සාලිය පීරිස් අධිකරණ ඇමතිට පිළිතුරු දෙයි
ආණ්ඩුව ඉදිරිපත් කර ඇති සංවිධානාත්මක අපරාධ වැළැක්වීමේ පනත යටතේ ශරීරයේ පච්චා කොටාගත් පුද්ගලයකු සැකපිට අත්අඩංගුවට ගෙන, මුලින් මාස දෙකකුත් පසුව අවුරුදු දෙකකුත් දක්වා රැඳවුම් භාරයේ තබාගත හැකියැයි ජනාධිපති නීතිඥ සාලිය පීරිස් පවසයි. ඔහු කියන්නේ මාස දෙකක් රඳවා තබාගැනීමට විනිසුරුවරයකුගේ අනුමැතියද අවශ්‍ය නැති බවයි.
‘අදාළ පුද්ගලයාගේ පච්චය හෝ ඇඳුම් පැළඳුම් සංවිධානාත්මක අපරාධ කල්ලිවලට අයත් එකක් බව පවසමින් පොලිසිය මෙම නීතිය යටතේ පුද්ගලයෙකු ඉදිරිපත් කළ විට, මහේස්ත්‍රාත්වරයාට ඔහුව රක්ෂිත බන්ධානාගාරගත කිරීමට සිදුවනු ඇතැ’යි ජනාධිපති නීතිඥවරයා තවදුරටත් පවසයි. ඔහු මේ බව කියන්නේ ඔක්තෝබර් 20 වැනිදා කළ ෆේස්බුක් සටහනකිනි.
පච්චා හෝ ඇඳුම් පැළඳුම් නිසා හෝ පුද්ගලයකු අත්අඩංගුවට ගෙන දීර්ඝ කාලයක් රඳවාගැනීමේ හැකියාව යෝජිත පනතේ ඇති බවට මීට පෙර සාලිය පිරිස් මහතා තැබූ ෆේස්බුක් සටහනට පිළිතුරු සපයමින්, අධිකරණ ඇමති හර්ෂණ නානායක්කාර 20 වැනිදා පාර්ලිමේන්තුවේදී පැවසුවේ මෙම පනත ගැන සාමාන්‍ය ජනතාව බියක් දැක්විය යුතු නැති බවයි.
ඇමතිවරයාගේ ප්‍රතිචාරයට පිළිතුරු ලෙස ජනාධිපති නීතිඥ සාලිය පීරිස් තැබූ සම්පූර්ණ ෆේස්බුක් සටහන මෙසේය.:
“යෝජිත ‘සංවිධානාත්මක අපරාධ පනත් කෙටුම්පතේ’ සඳහන් වන පච්ච (tattoos) සහ ඇඳුම් පැළඳුම් යනු ප්‍රසිද්ධ සංවිධානාත්මක අපරාධ කල්ලිවල සාමාජිකයින් විසින් භාවිත කරනු ලබන ඒවා පමණක් බවත්, සාමාන්‍ය ජනතාව ඒ ගැන බිය විය යුතු නැති බවත් අධිකරණ ඇමතිතුමා විසින් අද පාර්ලිමේන්තුවේදී ප්‍රකාශ කරනවා මට අසන්නට ලැබිණි.
මෙම පනත් කෙටුම්පත කිසිදු මහජන උපදේශන ක්‍රියාවලියක් ඔස්සේ සකස් කරන ලද්දක් නොවේ. මා දන්නා ආකාරයට මෙම පනත් කෙටුම්පත අධිකරණ අමාත්‍යාංශය විසින් සකස් කරන ලද කෙටුම්පතක් ද නොවේ.
මෙම යෝජිත නීතිය කොතරම් දුරදිග ගිය, පුළුල් (overbroad) එකක්ද යන්නත්, එය සාමාන්‍ය ජනතාව සඳහා ආරක්ෂක විධිවිධාන රහිතව සකස් කරන ලද්දක් බවත් අමාත්‍යවරයා නොදැන සිටීමට හේතුවක් නැත.
