූ බව කියන මෙම මරණය සම්බන්ධයෙන් මානව හිමිකම් කොමිෂන් සභාවේ විමර්ශන තවදුරටත් ක්‍රියාත්මක වේ.
