දෙමළ සහ මුස්ලිම් දේශපාලන පක්ෂ හයක එකමුතුවේ නියෝජිතයන් සහ ජනාධිපති අනුර කුමාර දිසානායක මහතා අතර හමුවක් අගෝස්තු 03 වන දින පෙරවරුවේ ජනාධිපති කාර්යාලයේදී පැවැත්වුණු අතර නව ආණ්ඩුක්රම ව්යවස්ථාව, පළාත් සභා මැතිවරණය, උතුරු, නැගෙනහිර සහ මලෛයගම් ප්රදේශවල ඉඩම් ගැටලු ඇතුළු කරුණු රැසක් එහිදී සාකච්ඡා කර ඇත.
ජනාධිපති මාධ්ය අංශය නිකුත් කළ නිවේදනයකට අනුව පූර්ණ ආණ්ඩුක්රම ව්යවස්ථා සංශෝධනයක් ගෙන ඒම, පළාත් සභා මැතිවරණය පැවැත්වීමේදී පවතින ගැටලු සහ දෙමළ හා මලෛයගම් ජනතාව මුහුණ දෙන ඉඩම් ගැටලු පිළිබඳව එම පක්ෂ නියෝජිතයන් ජනාධිපතිවරයාගේ අවධානයට යොමු කළ බව සඳහන් කර ඇත.
පළාත් සභා මැතිවරණය සම්බන්ධයෙන් අදහස් දක්වමින් ජනාධිපතිවරයා සඳහන් කර ඇත්තේ ඒ පිළිබඳව පත්කර ඇති තේරීම්කාරක සභාව මතුව ඇති ගැටලු පිළිබඳ සියලු පාර්ශ්ව සමඟ සාකච්ඡා කර විසඳුම් සෙවීමට අපේක්ෂා කරන බවය.
තවද නව ආණ්ඩුක්රම ව්යවස්ථාව සම්බන්ධයෙන් අදහස් දක්වා ඇති ඉලංගෙයි තමිල් අරසු කච්චි මහලේකම් එම්.ඒ. සුමන්තිරන් මහතා පවසා ඇත්තේ එම න්රියාවලිය හදිසි ක්රියාවලියක් නොවිය යුතු අතර සියලු ජන කොටස්වල අදහස් ඇතුළත් පුළුල් සමාජ කතිකාවක් මත ගොඩනැගිය යුතු බවයි. 1972 සහ 1978 ව්යවස්ථා මෙන් එක් පාර්ශ්වයක් විසින් හඳුන්වා දෙන ව්යවස්ථාවක් නොවිය යුතු බවය.
ඒ පිළිබඳ ප්රතිචාර දක්වමින් ජනාධිපති අනුර කුමාර දිසානායක මහතා සඳහන් කර ඇත්තේ නව ආණ්ඩුක්රම ව්යවස්ථාවක් සම්පාදනය කිරීම සහ විධායක ජනාධිපති ක්රමය අහෝසි කිරීම රජයේ ප්රතිපත්තිය වන නමුත් කඩිමුඩියේ සංශෝධනයක් ගෙන ඒමට වඩා නව ජනතා සම්මුතියක් ගොඩනැගීම වැදගත් බවත් ඒ සඳහා පුළුල් ජාතික සංවාදයක් ආරම්භ කළ යුතු බවද ඔහු පෙන්වා දී ඇත.
මලෛයගම් ජනතාවගේ ජීවන තත්ත්වය නංවාලීම සඳහා වතු කම්කරුවන්ට සහ වතු කාර්ය මණ්ඩලයට පර්චස් 10ක ඉඩම් කැබැල්ලක නීත්යානුකූල අයිතිය ලබාදීමේ රජයේ යෝජනාව පිළිබඳවද සාකච්ඡා කර ඇති අතර දෙමළ ප්රගතිශීලී සන්ධානයේ වී. රාධක්රිෂ්ණන් මහතා එහිදි සඳහන් කර ඇත්තේ පෙර ආණ්ඩුවලට ඉටුකරගත නොහැකි වූ මෙම යෝජනාව වත්මන් රජය යටතේ ක්රියාත්මක වනු ඇතැයි බලාපොරොත්තු වන බවය.
ඊට ප්රතිචාර දක්වමින් ජනාධිපතිවරයා සඳහන් කර ඇත්තේ වතු සමාගම් සමඟ පවතින ගිවිසුම් අලුත් කිරීමේදී මලෛයගම් ජනතාවට ඉඩම් හිමිකම් ලබාදීම සම්බන්ධ විධිවිධාන ඇතුළත් කිරීමට රජය අපේක්ෂා කරන බවය.