යම් කිසිවකු අත්අඩංගුවට ගන්නා අවස්ථාවේදී ඔවුන් සතු ටැටූ (පච්ච) හෝ ඇඳුම් පැළඳුම් අපරාධ කල්ලි විසින් භාවිත කරන ඒවාට සමානදැයි මුලින් තීරණය කරන්නේ කවුද? එම තීරණ ගනු ලබන්නේ මෙම යෝජිත නීතිය යටතේ අතිවිශාල බලතල පවරනු ලබන පොලිස් නිලධාරීන් විසින්ය. එම බලතල අතර විනිසුරුවරයෙකුගේ අනුමැතියකින් තොරව මාස දෙකක් දක්වාද, ඉන්පසු වසරක් දක්වාද පුද්ගලයෙකු රැඳවුම් නියෝග නිකුත් කිරීමේ බලය ඇතුළත් වේ. ඕනෑම නියෝජ්‍ය පොලිස්පතිවරයෙකුගේ හෝ පොලිස්පතිවරයාගේ ඉල්ලීම මත අමාත්‍යාංශ ලේකම්වරයා විසින් මෙම රැඳවුම් නියෝග නිකුත් කළ හැකිය.
රැඳවුම් නියෝගයක් නොමැති වුවද, මෙම නීතිය යටතේ අධිකරණයට ඉදිරිපත් කරනු ලබන පුද්ගලයෙකු සම්බන්ධයෙන් කිසිදු සාක්ෂියක් නොමැති වුවද, එම පුද්ගලයා අනිවාර්යයෙන්ම රක්ෂිත බන්ධානාගාරගත කිරීමට මහේස්ත්‍රාත්වරයාට සිදු වේ. අදාළ පුද්ගලයාගේ පච්චය හෝ ඇඳුම් පැළඳුම් සංවිධානාත්මක අපරාධ කල්ලිවලට අයත් එකක් බවත් පවසමින් පොලිසිය මෙම නීතිය යටතේ පුද්ගලයෙකු ඉදිරිපත් කළ විට, මහේස්ත්‍රාත්වරයාට ඔහුව රක්ෂිත බන්ධානාගාරගත කිරීමට සිදුවනු ඇත.
එවිට එම පුද්ගලයාට ඇප ලබාගත යුත්තේ මහාධිකරණයෙනි. සාමාන්‍ය ජනතාවට මහාධිකරණ වෙත යාම කොතරම් අපහසුදැයි අපි දනිමු.”
අධිකරණ අමාත්‍යවරයා අපරාධ නඩුවලට පෙනී සිටි නීතිඥවරයෙකු වන බැවින්, අධිකරණයක සාක්ෂි ලෙස පාපෝච්චාරණ පිළිගැනීමට ඉඩ සැලසීමේ ඇති අනතුරු සහ එය විසින් වධහිංසා පැමිණවීමේ හා අපයෝජනයේ සංස්කෘතියක් ප්‍රවර්ධනය කරන ආකාරය හොඳින් දනී.
ජනතා විමුක්ති පෙරමුණේ බොහෝ සාමාජිකයින් ත්‍රස්තවාදය වැළැක්වීමේ පනත සහ හදිසි නීති රෙගුලාසි යටතේ මෙම වධහිංසා පැමිණවීම්වලට, අපයෝජනවලට සහ දීර්ඝ කාලීන රඳවා තබා ගැනීම්වලට ගොදුරු වූවෝ වෙති.
මෙම නව පනත් කෙටුම්පත කාලීන අවශ්‍යතාවක් ලෙස සාධාරණීකරණය කිරීමට උත්සාහ කරන්නන් විසින්, විවිධ රජයන් යටතේ ත්‍රස්තවාදය වැළැක්වීමේ පනත, හදිසි නීති රෙගුලාසි සහ ICCPR පනත අයථා ලෙස භාවිත කර ඇති ආකාරයත්, එය ජනතාවට ඇති කළ අපමණ හානියත් දැකගත යුතුය.
මෙවැනි නීති අයථා ලෙස භාවිත කිරීම අත්දැක ඇති සහ එහි වින්දිතයන්ගේ තත්ත්වය නිරීක්ෂණය කොට ඇති අපට මෙහි ඇති සැබෑ අවදානම දකින්නට පුළුවන.
