අස්වැසුම සුබසාධක ප්රතිලාභ වැඩසටහනේ තොරතුරු යාවත්කාලීන කිරීම (Recertification) සහ සංශෝධන කටයුතු වත්මන් ක්රමවේදය යටතේ ක්රියාත්මක කිරීමෙන් ඉදිරියේදී මතුවිය හැකි ගැටලු, දත්ත දෝෂ සහ මහජන විරෝධතා සම්බන්ධයෙන් කිසිදු වගකීමක් භාර නොගන්නා බව ශ්රී ලංකා ප්රාදේශීය ලේකම්වරුන්ගේ හා සහකාර ප්රාදේශීය ලේකම්වරුන්ගේ සංගමය ජනාධිපතිවරයා වෙත දැනුම් දී තිබේ.
එම සංගමය විසින් 2026 ජූලි 9 දිනැති ලිපියකින් ජනාධිපතිවරයාට පෙන්වා දී ඇත්තේ අස්වැසුම වැඩසටහන ක්රියාත්මක කිරීමේදී ප්රාදේශීය ලේකම්වරුන් මුහුණ දෙන ප්රායෝගික හා පද්ධතිමය ගැටලු පිළිබඳව මීට පෙර සුබසාධක ප්රතිලාභ මණ්ඩලය වෙත 2026 මැයි 23 දින ද කරුණු ඉදිරිපත් කළද, එම ගැටලුවලට මෙතෙක් ප්රායෝගික විසඳුම් ලබා දී නොමැති බවය.
එම ලිපියේ සඳහන් වන්නේ අස්වැසුම වැඩසටහනේ පළමු අදියරේදී බරපතළ දෝෂ සහිත දත්ත පද්ධතියක් භාවිතා කිරීම හේතුවෙන් සුදුසුකම් නොලැබිය යුතු පිරිසක් ප්රතිලාභීන් ලෙස තේරී පත්වූ අතර සැබෑ සුදුසුකම් ලැබූ පිරිසක් ප්රතිලාභ අහිමි වූ බවය. එවැනි දෝෂ සහිත දත්ත පද්ධතියක් මත නැවත තොරතුරු යාවත්කාලීන කිරීම හා සංශෝධන කටයුතු සිදු කිරීම ප්රායෝගික හෝ නිවැරදි ක්රියාවලියක් නොවන බවද සංගමය පෙන්වා දෙයි.
තවද ක්ෂේත්ර මට්ටමින් සහ කාර්යාලීය මට්ටමින් අස්වැසුම වැඩසටහන සඳහා ස්ථිර නිලධාරීන් පත් කර නොමැති අතර නිශ්චිත රාජකාරි පැවරීමක් ද සිදු කර නොමැති බැවින් සමස්ත ක්රියාවලියම අර්බුදයකට ලක්ව ඇති බවත් ලිපියේ සඳහන් කර ඇත. එවැනි තත්ත්වයක් තුළ දිස්ත්රික් ලේකම්වරුන් හරහා බලපෑම් කරමින් සංශෝධන කටයුතු කඩිනමින් අවසන් කිරීමට සුබසාධක ප්රතිලාභ මණ්ඩලය උත්සාහ දරන බවටද චෝදනා කර ඇත.
එබැවින් දෝෂ සහිත පද්ධතියක් මත පදනම්ව වැඩසටහන තවදුරටත් ක්රියාත්මක කිරීමෙන් මතුවිය හැකි දත්ත දෝෂ, මහජන විරෝධතා හෝ වෙනත් ගැටලු සම්බන්ධයෙන් ප්රාදේශීය ලේකම්වරුන් සහ සහකාර ප්රාදේශීය ලේකම්වරුන් කිසිදු වගකීමක් භාර නොගන්නා බව සංගමය අවධාරණය කරයි.
එමෙන්ම දැනට ක්රියාත්මක කර ඇති වර්තමාන ක්රියාමාර්ගය හේතුවෙන් ප්රතිලාභ ලැබීමට සුදුසු පුද්ගලයන්ට ප්රතිලාභ අහිමි වීම හෝ නුසුදුසු පුද්ගලයන්ට ප්රතිලාභ හිමි වීමේ වගකීම මෙන්ම මෙම වැඩසටහනේ අසාර්ථකත්වයට අදාළ සම්පූර්ණ වගකීම සුබසාධක ප්රතිලාභ මණ්ඩලය විසින්ම භාරගත යුතු බවද එම ලිපියෙන් දැනුම් දී ඇත.