ඉන්දියානු ආධාර යටතේ ක්රියාත්මක නිවාස ව්යාපෘතිවලින් නිවාස හිමිකම් ලැබූ පවුල් මුහුණ දෙන ජල, විදුලි බිල්පත් ඇතුළු ප්රායෝගික ගැටලු පිළිබඳව ලංකා කම්කරු කොංග්රසයේ නායක ජීවන් තොණ්ඩමන් මහතා කරුණු ඉදිරිපත් කර ඇති අතර ඒ සම්බන්ධයෙන් අදහස් දැක්වූ ජනාධිපතිවරයා පවසා ඇත්තේ 2027 අයවැයෙන් වැවිලි සහ ප්රජා යටිතල පහසුකම් අමාත්යාංශයට වැඩි ප්රතිපාදන වෙන් කිරීමට සැලසුම් කර ඇති බවය.
උතුරු සහ මධ්යම කඳුකරයේ ඉඩම් ගැටලු විසඳීම රජයේ ප්රමුඛතාවක් බවත් ජනතාවගේ ඉඩම් ජනතාවටම හිමිවිය යුතු බව රජයේ ස්ථාවරය වන බවත් ඒ සඳහා කොමිෂන් සභා පත් කිරීම ඇතුළු පියවර ගෙන ඇති බවත් ජනාධිපතිවරයා එහිදී සඳහන් කර ඇත.
තවද යුද්ධයෙන් නිවාස අහිමි වූ ජනතාව වෙනුවෙන් 2027 සහ 2028 අයවැය යටතේ අදියර දෙකකින් නිවාස 13,000ක් ඉදිකිරීමට ප්රතිපාදන වෙන් කරන බවත්, දිට්වා ආපදා තත්ත්වයෙන් නිවාස අහිමි වූ ජනතාව සඳහාද ස්ථිර සහ තාවකාලික නිවාස ඉදිකිරීම සහ කුලී දීමනා ලබාදීමේ වැඩපිළිවෙළ ක්රියාත්මක කර ඇති බවත් ජනාධිපතිවරයා පවසා ඇත.
මෙම සාකච්ඡාවේදී පළාත් සභා ඡන්ද ක්රමය, සීමා නිර්ණය, පුරාවිද්යා දෙපාර්තමේන්තුව, වන සංරක්ෂණ දෙපාර්තමේන්තුව සහ මහවැලි අධිකාරිය ඇතුළු ආයතනවල ප්රතිපත්ති හේතුවෙන් උතුරු හා නැගෙනහිර ජනතාව මුහුණ දෙන ගැටලු පිළිබඳවද මුස්ලිම් සහ දෙමළ පක්ෂ නියෝජිතයන් ජනාධිපතිවරයා දැනුවත් කර ඇත.
මෙම අවස්ථාවට සමස්ත ලංකා මහජන කොංග්රසය නියෝජනය කරමින් එහි සභාපති එම්.එස්.එස්. අමීර් අලී මහතා සහ පාර්ලිමේන්තු මන්ත්රීවරුන් වන එම්.ඒ.එම්. තාහීර් සහ එන්.පී.එම්.එම්. තාහීර් මහත්වරු ද, ලංකා කම්කරු කොංග්රසය නියෝජනය කරමින් පාර්ලිමේන්තු මන්ත්රී ජීවන් තොණ්ඩමන් මහතා ද, ප්රජාතන්ත්රවාදී දෙමළ ජාතික සන්ධානය නියෝජනය කරමින් සෙල්වම් අඩෛක්කලනාදන්, සුරේෂ් ප්රේමචන්ද්රන් සහ මුරුගේසු චන්ද්රකුමාර් මහත්වරු ද, ඉලංගෙයි තමිල් අරසු කච්චි නියෝජනය කරමින් එම්.ඒ. සුමන්තිරන් මහතා සහ පාර්ලිමේන්තු මන්ත්රී ෂානක්යන් රාසමානික්කම් මහතා ද, ශ්රී ලංකා මුස්ලිම් කොංග්රසය නියෝජනය කරමින් පාර්ලිමේන්තු මන්ත්රීවරුන් වන රවුෆ් හකීම් සහ නිසාම් කාරියප්පර් මහත්වරු ද, දෙමළ ප්රගතිශීලී සන්ධානය නියෝජනය කරමින් වී. රාධක්රිෂ්ණන් සහ භරත් අරුල්සාමි මහත්වරු ද එක්ව සිටියහ.
